ۇكىمەتارالىق كەڭەس وتىرىسىنىڭ كۇن تارتىبىندە وداققا مۇشە مەملەكەتتەر اراسىنداعى ساۋدا-ەكونوميكالىق ىنتىماقتاستىق جانە ءوزارا ساۋدا-ساتتىقتى كەڭەيتۋ, سونداي-اق ەاەو ىشكى نارىعى اياسىنداعى كەدەرگىلەردى جويۋعا قاتىستى 13 ماسەلە قارالدى.
شاعىن قۇرامدا ۇكىمەت باسشىلارى وداقتى دامىتۋدىڭ بىرقاتار تۇجىرىمدامالىق ماسەلەلەرى جونىندە پىكىر الماستى. ەاەو تسيفرلىق ترانسفورماتسيالاۋ اياسىندا ترانسشەكارالىق ءوزارا ءىس-قيمىلدى تەرەڭدەتۋ, قاتىسۋشى ەلدەر اراسىنداعى تاۋار اينالىمىنىڭ كولەمىن ۇلعايتۋ سالاسىنداعى ىنتىماقتاستىق, كەدەندىك اكىمشىلىكتى جەتىلدىرۋ تەتىكتەرى تالقىلاندى.
كەڭەيتىلگەن كەلىسسوزدەر «بىرىڭعاي تەرەزە» قاعيداتى بويىنشا سىرتقى ەكونوميكالىق قىزمەتتى رەتتەۋدى جەتىلدىرۋ ماسەلەلەرىنە, ەاەو ساۋداسىنىڭ تسيفرلىق ەكوجۇيەسىن دامىتۋعا جاعداي جاساۋ, ونەركاسىپتىك كووپەراتسيانى جانە تەحنولوگيالار ترانسفەرىن دامىتۋ, ەكونوميكانىڭ جەكەلەگەن سالالارىندا ينتەگراتسيالىق الەۋەتتى ودان ءارى ۇلعايتۋ ماسەلەلەرىنە ارنالدى.
تاراپتار 2018 جىلدىڭ قورىتىندىسى بويىنشا ەاەو ماڭىزدى الەۋمەتتىك-ەكونوميكالىق كورسەتكىشتەرىنىڭ وڭ قارقىنىن اتاپ ءوتتى. وداق ەلدەرىنىڭ ءجىو ءوسىمى 2,5%, ونەركاسىپتىك ءوندىرىس ءوسىمى 3,1% قۇرادى. ەاەو-دا وتكەن جىلى ءوزارا ساۋدا كولەمى 9,2% ءوستى, سىرتقى ساۋدادا دا وسىنداي ءۇردىس بايقالادى, وندا جىل قورىتىندىسى بويىنشا ءوسىم 18,8% قۇرادى.
قازاقستان پرەمەر-ءمينيسترى ا. مامين ءوز سوزىندە الەمدىك ەكونوميكانىڭ قۇبىلىپ تۇرعان شاعىندا دامۋدىڭ وڭ قارقىنىن ساقتاۋ ءۇشىن بارلىق كۇش-جىگەر سالۋ قاجەتتىگىن اتاپ ءوتتى. بۇگىندە وداققا قاتىسۋشى بارلىق ەلدەرمەن ءوزارا ساۋداداعى كەدەرگىلەردى جويۋ ءۇشىن بەلسەندى بىرلەسكەن جۇمىستار جۇرگىزىلىپ جاتىر. تاجىريبە كورسەتكەندەي, جاڭا كەدەرگىلەر بايقالۋدا, بۇل ءوز كەزەگىندە بۇدان دا تىعىز ەكونوميكالىق قاتىناستاردى دامىتۋدىڭ ينديكاتورى بولىپ تابىلادى.
«بىزگە قارقىنىمىزدى تومەندەتپەۋ كەرەك», — دەدى اسقار مامين. — قازىرگى كەدەرگىلەردى جويۋ ءوزارا ساۋدا كولەمىن ۇلعايتىپ, ەلدەر اراسىنداعى ەكونوميكالىق بايلانىستاردى كەڭەيتۋگە مۇمكىندىك بەرەدى».
قازاقستاندىق تاراپ ەاەو اياسىندا سايكەستەندىرۋ قۇرالدارى ارقىلى تاۋارلاردى تاڭبالاۋ بويىنشا ينتەگراتسيالىق ىنتىماقتاستىق ماسەلەلەرىن رەتتەۋدى جەتىلدىرۋ قاجەتتىگىنە, ترانزيتتىك تاسىمالداردى قاداعالاۋ جۇيەسىن ەنگىزۋگە, كەدەندىك اكىمشىلىكتى كۇشەيتۋگە, تسيفرلىق ساۋدانى دامىتۋعا, وداقتىڭ دەرەكتەر ءترانزيتى سالاسىنداعى ترانزيتتىك الەۋەتىن ارتتىرۋعا نازار اۋداردى.
«ءوزارا پايدا, ىمىراعا كەلۋ جانە بارلىق تاراپتاردىڭ مۇددەلەرىن ەسكەرەتىن ءتيىمدى شەشىمدەر شىعارۋ قاعيداتتارىنىڭ نەگىزىندە ءوزارا قارىم-قاتىناستارىمىزدى قالىپتاستىرۋ ەاەو ودان ءارى نىعايتۋعا بەلسەنە ىقپالىن تيگىزەتىن بولادى», — دەدى اسقار مامين. — 2025 جىلعا دەيىن ەۋرازيالىق ەكونوميكالىق ينتەگراتسيانى دامىتۋدا ءبىز ءۇشىن باستى شارت — ەكونوميكالىق كومپونەتتىڭ بولۋى».
وتىرىس قورىتىندىسى بويىنشا «ەۋرازيالىق ونەركاسىپ كووپەراتسيا, سۋبكونتراكتاتسيا جانە تەحنولوگيالار ترانسفەرى جەلىسى» جوباسىن ىسكە اسىرۋ تۋرالى, وداقتىڭ ىشكى نارىعىنىڭ جۇمىسى اياسىندا كەدەرگىلەردى جويۋ بويىنشا جۇمىستار بارىسى تۋرالى, ەاەو-تا تسيفرلىق ساۋدا ەكوجۇيەسىن دامىتۋ ءۇشىن جاعدايلار جاساۋ تۋرالى, سىرتقى ەكونوميكالىق قىزمەتتى رەتتەۋ جۇيەسىندە «بىرىڭعاي تەرەزە» ۇلتتىق تەتىگىنىڭ ەتالوندىق ۇلگىسىن سيپاتتاۋ تۋرالى, تاۋارلاردى اكەلۋ مەن شىعارۋدا شىققان ەلىن انىقتاۋدا بىرىڭعاي تاسىلدەردى بەكىتۋ تۋرالى بىرقاتار قۇجاتتارعا قول قويىلدى.
ەۋرازيالىق ۇكىمەتارالىق كەڭەستىڭ كەلەسى وتىرىسى بيىل 9 تامىزدا شولپان اتا قالاسىندا (قىرعىزستان رەسپۋبليكاسى) وتەدى.