– 9 ماۋسىمدا ەلىمىزدە اسا ماڭىزدى ساياسي وقيعا بولادى. قازاقستان تاۋەلسىزدىگىن العان شيرەك عاسىردان اسا ۋاقىتتان بەرى بۇل ەل تاريحىنداعى پرەزيدەنت سايلايتىن التىنشى سايلاۋ بولىپ وتىر. سول جىلداردىڭ بارلىعىندا ەلباسى نۇرسۇلتان نازارباەۆتىڭ باسشىلىعىمەن ەل زور تابىسقا جەتتى, دامىدى, كوركەيدى. نۇرسۇلتان ءابىش ۇلى ەلدىڭ ءبىرلىگىن بارلىق تابىستاردىڭ كەپىلى دەپ ءبىلدى. 2019 جىلدىڭ 19 ناۋرىزىندا ول وكىلەتتىگىن اياقتاپ, بيلىكتى قاسىم-جومارت توقاەۆقا تاپسىردى. ءبۇگىنگى مەملەكەت باسشىسى قاسىم-جومارت توقاەۆ بارلىق ءتيىستى زاڭدارعا سايكەس كەزەكتەن تىس پرەزيدەنتتىك سايلاۋدى بەلگىلەدى. ال ءاربىر قازاقستاندىق وسى ساياسي وقيعانىڭ جاۋاپكەرشىلىگىن ءبىر ادامداي ءتۇسىنۋى ءتيىس, – دەدى قالقامان جاقىپ.
ودان كەيىن وبلىستاعى كورەي قوعامدىق بىرلەستىگى ءتوراعاسىنىڭ ورىنباسارى ۋليانا كيم فورۋمعا جينالعانداردى الدىمىزداعى سايلاۋعا ءبىر كىسىدەي قاتىسۋعا شاقىردى.
– ەلىمىزدەگى كەزەكتەن تىس سايلاۋ دامۋىمىزعا, ءوزىمىزدىڭ ازاماتتىق ۇستانىمىمىزدى بىلدىرۋگە سەرپىن بەرەدى. نۇرسۇلتان ءابىش ۇلى ايتقانداي, ەلىمىزدىڭ الدىندا شەشىمىن كۇتكەن كوپتەگەن ماسەلە, تاپسىرما بار. سولاردىڭ بارلىعى دا حالىقتىڭ بىرلىگى بولماي, دۇرىس شەشىمىن تاپپايدى. سوندىقتان جاستار, سىزدەر سايلاۋعا پاتريوتتىقپەن قاتىسىپ, ءوز تاڭداۋلارىڭىزدى جاساۋلارىڭىز كەرەك. ءبىزدىڭ بارلىعىمىزدىڭ مەملەكەت, وتان الدىنداعى ادال پارىزىمىز وسى, – دەدى ۋليانا كيم. سونىمەن قاتار ەتنومادەني بىرلەستىكتەر جاستار قاناتىنىڭ وكىلدەرى, رەسپۋبليكالىق «جاڭعىرۋ جولى» جاستار قوزعالىسىنىڭ بەلسەندىلەرى, شىعارماشىلىق ۇجىمدار ەلىمىزدەگى ساياسي ماڭىزدى وقيعانىڭ جاۋاپكەرشىلىگىن ءتۇسىنىپ, كەزەكتەن تىس پرەزيدەنتتىك سايلاۋعا قاتىساتىندىقتارىن ايتتى جانە وزگەلەردى دە وسىعان شاقىردى. قوستاناي