سەنبى, 9 اقپان 2013 7:22
شارق ۇرىپ اۋىلىمدى ساعىنىپ كەلەمىن. ساعىنىشقا تولعان جۇرەگىم ەركىنەن تىس ءدۇرس-ءدۇرس بالعا ۇرعانداي سوعادى. كوز الدىما تۋعان اۋىلدىڭ بەينەسى, اياۋلى انامنىڭ جول قاراپ ءجۇرگەن سۇلباسى ەلەستەيدى. كورشى ەگىنباي اكەمنىڭ نەمەرەسىن الدىنا سالىپ ىڭىلداپ وتىراتىنى, قۇرداسىم رۇستەمنىڭ اقجارما كۇلكىسى…بارى-ءبارى كوكىرەگىمدە سايراپ تۇر. كوڭىل قۇرعىر ەلجىرە-ە-ەپ-اق كەتەدى. ەسكىرگەن ەسىكتىڭ توپساسىنداي توزعان سارى اۆتوبۋس شيقىلداپ ءىلبىپ كەلەدى. ۇزىننان سۇلاعان قارا جول كوكجيەككە ءسىڭىپ جاتىر.
سەنبى, 9 اقپان 2013 7:22
شارق ۇرىپ اۋىلىمدى ساعىنىپ كەلەمىن. ساعىنىشقا تولعان جۇرەگىم ەركىنەن تىس ءدۇرس-ءدۇرس بالعا ۇرعانداي سوعادى. كوز الدىما تۋعان اۋىلدىڭ بەينەسى, اياۋلى انامنىڭ جول قاراپ ءجۇرگەن سۇلباسى ەلەستەيدى. كورشى ەگىنباي اكەمنىڭ نەمەرەسىن الدىنا سالىپ ىڭىلداپ وتىراتىنى, قۇرداسىم رۇستەمنىڭ اقجارما كۇلكىسى…بارى-ءبارى كوكىرەگىمدە سايراپ تۇر. كوڭىل قۇرعىر ەلجىرە-ە-ەپ-اق كەتەدى. ەسكىرگەن ەسىكتىڭ توپساسىنداي توزعان سارى اۆتوبۋس شيقىلداپ ءىلبىپ كەلەدى. ۇزىننان سۇلاعان قارا جول كوكجيەككە ءسىڭىپ جاتىر. قۇددى ءبىزدىڭ اۋىل الىستاپ كەتكەندەي. شىلىڭگىر شىلدەدە اۋىلداعى بالالار مولدىرەپ اعىپ جاتقان قابىرعانىڭ سۋىنا شومىلىپ جاتقان شىعار, ءا! كىم ءبىلسىن, الدە ءشوپ شاۋىپ ءجۇر مە ەكەن؟ ەسىمە بالالىق شاقتىڭ باقىتتى كەزەڭدەرى ۇزىك-ۇزىك ورالادى. اجەم, اقباس اتام, اقاتاي… ءبارى جيىلىپ كۇتىپ تۇرعانداي سەزىلەدى. ول كىسىلەردەن مەن جىراق, جو-جوو-جوق ولار مەنەن جىراقتاپ كەتكەلى قاشان انا جاققا. ساعىنىشتى ءومىر-اي!
اۋىلدىڭ ورتاسىنا كىردىك. ادام تانىماستاي وزگەرگەن. قۇلاپ قالعان ۇيلەر, ولاردىڭ قاڭىراپ, ۇڭىرەيگەن قابىرعالارى. بەتىن اۋلاق قىلسىن, بەينە ءبىر سوعىس بولعان جەردەن اۋمايدى. اۆتوبۋستان تۇسە كلاستاسىما جولىقتىم. قۇشاقتاسىپ جاتىرمىز…– ۇلكەن قالادا نە جاڭالىق بار, دەمالىس پا؟ – دەيدى.– ءبارى جاقسى, اۋىلعا اۋناپ-قۋناپ قايتقىم كەلدى.– وزدەرىڭ قالاي؟ نە كاسىپ ىستەپ جۇرسىڭدەر؟– كاسىبىمىز سول, ءۇي بۇزۋ, وتىن جيناۋ, مال باعۋ….تاعى بىردەمەلەردى ايتقان بولدى. ەستىگەن جوقپىن, ەستىگىم دە كەلمەدى. ءبىرتۇرلى كوڭىلىم قۇلازىپ كەتتى.ءبىزدىڭ بالا كۇنىمىزدە اۋىل كوڭىلدى ەدى. اۋىل ادامدارى اقجارقىن, قاق-سوقپەن جۇمىسى جوق, ۋايىمسىز عۇمىر كەشىپ, شات-شادىمان جۇرەتىن. ول كەزدە ەلدە شەجىرەلى قاريالار, يماندى اجەلەر وتە كوپ بولاتىن. ءاربىر ۇيدە توبەدەي بولىپ ءبىر-ءبىر ءۇلكەن كىسى وتىراتىن. ۇلكەن كىسى بار ۇيدە يماندىلىق ءدان سەبەدى. شاعىن اۋىلدا بەيبەرەكەت ۇرىس تا, وداعاي قىلمىس تا ورىن المايتىن. ەگەردە اعايىن اراسىندا ورىنسىز جاعداي تۋىپ قالسا, ەلدىڭ جاسى ۇلكەن قارياسى ەسىمسەيىت اتاعا بارىپ جۇگىنەدى. ول كىسى بولسا شەشىلمەي قالعان ءتۇيىندى قولما-قول شەشىپ, ءادىلدىگىن ايتادى. مىنە, وسىنداي بەرەكەسى ۇيىعان ەلدە وستىك.اۋىلىمىزدىڭ اتى قابىرعا دەپ اتالادى. باسىن ۇلىتاۋدان الىپ, باتىسقا قاراي قىزدىڭ بۇرىمىنداي ورىلە اققان تورعاي وزەنىنىڭ ءبىر سالاسى… ۇلى اعارتۋشى ىبىراي اتامىزدىڭ «قىپشاق سەيىتقۇل» اڭگىمەسىندە «قىپشاق سەيىتقۇل وتىز ءۇيلى توبىرىمەن كوپ جەرلەردى كەزىپ ءجۇرىپ, اقىرىندا تورعاي تورەسىندەگى قابىرعا دەگەن وزەن-سۋدىڭ بويىنا توقتادى», دەپ جازعانى بار. دەمەك, قابىرعا دەگەن جەردىڭ ەپتەپ بولسا دا كوپشىلىككە ءمالىم ەكەنى ايان.تۋعان جەرىمىزدىڭ تاريحى دا تەرەڭدە جاتقان قۇپيا قويما سەكىلدى. ونى ماعان اجەم مارقۇم شىم-شىمداپ سىر عىپ شەرتەتىن. اجەم ايتقان سول اڭگىمەنىڭ ءبارى ەرتەگى سەكىلدى ەدى… ەسەيە كەلە سولاردىڭ شىندىق ەكەنىن ءتۇسىندىم. تورعاي جۇرتى اۋزى دۋالى اۋليە دەپ دارىپتەيتىن كورەگەن سارى قوشقار باتىر ءبىزدىڭ بابامىز بولىپ كەلەدى. بەيىتى دە اۋىلدىڭ ىرگەسىندە. 1993 جىلى باتىردىڭ 300 جىلدىعى ەرەكشە سالتاناتپەن اتاپ ءوتىلدى. وعان الماتىدان اقيىق اقىن عافۋ قايىربەكوۆ كەلدى. بالا بولسام دا اقىندى كورگىم كەلىپ, سىرتىنان بارلاپ ءجۇردىم. بارلىق ولەڭدەرىن جاتقا بىلەم. ءبىر ءسات داۋىلپاز اقىن ساحناعا شىعىپ, قىران داۋىسىمەن ولەڭ وقىعاندا شۋىلداپ وتىرعان جۇرت سىلتىدەي تىنا قالدى.ماعجان جۇماباەۆتىڭ «باتىر بايان» داستانىنداعى باياننىڭ دوسى, ەرەن باتىرلىعىمەن كوزگە تۇسكەن جاناتاي باتىر دا وسى جەردە تۋىپ, دۇنيەدەن وزعان. 1919 جىلى تورعاي وبلىستىق اتقارۋ كوميتەتىنىڭ مۇشەسى ءارى ميليتسيا باستىعى, 1926 جىلى رسفسر جوعارعى سوتىنىڭ قازاقستان بولىمشەسىندە القا ءمۇشەسى بولعان كەنجەعۇل بۇركىتوۆ, نەبارى 30 جاسىندا سوتسياليستىك ەڭبەك ەرى اتاعىن يەلەنگەن ەركىن شايكەنوۆ, عالىم-جازۋشى, جۋرناليستەر ساپابەك ءاسىپ, بوگەتباي الماعانبەتوۆ, اقىن بايداق مولداشەۆ, جازۋشى قوعاباي ءسارسەكەەۆ, جۇماتاي سابىرجان ۇلى, حيميا عىلىمدارىنىڭ دوكتورى مۇباراك ەرماعانبەتوۆ, ماتەماتيك-عالىم ۇعىباي بەكتۇرسىنوۆ, عىلىم كانديداتتارى قايىرجان بايماعانبەتوۆ, كاكەن وسپانوۆ, رامازان بوقانوۆ ەسىمدەرىن ەرەكشە ماقتانىش تۇتامىز.بۇرىن اۋىلدا قازىنالى قاريالار كوپ ەدى. كوزىم كورگەن ەسىمسەيىت, بۇزاۋ, شايقىستان, ءالىم, بوقان, تولەۋ, اقباس, ءبوپىش, تالقانباي اتالارىم ءجيى ەسىمە تۇسەدى. ساعىنامىن. وسى اقساقالدار اۋىر كەزەڭدە ۋاقىتپەن ساناسپاي ەڭبەك ەتتى, قان مايداندى باستان كەشتى. ەلدىڭ ءبىرلىگى مەن بەرەكەسىن ساقتادى. كەلەشەك ۇرپاققا ۇلگى بولا ءبىلدى.ستۋدەنت كەزىمدە اۋىلعا دەمالىسقا كەلگەن سايىن مىندەتتى تۇردە ۇلكەندەرگە سالەم بەرەمىن. ول كىسىلەر ءبىر مارقايىپ قالادى. كەيدە وتىرىپ اڭگىمەگە ايتادى. جاڭا كوركەيىپ كەلە جاتقان استانا تۋرالى دا سۇراپ قالادى. شامام كەلگەنشە جاۋاپ بەرەمىن. وسى جولمەن تولەۋ اقساقالعا كەلدىم. اۋىز تولتىرىپ سالەم بەردىم. ەپتەپ ءازىلى بار اقساقال, سۇراقتى جاۋدىرىپ جاتىر.– بالام ەلباسىن كورىپ تۇراسىڭ با؟– جوق, اكە.– ءاي, قالقام بوقان بولسا كوردىم دەي سالار ەدى, – دەپ قاريا مىرس ەتتى. جاڭا ەلورداعا قونىس اۋدارعان قۇرداسى بوقان قاريانى ساعىنعان بولار دەپ ويلادىم. بۇگىندە ەكى اقساقال دا ومىردە جوق. بوقان اكە استانادا ءدۇنيەدەن وزعان. بالالارى سۇيەگىن اۋىلعا اپارىپ قويدى. اۋىلدا قالعان سارقىندى قاريالاردىڭ سوڭى بولىپ, ءبىر قاريا عانا ءجۇر. ءوتىپ جاتىر, كەتىپ جاتىر ءدۇنيەدەن… كۇمىستەلگەن ءمۇيىز شاقشالارىنان ناسىبايىن ناشىنە كەلتىرىپ, شۇيىرە اتىپ, ۇزىك-ۇزىك سويلەپ ءۇزىلدىرىپ قوياتىن, قيلى-قيلى تاريحتى تەرەڭنەن قوزعاپ تامسانتىپ وتىراتىن شەجىرەلى قاريالار دا تاريحقا اينالىپ بارادى.ءبىز ونى كەش ءتۇسىنىپ ءجۇرمىز.اۋىلدىڭ ورتاسىندا 1969 جىلى بوي كوتەرگەن مادەنيەت ءۇيى بولدى. ەڭسەلى, اۋىلعا ەرەكشە كورىك بەرىپ تۇراتىن. ول كەزدە كلۋبتا ۇنەمى كينو قويىلادى. بالا بولساق تا كينودان قالمايمىز. ءۇندى كينوسى كەلگەندە مالدى ەرتەرەك جايلاپ, كلۋبقا قاراي زىمىرايمىز. كينوعا كىرۋ بيلەتىنىڭ قۇنى – 20 تيىن. قازىرگى تاڭدا جاس بالعىندارعا ايتساق, سەنبەي قالۋى مۇمكىن. كينومەحانيك مارقۇم شاكەن اعاي, ءبىلىمدى ازامات ەدى. اۋداننان ءتۇرلى كينولاردى الىپ كەلىپ كورسەتەدى. كەيدە اۋىلعا الىستان ات ارىتىپ ءانشىلەر كەلەدى. قازىرگى بەلگىلى دەپ جۇرگەن انشىلەردىڭ دەنى ءبىزدىڭ اۋىلداعى كلۋبتا تامىلجىتىپ ءان سالعان. ولار كەلگەندە اۋىل جۇرتى ءبىر جاساپ قالادى. قاۋىرت جۇمىستا شاڭ-توزاڭعا كومىلىپ ءجۇرەتىن اعا-جەڭگەلەرىمىز جۋىنىپ-شايىنىپ, قازداي ءتىزىلىپ كلۋبتا وتىرادى. اۋىلعا سول كەزدە رەسپۋبليكاعا اتى ءمالىم وبلىستىق «شەرتەر» ءانسامبلى ءجيى كەلەدى. ونىڭ سەبەبى دە بار. ءانسامبلدىڭ ماڭدايالدى ءانشىسى سايلاۋ اعا ءبىزدىڭ اۋىلدا تۋعان. ورداباي اكەمنىڭ ۇلى. بۇل ءاۋلەتتە تۋعاندار تۇقىمىمەن ونەرپاز. تەمىرالى باقتىگەرەۆتىڭ «بارىپ قايت, بالام اۋىلعا» اتتى ءانىن دومبىرامەن بابىنا كەلتىرە ورىندايدى. وسى ءاندى تىڭداپ وتىرعان اجەلەرىمىز كوزىنە جاس الىپ, كوڭىلدەرى بوساپ قالادى. اۋىلدىڭ اجارى بولعان مادەنيەت ءۇيى دە وتكەن عاسىردىڭ سوڭعى شيرەگىندە بۇزىلىپ قالدى. بىردە وسى ءۇيىندى بولىپ قالعان كلۋبتىڭ جانىندا ايدوس, ارداق, امانجول تورتەۋمىز اڭگىمەلەسىپ وتىردىق.قويۋ قارا سيا ءتۇن. اي ساۋلەسى سىعىرايىپ ءتۇسىپ تۇر. اۋىل قالىڭ ۇيقىدا. اڭگىمە جەلىسى وقىعان تاريحي كىتاپتار جانە باتىر بابالار جايىنا ويىسقان. كونە تاريح قاتپارىنان سىر شەرتىپ, بابالارىمىزدىڭ تەگىمىز كوكبورى دەيتىنى تەگىن ايتىلماعانىن, ولاردىڭ ون ءۇش جاسىندا وتاۋ يەسى, ون بەسىندە قولىنا قارۋ الىپ ەلى مەن جەرىن جاۋدان قورعاعانى تۋرالى, ال ءبىزدىڭ ەتەگىمىزدى جيا الماي, اتا-انانىڭ جەتەگىندە جۇرگەنمىز ءسوز بولدى. ۇيات-اي. كەنەسارى مەن ناۋرىزبايعا تامسانا توقتالىپ, ابىلاي حاننىڭ ءتۇسىن جورىعان بۇقار جىراۋدىڭ اۋليەلەگىنە باس ءيىپ بارلىق قازاقتىڭ تاعدىرىن بولجاعانداي سايكەس كەلەتىنىنە تاڭ قالدىق. اقىرى تورتەۋمىز ءبىز كىمبىز دەگەن سۇراققا تىرەلدىك. ويلانىپ قالدىق.– قۇرت-قۇمىرسقا, جو-جو-جوق, – دەيدى ايدوس.– باقا-شايانبىز.– قالاي؟ بىزدەن كەيىنگى ۇرپاقتار دا بار ەمەس پە؟ – ك ۇلىپ جىبەردى. ءبارىمىز دە كۇلدىك. نەگە؟ باقا-شايان بولعانىمىزعا ما؟ قىزىق…بىزدىڭ اۋىلدىڭ ادامدارى ءازىل سوزگە ۇستا, شەتتەرىنەن ءبىر اتارى بار جاندار. بايقاماساڭ, قوناق بولىپ كەلگەن كىسىگە «جاپسىرما» ەسىم قويىپ جىبەرەدى. اۋىلدا سەرىك دەگەن ەسىم كوپ. ءبىر-ءبىرىن شاتاستىرىپ الماۋ ءۇشىن كاپىر سەرىك, قويشىنىڭ سەرىگى, ءتاي-ءتاي سەرىك, تورعاي سەرىك دەپ اتاپ جاتادى. اۋىلدىڭ جالعىز اقىنى بار. ول مەنىڭ جىلقىباي كوكەم. وسى جەردە تۋعان. اكە-شەشەسى كەزىندە سوۆحوزدىڭ وردەندى شوپانى بولعان, ەلگە سىيلى ادامدار. ابىرويلى اكە-شەشەنىڭ ارقاسىندا جىقاڭ جالعىز ۇل بولىپ, ەركە ءوستى, ەشكىم بەتىنەن قاققان جوق. كەيىن اكەسىنىڭ جولىن قۋىپ شوپان بولدى. اۋىلدا توي وتسە ەڭ الدىمەن دۋماندى جىقاڭ باستايدى. قارا دومبىراسىن كۇمبىرلەتە شەرتىپ, قارلىققان داۋىسىمەن ءوزىنىڭ ولەڭىن ايتادى. جازعان ولەڭدەرى توم-توم بولىپ قارا داپتەردە جينالىپ جاتىر. ەش گازەتتە جارىق كورگەن ەمەس. اعامىزدىڭ كاتيا دەگەن سۇيكىمدى جۇبايى بولدى. نەگىزى, قوستاناي جاقتان…ورىسشاعا سۋداي. اۋىلعا كەلگەن باسقا ۇلت وكىلدەرى كاتيا جەڭگەممەن ەمەن-جارقىن ءسويلەسەدى. كەيىن ول كىسى اۋىرىپ ءدۇنيە سالدى. اعامىز باسى سوپايىپ جالعىز قالدى. جىقاڭنىڭ ءجۇدەپ-جاداپ جۇرگەن كەزىندەگى ءبىر وقيعا ويىما ورالدى.شىلىڭگەر شىلدەنىڭ مي قايناتار ىستىعى. شاقىرايعان كۇن تاس توبەگە اۋىپ, ءۇي ىرگەسىن كولەڭكەلەپ, كىتاپ وقىپ وتىرعانمىن. انادايدان «ءاي!» دەگەن قارلىققان داۋىسقا جالت قاراسام جىلقىباي اعام كەلە جاتىر ەكەن. كادىمگى اپەندى جىقاڭ. ءتۇرى سۇرلانىپ, ەكى كوزى شاراسىنان شىققالى تۇر. داۋىسى ءزىلدى.– اپاڭ قايدا؟سارايدىڭ الدىندا قاراشاش اجەم مەن ءتۇبىت ءتۇتىپ وتىرعان اپامدار جاققا قولىمدى شوشايتىپ: «انە وتىر» دەدىم. ول بولسا ساتپاق-ساتپاق شالبارىنىڭ ىشقىرىن بايلانعان كەندىر ءجىپتى قايتادان ىشقىنا تارتىپ تۇرىپ ماعان ءتيىستى:– ە-ي, وسى سەن قاشان اكىم بولىپ مەنى جارىلقايسىڭ؟– قايدان بىلەيىن…– ي-ي, سەن وسى نە بىلەسىڭ. – قولىن سىلتەپ ساراي جاققا سۇيرەتىلە قوزعالدى.ءبىزدىڭ اۋىل جىقاڭدى اپەندى ساناعانمەن انام «اتا-اناسى جاقسى كىسىلەر ەدى, بىرەۋدىڭ جالعىزى عوي, تارىعىپ جۇرگەن بولار», دەپ اياۋشىلىق بىلدىرەتىن. قولىن قۇر قايتارمايتىن. سوندىقتان, ول ءبىزدىڭ ۇيگە ءجيى كەلىپ جۇرەدى.جىقاڭنىڭ ءىس-ارەكەتىن قىزىقتاپ, ويىم سان-ساققا ءبولىنىپ تۇرعان زاماتتا قاراشاش اجەم:– قۇداي تاعالا, امان-ساۋسىڭ با, ءاي, قارا ۇل؟ – دەدى.– قۇدايدىڭ كوزى جوق, – دەپ دۇڭك ەتتى ول.– ءتايت ءارى! جاراتقان يەگە ءتىلىڭ تيمەسىن, ءوي قاعىندى نەمە, سول.– ءتىلىم تيسە بارسىن, كەرەك جانىمدى السىن, – دەپ جانارىن جاسقا تولتىرىپ ەڭكىلدەپ كەپ جىلاسىن. انام جۇباتا الماي اۋرە. قاراشاش اجە دە, مەن دە اڭ-تاڭ بولىپ قاراپ قالىپپىز…سول كورىنىس كوز الدىما كەلگەندە جىلقىباي اعاما جاقسىلىق جاساعىم كەلىپ تۇرادى. قازىر ەلدە جالعىز تۇرادى, زەينەتكەرلىككە شىققان. اۋىلعا بارعان سايىن اعاما بارىپ سالەم بەرەم. ۇزاق وتىرىپ اڭگىمەلەسەم. كوڭىلى كەڭ, نيەتى ادال كىسى.بۇرىن وسى اۋىل كرۋپسكايا اتىنداعى كەڭشار, كەيىن قابىرعا ۇجىمشارى بولىپ 40 جىل ۇلكەن شارۋشىلىقتىڭ ورتالىعىنا اينالدى. ونىڭ كەمەر, بەستام, الاكول دەگەن بولىمشەلەرى بولدى. وسى شارۋشىلىقتىڭ بارلىعىن قوسقاندا كەڭشاردا 35 مىڭ قوي, 4 مىڭ باس ءىرى قارا, 2 مىڭ باس جىلقى قىرعا ورەتىن. شارۋالار تابىسىنىڭ باستى كوزى – كەڭشار مالى بولاتىن. شوپاندار ونى باعىپ, جۇمىسشىلار جەم-ءشوبىن ازىرلەپ, ءۇي-جاي, قورا-قوپسىلارىن جوندەپ, ايلىقتارىن ۋاقىتىلى الىپ تۇرادى. اۋىلدا ماشينا-تراكتور پاركى جۇمىس ىستەدى.تاۋەلسىزدىك العان العاشقى جىلدارداعى قيىندىق اۋىلدىڭ ەڭسەسىن ەزىپ جىبەردى. زەينەتاقى جىلداپ كەشىگىپ, اۋىلدا جۇمىسسىزدىق بەلەڭ الدى. سول كەزدە قولدا ۇستاپ وتىرعان مالدىڭ دا قۇنى بولمادى. تىعىرىققا ءتىرەلگەن جۇرت جاپپاي قونىس اۋدارا باستادى. اۋىلدا بۇگىندە 30 وتباسى عانا تۇراقتاپ قالدى. ون جىلدىق وقۋ ورداسى ورتالاۋ مەكتەپكە اينالدى.ەل ەكونوميكاسى دامىعان سايىن تۋعان اۋىلدىڭ تۇرمىسى كىشكەنە بولسا دا تۇزەلىپ كەلەدى. ەلەكتر جارىعى تۇراقتى, ءار ءۇي دە تەلەفون ورناعان. قىسى-جازى جول قاتىناسى ءۇزىلىپ كورگەن ەمەس. الايدا, شەشىمىن تاپپاعان ءماسەلە دە جەتكىلىكتى. اۋىل جۇرتى اۋىز سۋدى وزەننەن تاسىپ ىشەدى. اۋىلدا جۇمىسسىزدىقتىڭ كەسىرىنەن جاستار تۇراقتامايدى. ولارعا مال باعۋدان باسقا كاسىپ كوزى جوق. ەلباسىنىڭ «اۋىل اكىمدەرىنىڭ جەكە بيۋدجەتى بولادى» دەگەن ءسوزى كوڭىلگە قانات ءبىتىردى. ويتكەنى, قازىرگى تاڭدا اۋىل اكىمدەرىنىڭ قولىندا ەش قارجى كوزى جوق. قارجى بولماعاننان كەيىن جۇيەلى جۇمىس جۇرگىزۋ دە مۇمكىن ەمەس. سودان كەيىن اۋىلداعى شەشىمىن تاپپاعان ماسەلەلەر قوردالانا بەرەدى.ايتا بەرسە, اۋىلدىڭ مۇڭى كوپ. بەيىمبەت اتامىزدىڭ: «گۇلدەنسە اۋىل, گۇلدەنەمىز ءبارىمىز!» دەگەن ءسوزى ەرىكسىز ويىما ورالادى. عاسىرلار بويى اۋىل ۇلتتىڭ ۇياسى بولىپ ەدى. بۇگىندە اۋىل جابىرقاۋ كۇيدە. ۇياسىنان ۇشقان قۇس تا الىس كەتپەيدى. ءبىزدىڭ دە ءبىر كۇنى ۇيامىزعا قاراي ۇشاتىنىمىز راس. ۇلتتىڭ ۇياسى ەشقاشان بۇزىلماسىن دەگىم كەلەدى.ازامات ەسەنجول.قوستاناي وبلىسى.