ءىس-شارادا ءسوز العان قالا اكىمى ع.ءابدىراحىموۆ ەلباسى ن.ءا.نازارباەۆتىڭ تاپسىرماسىمەن ەلىمىزدىڭ جاڭا الەۋمەتتىك ساياساتى ىسكە اسىپ جاتقاندىعىن مالىمدەپ, «الەۋمەتتىك قامقورلىق» مەملەكەتتىك باعدارلاماسى اياسىندا كوپبالالى وتباسىلار مەن حالىقتىڭ از قامتاماسىز ەتىلگەن توپتارىن باسپانامەن قامتۋ جۇمىستارى جۇرگىزىلىپ جاتقانىن اتاپ ءوتتى.
– مەملەكەت تۇرعىنداردى باسپانامەن قامتۋ, كوپبالالى وتباسىلارعا, مۇقتاج ازاماتتارعا قولداۋ كورسەتۋ باعىتتارىندا ناتيجەلى جۇمىستار جۇرگىزىپ كەلەدى. حالىقتى قولداۋعا ارنالعان وسى جۇمىستاردى قۋاتتى مەملەكەتتەر عانا اتقارا الادى. وزدەرىڭىز جاقسى بىلەسىزدەر, شىمكەنت قالاسىندا سوڭعى جىلدارى قۇرىلىس قارقىنى ارتتى. جاڭا شاعىناۋداندار سالىنىپ, مىڭداعان وتباسىلار باسپانالى بولدى. بىلتىردىڭ وزىندە قالامىزدا «نۇرلى جەر» مەملەكەتتىك باعدارلاماسى بويىنشا 1152 وتباسى باسپانالى بولدى. بۇل ءداستۇر بيىل دا جالعاسىن تاۋىپ, تالاي وتباسى باسپانالى بولۋ باقىتى بۇيىرعالى تۇر. قالانىڭ دامۋ جوسپارىنا وسىدان 3-4 جىل بۇرىن عانا ەنگىزىلگەن «شىمكەنت-سيتي» زاماناۋي قالاشىعى بۇگىن العاشقى تۇرعىندارىن قابىلداۋدا, - دەدى قالا اكىمى.
ايتا كەتسەك, جىل سوڭىنا دەيىن 828 پاتەرلى 14 ارەندالىق ءۇي پايدالانۋعا بەرىلەدى. بۇدان باسقا «7-20-25» باعدارلاماسى ارقىلى 246 پاتەرلى 5 كرەديتتىك ءۇي بەرىلسە, «تۇرعىن ءۇي قۇرىلىس جيناق بانكى» ارقىلى نۇرسات شاعىن اۋدانىندا 656 پاتەرلى 11 كرەديتتىك تۇرعىن ءۇي, «شىمكەنت» اكك ارقىلى 1016 پاتەرلى 24 كرەديتتىك تۇرعىن ۇي حالىق يگىلىگىنە تاپسىرىلماق. جەكە قۇرىلىس كومپانيالارى ەسەبىنەن 1293 پاتەرلى 26 تۇرعىن ءۇي پايدالانۋعا بەرىلمەك.
ال «شىمكەنت-سيتي» قالاشىعى تاياۋ بولاشاقتا مەگاپوليستىڭ قارقىندى دامۋ ورتالىعىنا اينالادى. قالاشىقتاعى قونىس تويى بارىسىندا تۇرعىندارعا مەرەكەلىك داستارحان جايىلىپ, ءىس-شارانىڭ سوڭى دۋماندى كونتسەرتكە ۇلاستى.