6-13 مامىر كۇندەرى قىتايدىڭ ماو-مين قالاسىندا جاعاجاي ۆولەيبولىنان ازيا چەمپيوناتىنىڭ جەڭىمپازدارى مەن جۇلدەگەرلەرى انىقتالادى. باپكەرلەر كەڭەسى قۇرلىق سىنىنا قاتىساتىن قازاقستان سپورتشىلارىنىڭ ەسىمىن اتادى دەپ حابارلايدى Olympic.kz.
ەرلەر اراسىندا الەكساندر دياچەنكو مەن الەكسەي سيدورەنكو جانە دميتري ياكوۆلەۆ پەن سەرگەي بوگاتۋ جۇبى باق سىنايدى.
قىزدار اراسىندا تاتيانا ماشكوۆا مەن يرينا تسيمبالوۆاعا سەنىم ارتامىز.
ايەلدەر كومانداسىنىڭ باس باپكەرى ۆلاديمير كۋشتالوۆتىڭ ايتۋىنشا, تسيمبالوۆا مەن ماشكوۆا جۇبى اۆستراليالىق كەڭەسشىنىڭ نۇسقاۋىمەن دايىندالۋدا.
«ءبىزدىڭ الدىمىزداعى ەڭ نەگىزگى مىندەت – ازيا چەمپيوناتىندا جوعارى ناتيجە كورسەتۋ. بىرىنشىلىككە دايىندىق كەزەڭىن الماتىدا وتكىزدىك. وكىنىشكە قاراي, قىتايعا باراتىن ۆيزا ماسەلەسىن شەشۋ ءۇشىن شەتەلدەگى جاتتىعۋ جيىندارىنان تىس قالدىق. ەلدەگى اۋا رايى جاتتىعۋعا ازداپ كەدەرگى كەلتىرۋدە. بۇگىندە كوماندا مۇشەلەرى اۆستراليادان كەلگەن كەڭەسشى باپكەر اننا سەدەربەرگتىڭ نۇسقاۋىمەن دايىندالىپ جاتىر.
قۇرلىق دوداسىنداعى ءبىزدىڭ قىزداردىڭ باستى قارسىلاسى – قىتاي, جاپونيا, اۆستراليا جانە تايلاند كوماندالارى. بيىلعى ماۋسىم باستالىسىمەن ايتارلىقتاي جارىسقا قاتىسىپ ۇلگەرمەدىك. جاتتىعۋ جيىنى دا كوپ وتكەن جوق. سوندىقتان, ءاربىر قارسىلاس ءبىز ءۇشىن قاۋىپتى سانالادى.
بىزدەگى كۇن رايىنىڭ سۋىقتىعى دا اسەرىن تيگىزبەي قويماسى انىق. دەگەنمەن, بار كۇشىمىزدى جيناپ, ازيا چەمپيوناتىندا ءساتتى ونەر كورسەتۋگە تىرىسامىز. وليمپيادا ليتسەنزياسىن يەلەنۋ ءۇشىن ايانىپ قالماۋ قاجەت», - دەيدى كوماندا باس باپكەرى ۆلاديمير كۋشتالوۆ.