وتىرىستا Nur Otan پارتياسى ءتوراعاسىنىڭ ءبىرىنشى ورىنباسارى ماۋلەن اشىمباەۆ باستاعان قاتىسۋشىلار اتالعان تاقىرىپ توڭىرەگىندە پىكىرلەرىن ورتاعا سالدى. داستۇرگە ساي ءسوز تىزگىنىن عالىم, حالىقارالىق تۇركى اكادەمياسىنىڭ پرەزيدەنتى, «Egemen Qazaqstan» رەسپۋبليكالىق گازەتى» اق باسقارما توراعاسى دارحان قىدىرالى ۇستادى.
اۋەلى ماۋلەن اشىمباەۆ جاستار ماسەلەسى مەملەكەتتىڭ ۇدايى نازارىندا ەكەنىن ايتىپ, ونىڭ دالەلى رەتىندە ەلباسىنىڭ باستاماسىمەن وسى جىلدىڭ جاستار جىلى بولىپ جاريالانۋىن كەلتىردى.
– پارتيامىزدىڭ كەزەكتەن تىس XVIII سەزىندە الداعى 10 جىلعا ارنالعان جاڭا باعدارلامامىز قابىلداندى. بۇل قۇجاتتا ناقتى ون ماقساتتى انىقتاپ الدىق. سولاردىڭ ءبىرى جاستارعا قولداۋ كورسەتۋ ىسىنە ارنالدى. وسى ماقساتقا جەتۋ ءۇشىن ەلباسى, پارتيا توراعاسىنىڭ تاپسىرماسىنا سايكەس 3 باسىم باعىتتى انىقتادىق. ولار – جاستارعا الەۋمەتتىك قولداۋ كورسەتۋ, جاس بۋىننىڭ الەۋەتىن دامىتىپ, ءپاتريوتيزمدى كۇشەيتۋ جانە مەملەكەتتىك جاستار ساياساتىنىڭ ءتيىمدىلىگى مەن ناتيجەلىگىن ارتتىرۋ. جاس قازاقستاندىقتاردىڭ الدىڭعى بۋىنعا قاراعاندا اناعۇرلىم ءبىلىمدى, باسەكەگە قابىلەتتى, جان-جاقتى, كاسىبي بولۋى ءۇشىن مەملەكەت پەن قوعام تاراپىنان جۇيەلى قامقورلىق كورسەتۋىمىز كەرەك, – دەدى پارتيا توراعاسىنىڭ ءبىرىنشى ورىنباسارى.
وسى رەتتە دارحان قىدىرالى جاستار جىلى قارساڭىندا اقپارات جانە قوعامدىق دامۋ مينيسترلىگىنە ارتىلار جاۋاپكەرشىلىك جۇگى كوپ ەكەنىن ايتىپ, اتالعان مينيسترلىكتىڭ وكىلى ۆيتسە-مينيستر جۇلدىز وماربەكتەن ازىرلەنگەن جول كارتاسى جونىندە سۇرادى.
– جاستار كۇش-جىگەرى مول, ەلدى العا جەتەلەيتىن توپ. جالىندى جاستاردىڭ ءوزى بىزگە كومەك كەرەك ەمەس, تەك كەدەرگى كەلتىرمەڭدەر دەگەندى ءجيى ايتادى. سوندىقتان ولارعا كومەك ەمەس, جاعداي جاساۋىمىز ءتيىس. ول – ساپالى ءبىلىم الۋ, سپورتپەن شۇعىلدانۋ, ءوز كاسىبىن اشۋ سياقتى جان-جاقتى دامۋىن قامتاماسىز ەتۋ. جاستاردى باسپانامەن قامتاماسىز ەتۋ جاعى دا قاراستىرىلىپ جاتىر, الداعى ۋاقىتتا دارىگەر, مۇعالىم بولىپ ءىستەيتىن جاس ماماندارعا جالدامالى پاتەرلەر بەرىلەدى. «ارەكەتكە – بەرەكەت», دەگەندەي تالاپتى جاستار ءۇشىن «جاس كاسىپكەر» باعدارلاماسى بويىنشا 3 جىلدا بيزنەس باستاۋعا 60 مىڭ گرانت بولىنەدى, – دەدى ۆيتسە-مينيستر.
جاستار ماسەلەلەرىن قوزعاعاندا جۇمىسسىزدىق جاعى نازاردان تىس قالمادى. بەلگىلى اقىن, «Shalqar» راديوسىنىڭ ديرەكتورى قالقامان سارين ءبىلىم قۋىپ كەتكەندەردى ساناماعاندا, ءبىراز جاس جۇمىس ىستەيمىن دەپ شەتەل اسىپ جاتقانىن تىلگە تيەك ەتتى. ولاردىڭ دەنى اۋىل جاستارى ەكەنىن, سوندىقتان جاستار جىلى قالا جاستارى ءۇشىن عانا ەمەس, اۋىلداعىلارعا دا جاڭا تىنىس اشاتىن مۇمكىندىك بولسا دەگەن ويىن جەتكىزدى.
وسى تۇستا اڭگىمەگە ماۋلەن اشىمباەۆ ارالاسىپ, بۇرىن مىقتى تۇلعالاردىڭ ءبارى اۋىلدان تۇلەپ ۇشقانىن, ول سول كەزدەگى اۋىلداردا ءبىلىم بەرۋدىڭ دۇرىس بولعانىن ايتىپ, سوندىقتان اۋىلداردا بولاشاق كوشباسشىلاردىڭ ءوسىپ شىعۋىنا جاعداي جاساۋ كەرەكتىگىن اتاپ ءوتتى. ونىڭ ايتۋىنشا, بۇل دا پارتيانىڭ العا قويعان مىندەتتەرىنىڭ ءبىرى, ەلباسىنىڭ تاپسىرماسىمەن ەلدى مەكەندەردە ينفراقۇرىلىمدى دامىتۋ ءۇشىن «اۋىل – ەل بەسىگى» جوباسى باستاۋ الادى.
سونداي-اق Nur Otan پارتياسى Jas Otan جاستار قاناتىنىڭ اتقارۋشى حاتشىسى ءداۋلەت كارىبەك «ديپلوممەن – اۋىلعا!» باعدارلاماسىمەن 54 مىڭ جاس اۋىلعا جۇمىسقا بارعانىن, 17 ايماقتا ءبىلىم ورتالىقتارى اشىلعانىن ايتىپ, بۇل ساۋالدىڭ جاۋابىن ناقتىلاي ءتۇستى.
جاستاردىڭ جۇمىسسىزدىققا تاپ بولماۋىنىڭ ايقىن جولى – باسەكەگە قابىلەتتى مامان بولۋ. «بولاشاق» باعدارلاماسىمەن شەتەلدە وقىپ كەلگەن STEM اكادەمياسىنىڭ نەگىزىن قالاۋشى ءابۋتالىپ ءمۇتالى ءىت سالاسىندا اۋقىمدى جوبالارى بارىن, بىراق بۇل سالادا ماماندار جەتىسپەيتىنىن ايتتى.
– وسى تۇرعىدا مەن مىناداي ۇسىنىس جاساعىم كەلەدى. جۇمىسقا جاستاردى كوپتەپ تارتۋ ءۇشىن بەلگىلى ءبىر مەكەمەدە جاستاردىڭ ۇلەسى 30-40 پايىزدان اسسا, سالىقتى تومەندەتۋ كەرەك. سوندا ءبىراز قۇرىلىمدار جاس مامانداردى وزدەرى دايىنداپ الار ەدى. ءجانە بۇنى جۇزەگە اسىرۋدى قاپتاعان قۇجات تولتىرتىپ قيىنداتپاۋ كەرەك, – دەدى ءىت مامانى.
اڭگىمە تەحنولوگيا سالاسىنا قاراي ويىسقاندا, سوزگە «Qazaqstan» تەلەارناسىنىڭ جۇرگىزۋشىسى ايگەرىم ەسەنالى قوسىلىپ, ورتاعا «بۇگىنگى كۇننىڭ قاھارماندارى كىمدەر؟» دەگەن سۇراق تاستادى. بۇعان پارتيا توراعاسىنىڭ ءبىرىنشى ورىنباسارى «100 جاڭا ەسىم» جوباسىنىڭ كوزدەگەنى ءوز ەركىمەن جەتىستىككە جەتكەن بۇگىنگى كۇننىڭ قاھارماندارىن تاۋىپ, ولاردى حالىق اراسىندا دارىپتەۋ ەكەنىن ايتىپ, جاۋاپ قاتتى.
جوبالار جونىندە ءسوز قوزعالعاندا فورۋم تۋرالى پىكىرلەر قىلاڭ بەردى. بۇل تۇرعىدا پرەزيدەنت ق.توقاەۆتىڭ ءسوزىن باسشىلىققا الىپ, جاستار جىلى جالاڭ ناۋقانعا اينالىپ كەتپەسىن دەگەن ماسەلە كوتەرىلدى. ۆيتسە-مينيستر جۇلدىز وماربەك جاستار جىلىنا ارنالعان جول كارتاسى 86 تارماقتان تۇرسا, ونىڭ ىشىندە تەك بەسەۋى عانا فورۋم ەكەنىن كەلتىردى. بىراق ونىڭ ىشىندە جاستاردىڭ ءبىلىمىن ۇشتاۋعا باعىتتالعان ماڭىزدى فورۋمدار بار ەكەن. مىسالى, «Zeren 2019» جوباسى 900 جاستى وقىتپاق.
سونىمەن قاتار بۇل وتىرىستا Nur Otan پارتياسى ءباسپاسوز قىزمەتىنىڭ جەتەكشىسى ماكسيم سپوتكاي الەۋمەتتىك جەلىلەردەگى جاستاردىڭ بەلسەندىلىگىنە توقتالدى. ونىڭ ايتۋىنشا, قازىر قوعامنىڭ باستى وقيعالارى تەك Facebook, Twitter, ودان قالسا Instagramm جەلىسىندە تالقىلانادى. ال جاستاردىڭ دەنى ۆكونتاكتە جەلىسىن پايدالانادى, وندا نەگىزىنەن ورىسشا مازمۇن كورىنىس بەرەدى. سوندىقتان بارلىق الەۋمەتتىك جەلىلەردە قازاقشا كونتەنتتىڭ ساپاسىن ارتتىرۋ كەرەك دەگەندى ايتتى.
ءسوز سوڭىندا «جاستار ءتاربيەسىمەن كىم اينالىسىپ جاتىر؟» دەگەن ورتاق ساۋال توڭىرەگىندە وتىرىسقا قاتىسۋشىلاردىڭ ارقايسىسى جاستار بولاشاعى جونىندە ءبىر-ءبىر سوزىمەن ويلارىن تۇيىندەدى.