براسس ادىسىمەن 200 مەترگە ءجۇزۋ سايىسىندا بەرىلگەن قاشىقتىقتى 2:09.37 ۋاقىتىمەن ءجۇزىپ وتكەن ءبىزدىڭ سپورتشى ءتورتىنشى ناتيجەنى كورسەتتى. ا ءنورماتيۆىنىڭ ۋاقىتى - 2:10.35. وسىلايشا قازاقستاندىق سپورتشى وسى جەتىستىگىنىڭ ارقاسىندا توكيوداعى وليمپيادا ويىندارىنا جولداما الدى.
وسى قاشىقتىقتا 2016 جىلعى وليمپيادا ويىندارىنىڭ قولا جۇلدەگەرى رەسەيلىك انتون چۋپكوۆ 2:07.48 ۋاقىتىمەن جەڭىمپاز اتاندى. ەكىنشى ورىندا قىتايلىق تسين حايان. ونىڭ ۋاقىتى - 2:08.31. جاپونيالىق يپپەي ۆاتانابە 2:09.33 كورسەتكىشىمەن ءۇشىنشى ورىن الدى.
دميتري بالاندين سونداي-اق 4ح100 مەتر ارالاس ەستافەتاسىنا قاتىستى. بۇل سايىستا ول قولا مەدال يەلەندى.
«Swim Series ءتۋرنيرىنىڭ العاشقى كەزەڭىنەن ۇلكەن اسەر الدىم. شوۋ وتە جوعارى دەڭگەيدە ەكەنىن كورىنىپ تۇر. سپورتشىلارعا دا, جانكۇيەرلەرگە دە وتە قىزىقتى. وسى جارىس ارقىلى وليمپيادا ويىندارىنا دايىندالىپ جاتىرمىن. تۋرنيرگە قاتىسىپ جاتقان الەمنىڭ ۇزدىك سپورتشىلارىمەن جارىسۋ مۇمكىندىگى تۋعانىنا قۋانىشتىمىن. 200 مەترگە براسس ادىسىمەن ءجۇزۋ جانە ەستافەتا سايىسىنا قاتىستىم. ەستافەتاعا قاتىساتىن كوماندالار جەرەبە ارقىلى جاساقتالدى. مەنىمەن بىرگە رەسەيلىك سپورتشى جانە اۆستراليا مەن ۇلىبريتانيانىڭ جۇزۋشىلەرى بولدى. جەڭىسكە جەتۋگە دە بولۋشى ەدى, ءسال عانا قارسىلاستارعا ەسە جىبەرىپ قويدىق»,- دەدى بالاندين.
ايتا كەتەيىك, بۇل تۋرنيرگە نورماتيۆتەردى ورىنداۋ ارقىلى قاتىسۋ مۇمكىندىگى جوق, تەك ۇزدىكتەر ارنايى شاقىرتۋمەن باعىن سىناي الادى. جارىسقا وليمپيادا چەمپيوندارى, الەم چەمپيوناتتارىنىڭ جەڭىمپازدارى, رەكوردشىلار مەن FINA-نىڭ بىلتىرعى رەيتينگىنىڭ كوشباسشىلارى عانا قاتىسىپ جاتىر.
بىرەگەي ءتۋرنيردىڭ ەكىنشى كەزەڭى 11 مامىردا بۋداپەشت قالاسىندا وتەدى. الەمدىك سەريانىڭ سوڭعى كەزەڭى 31-مامىر مەن 1-ماۋسىم ارالىعىندا اقش-تىڭ يندياناپوليس قالاسىندا بولادى.