كوپتەگەن ۇلتتار مەن ۇلىس وكىلدەرىن تاتۋلىقتىڭ بەسىگىندە تەربەتكەن تاۋەلسىز ەلىمىزدىڭ رۋحاني استاناسى سانالاتىن الماتى جۇرتشىلىعى اتاۋلى مەرەكەنى ايرىقشا سالتاناتپەن اتاپ ءوتتى. مەرەكەلىك شاراعا ارنايى قاتىسقان قاسىم-جومارت توقاەۆ بارشا قازاقستان حالقىن ىنتىماق كۇنىمەن قۇتتىقتادى.
– قۇرمەتتى الەۋمەت, قادىرلى قاۋىم, ارداقتى الماتىلىقتار! بۇگىن ەرەكشە كۇن. تاتۋلىق مەرەكەسى. ەلىمىز بۇل مەرەكەنى ەرەكشە جاقسى كورەدى. سوندىقتان بارشاڭىزدى شىن جۇرەكتەن قۇتتىقتايمىن. ۇلت پەن ۇلىستىڭ ىنتىماعىن دارىپتەيتىن وسىناۋ مەرەكەنىڭ قادىر-قاسيەتىن ءبارىمىز جاقسى بىلەمىز. ەكى كۇن بۇرىن عانا وتكەن قازاقستان حالقى اسسامبلەياسىنىڭ باسقوسۋىندا سويلەگەن سوزىندە ەلباسىمىز ەل ىشىندەگى مىزعىماس تاتۋلىقتىڭ ماڭىزدىلىعىن اتاپ ءوتتى. تاريحتىڭ سان قيلى سىن ساعاتتارىندا قازاق جەرىن پانالاپ كەلگەن كوپتەگەن ۇلت وكىلدەرى ءبىر ءۇيدىڭ بالاسىنداي تۋىس باۋىر بولدى. زاماننىڭ تاۋقىمەتىنە قاراماستان ءبىزدىڭ حالقىمىز سولاردىڭ ءبارىن باۋىرىنا باسىپ, بارىمەن ءبولىستى. ەگەمەندىك العان جىلدارى كوپ ەتنوستى, كوپ كونفەسسيالى ەلىمىزدىڭ كەلەشەگى تۋرالى ءتۇرلى تەرىس بولجامدار ايتىلدى. الايدا, ەلباسىمىزدىڭ ارقاسىندا قازاقستان بۇگىندە ءتۇرلى ەتنوس وكىلدەرىنىڭ كيەلى شاڭىراعىنا اينالدى. ابىرويلى, بەدەلدى مەملەكەت بولدى. ورتاق وتانىمىزداعى بەيبىتشىلىك پەن كەلىسىم ەل دامۋىنىڭ بەرىك نەگىزىنە اينالدى. «ءبىرىڭدى قازاق, ءبىرىڭ دوس, كورمەسەڭ ءىستىڭ ءبارى بوس», – دەپ ۇلى اباي ايتقانداي, ءبىز ەلىمىزدىڭ جەمىستى ءارى جەڭىستى كۇندەرىنە ىنتىماعىمىز ارقىلى جەتتىك. قىمباتتى الماتىلىقتار, تابيعاتى تاڭعاجايىپ ارۋ الماتى بىرەگەي, بالاماسى جوق شاھار. ونىڭ جىلناماسى بۇكىل وتانىمىزدىڭ جارقىن ايناسى. الماتى ازاتتىعىمىزدىڭ بەسىگى بولعان, ەلدىگىمىزدىڭ ىرگەسى قالانعان قاستەرلى قالا. جاس مەملەكەتىمىزدىڭ جەتىستىكتەرىن دۇنيەجۇزىنە العاش تانىتقان دا وسى الماتى. الاتاۋ باۋرايىنداعى اسەم شاھار بۇگىندە قازاق زيالىلارىنىڭ قۇتتى مەكەنى بولىپ وتىر. الماتى عىلىمنىڭ ورداسى, ونەردىڭ بەسىگى, شىعارماشىلىقتىڭ شاڭىراعى, – دەدى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ.
مىڭداعان الماتىلىقتىڭ باسىن قوسقان سالتاناتتى شارادا ەلىمىزدى مەكەندەگەن ءتۇرلى ۇلتتاردىڭ تانىم-تاريحىنان سىر شەرتەتىن ارنايى كورمەلەر ۇيىمداستىرىلىپ, وتاندىق ونەرپازدار ءان مەن كۇيدەن شاشۋ شاشتى.
«جىگىتتەر» كۆارتەتى, «سالتانات» بي ءانسامبلى, «اسىلىم» بي توبى, ارداق بالاجانوۆا, مەرۋەرت تۇسىپباەۆا, ءالي وقاپوۆ, دينارا سۇلتان, كامشات جولدىباەۆا سىندى تاعى باسقا دا ونەرپازدار مەرەكەنىڭ اجارىن ارتتىردى.
ەسكە سالساق, مەملەكەت باسشىسى قاسىم-جومارت توقاەۆ كەشە الماتىعا جۇمىس ساپارىمەن كەلىپ, مەگاپوليستەگى مادەني-الەۋمەتتىك نىسانداردى ارالاپ, الماتى قالاسىن دامىتۋ جونىندە بىرقاتار ناقتى تاپسىرمالار بەرگەن بولاتىن.
الماتى