مەملەكەت باسشىسى ەڭ اۋەلى الاشتىڭ رۋحاني استاناسى – سەمەيگە كەلىپ, قازاق يننوۆاتسيالىق گۋمانيتارلىق-زاڭ ۋنيۆەرسيتەتىندە قالا جۇرتشىلىعىمەن, زيالى قاۋىم وكىلدەرىمەن كەزدەسىپ, شاھاردىڭ الەۋمەتتىك-ەكونوميكالىق دامۋ ماسەلەلەرىن تالقىلادى. كەزدەسۋ بارىسىندا قاسىم-جومارت توقاەۆ «رۋحاني جاڭعىرۋ» باعدارلاماسى اياسىندا ەلىمىزدە اتقارىلىپ جاتقان ماڭىزدى جۇمىستارعا توقتالدى. «قازاق جازۋىن لاتىن گرافيكاسىنا بىرتىندەپ كوشىرۋدى باستادىق. بۇل – قازاق ءتىلىن عىلىم مەن تەحنيكانىڭ تىلىنە بەيىمدەپ, مەملەكەتتىك ءتىلىمىزدىڭ مارتەبەسىن ارتتىرۋ ءۇشىن جاسالعان ۇلكەن قادام. «تۋعان جەر» جوباسى اياسىندا مەتسەناتتاردىڭ قارجىسىنا 600-دەن استام الەۋمەتتىك نىسان سالىندى. وسىنداي بەرەكەلى باستامالار ءاربىر وڭىردە جالعاسىن تابۋى كەرەك», دەدى قازاقستان پرەزيدەنتى.
مەملەكەت باسشىسى حالقىمىزدىڭ تاريحتان تاعىلىم الىپ, ۇلى بابالارىمىزدى ءاردايىم ۇلىقتاي بىلگەنىن ايتىپ, ۇلى ابايدىڭ مۇراسى «رۋحاني جاڭعىرۋدىڭ» ماڭىزدى باعدارىنا اينالۋى قاجەت ەكەندىگىن اتاپ ءوتتى. «الداعى جىلى اباي قۇنانباي ۇلىنىڭ تۋعانىنا 175 جىل تولادى. وسى ايتۋلى داتانى ءبىز تۇتاس ەل بولىپ, مەملەكەتتىك دەڭگەيدە اتاپ ءوتۋىمىز كەرەك. ءبىز ءۇشىن بۇل مەرەيتويدىڭ ماڭىزى ەرەكشە. تاريحي داتانى اقىل-پاراساتپەن, ساليقالى دەڭگەيدە وتكىزۋگە باسا ءمان بەرۋ كەرەك. نەگىزگى ماقسات – دانا ابايدىڭ تاعىلىمىن جاستاردىڭ ساناسىنا ءسىڭىرۋ, ۇلى تۇلعانىڭ وي-تولعامدارىن كەڭىنەن دارىپتەۋ. ۇكىمەتكە ابايدىڭ مەرەيتويىنا قاجەتتى شارالار ازىرلەۋدى تاپسىرامىن», دەدى قاسىم-جومارت توقاەۆ.
پوليگون زاردابىن تارتقان ازاماتتارعا جاسالاتىن جەڭىلدىك لايىقتى دەڭگەيدە بولۋى كەرەك
قازاقستان پرەزيدەنتى سەمەي جەرىنىڭ ۇزاق جىلدار بويى يادرولىق سىناقتىڭ تاۋقىمەتىن تارتقان ءوڭىر ەكەنىنە توقتالىپ, پوليگون زۇلماتى 500 مىڭ ادامنىڭ ءومىرى مەن تاعدىرىنا تىكەلەي زاردابىن تيگىزگەنىن ايتتى. «تۇڭعىش پرەزيدەنتىمىز نۇرسۇلتان ءابىش ۇلى نازارباەۆتىڭ قاجىرلى ەڭبەگى مەن ەرىك-جىگەرىنىڭ ارقاسىندا سەمەي پوليگونى ءبىرجولا جابىلدى. بۇل وقيعانى الەم جۇرتشىلىعى تەڭدەسسىز ەرلىك دەپ باعالادى. ەلباسى – جاھاندىق يادرولىق قارۋعا قارسى قوزعالىستىڭ كوشباسشىسى. تۇڭعىش پرەزيدەنتىمىزدىڭ ۇلى شەشىمى حالقىمىزدىڭ جادىندا ماڭگى ساقتالادى», دەدى مەملەكەت باسشىسى.
بۇل رەتتە قاسىم-جومارت توقاەۆ پوليگون زاردابىن تارتقان ازاماتتارعا جاسالاتىن جەڭىلدىك لايىقتى دەڭگەيدە بولۋى قاجەت ەكەنىنە باسا ءمان بەرىپ, قازىر «سەمەي پوليگونىنداعى يادرولىق سىناقتىڭ تاۋقىمەتىن تارتقان تۇرعىنداردى قورعاۋ جانە وڭالتۋعا ارنالعان بۇعان دەيىنگى شارالاردىڭ تيىمدىلىگى» جونىندە ارنايى زەرتتەۋ جۇرگىزىلىپ جاتقانىن جەتكىزدى. «پوليگوننىڭ سالدارىنان ءتۇرلى دەرتكە شالدىققان ازاماتتاردى ءتيىستى دەڭگەيدە ەمدەۋمەن قاتار, ولارعا وڭالتۋ قىزمەتىن كورسەتۋ مۇمكىندىكتەرىن دە قاراستىرۋ قاجەت. سەمەيدە جانە وسى وڭىرگە قاراستى اۋىلداردا 1300-دەن استام مۇمكىندىگى شەكتەۋلى بالا بار. قاجەتتى جاعداي جاسالماعان تار عيماراتتا ورنالاسقان وڭالتۋ ورتالىعى ءبىر ۋاقىتتا 35 بالا عانا قابىلداي الادى. بۇل – شىندىق. مۇنداي جاعداي مۇلدە سىن كوتەرمەيدى. وبلىس اكىمىنە ماسەلەنى دەرەۋ قولعا الىپ, ءتيىستى شارالار قابىلداۋدى تاپسىرامىن», – دەدى قازاقستان پرەزيدەنتى.
سونىمەن قاتار مەملەكەت باسشىسى اتوم ەلەكتر ستانساسىن سالۋ ماسەلەسى قوعامدا قىزۋ تالقىعا ءتۇسىپ جاتقانىن ايتتى. «بۇل – كۇردەلى ماسەلە. 2030 جىلى قازاقستاندا ەلەكتر ەنەرگياسىنىڭ جەتىسپەۋشىلىگى بايقالۋى مۇمكىن. سوندىقتان وسى ماسەلەنى قازىر شەشۋىمىز قاجەت. دەگەنمەن, كوپشىلىكتىڭ پىكىرىن ەسكەرمەي, اتوم ەلەكتر ستانساسىن سالۋ تۋرالى شەشىم قابىلداۋعا بولمايدى. بۇگىندە بۇل ستانسانىڭ قاۋىپسىزدىگىن قامتاماسىز ەتە الاتىن كوپتەگەن تەحنولوگيا بار. سونىمەن قاتار اەس جاڭا جۇمىس ورىندارىن اشىپ, قازاقستاننىڭ ەنەرگەتيكالىق دەربەستىگىن قامتاماسىز ەتە الاتىنىن ەسكەرگەن ءجون», دەدى قاسىم-جومارت توقاەۆ.
بۇدان بولەك, قازاقستان پرەزيدەنتى سەمەي قالاسىنىڭ بۇگىنگى جاعدايىنا بايلانىستى جۇزەگە اسىرىلاتىن بىرقاتار مىندەتتەردى اتاپ ءوتتى. «قالانىڭ ءار كوشەسى مەن عيماراتىندا تاريحتىڭ سالعان ءىزى بار. كونە عيماراتتاردىڭ تاريحي جانە باستاپقى بەينەسىن ساقتاپ قالۋ – وتە ماڭىزدى مىندەت. ءبىز ۇلى اباي تۋرالى ايتقاندا, ونىڭ اكەسى – قۇنانبايدىڭ ەل تاريحىنداعى ەڭبەگىن ۇمىتپاۋىمىز قاجەت. سوندىقتان الداعى ۋاقىتتا وبلىس اكىمدىگى قۇنانبايدىڭ ەسىمىن ۇلىقتاۋعا بايلانىستى ءتيىستى شارالار قابىلداۋ مۇمكىندىگىن قاراستىرۋى كەرەك», دەدى مەملەكەت باسشىسى.
سەمەيدى دامىتۋدىڭ ارنايى باعدارلاماسى ازىرلەندى
قاسىم-جومارت توقاەۆ 2017 جىلى سەمەي قالاسىن الەۋمەتتىك-ەكونوميكالىق تۇرعىدان دامىتۋدىڭ بەس جىلدىق كەشەندى باعدارلاماسىنىڭ اياقتالعانىن ايتىپ, تۇرعىنداردىڭ تۇرمىس ساپاسىن لايىقتى ارتتىرۋ نەگىزگى مىندەتتەردىڭ ءبىرى بولىپ قالا بەرەتىنىن جەتكىزدى. «قازىرگى كەزدە 350 مىڭ حالقى بار قالانىڭ جىلدىق بيۋدجەتى 56,6 ميلليارد تەڭگە. سوندىقتان وبلىس باسشىلىعىنا سەمەي قالاسىن دامىتۋدىڭ 2025 جىلعا دەيىنگى ارنايى باعدارلاماسىن ازىرلەۋدى تاپسىرامىن. بۇل ورتا مەرزىمدى پەرسپەكتيۆاعا جوسپارلانعان شاھاردى وركەندەتۋدىڭ مىندەتتەرىن جانداندىرۋعا مۇمكىندىك بەرەدى», دەدى قازاقستان پرەزيدەنتى.
سونىمەن بىرگە مەملەكەت باسشىسى وبلىس باسشىلىعىنا قالاداعى شاعىن جانە ورتا بيزنەستى قولداۋعا ەرەكشە ءمان بەرۋ قاجەتتىگىن اتاپ ءوتىپ, بۇل شارا جاڭا جۇمىس ورىندارىن اشۋعا جانە تۇرعىنداردىڭ تابىسىن ايتارلىقتاي ارتتىرۋعا سەپتىگىن تيگىزەتىنىن ايتتى. قاسىم-جومارت توقاەۆ قالاداعى كوپىرلەر مەن جولداردىڭ جاعدايى تۇرعىنداردى مازالايتىن تاعى ءبىر وزەكتى ماسەلە ەكەنىنە توقتالدى. «بۇگىندە قالاداعى ءۇش كوپىردىڭ ەكەۋى جوندەۋدى قاجەت ەتەدى. سونىمەن قاتار شاھارداعى جولداردىڭ 20 پايىزىنان استامىنىڭ جاعدايى ناشار. ينفراقۇرىلىمنىڭ بۇل پروبلەمالارى شۇعىل شەشىم قابىلداۋدى تالاپ ەتەدى», – دەدى مەملەكەت باسشىسى.
مەملەكەت باسشىسى جۇمىس ساپارى اياسىندا «100 مەكتەپ – 100 اۋرۋحانا» باعدارلاماسىمەن سالىنعان جەدەل مەديتسينالىق جاردەم اۋرۋحاناسىنىڭ جۇمىسىمەن تانىستى. قاسىم-جومارت توقاەۆقا مەديتسينالىق مەكەمەنىڭ ەمدەۋ-ساۋىقتىرۋ, وتا جاساۋ بولمەلەرى كورسەتىلىپ, نەگىزگى قىزمەت باعىتى جونىندە مالىمەت بەرىلدى. جالپى اۋماعى 44,5 مىڭ شارشى مەتر بولاتىن اۋرۋحانادا 800-دەن استام قىزمەتكەر جۇمىس ىستەيدى. ءبىر ۋاقىتتا 345 ناۋقاستى قابىلداپ, العاشقى مەديتسينالىق قىزمەت كورسەتە الادى. قازاقستان پرەزيدەنتى جەدەل مەديتسينالىق جاردەم اۋرۋحاناسىنىڭ قىزمەتكەرلەرىمەن اڭگىمەلەسۋ بارىسىندا وڭىردە مامانداندىرىلعان جوعارى تەحنولوگيالىق مەديتسينالىق مەكەمەلەردىڭ, رەسپۋبليكالىق عىلىمي ورتالىقتاردىڭ بولىمشەلەرىن اشۋ جونىندە اۋقىمدى جۇمىستار جۇرگىزىلىپ جاتقانىن ايتتى. دەنساۋلىق ساقتاۋ سالاسىن تولىقتاي تسيفرلاندىرۋدىڭ ماڭىزدىلىعىنا توقتالدى.
مەملەكەت باسشىسىنىڭ سەمەيدەگى جۇمىس ساپارى وبلىس بيۋدجەتى ەسەبىنەن سالىنىپ جاتقان «اباي ارەنا» مادەني-سپورت كەشەنىنىڭ قۇرىلىسىمەن تانىسۋمەن تۇيىندەلدى. نىساننىڭ جالپى اۋماعى – 33,8 مىڭ شارشى مەتر. كەشەن وسى جىلدىڭ سوڭىندا پايدالانۋعا بەرىلەدى. شارا بارىسىندا قازاقستان پرەزيدەنتىنە «قاراعايلى» تۇرعىن اۋدانىنىڭ جوباسى تانىستىرىلدى. 25,4 مىڭ ادامعا ارنالعان تۇرعىن اۋداننىڭ اۋماعى – 787,7 مىڭ شارشى مەتر. بيىل 13 ءۇي پايدالانۋعا بەرىلىپ, 800-دەن استام وتباسى باسپانالى بولادى. 710 ەلدى مەكەننىڭ جارتىسى اۋىز سۋسىز وتىر
قاسىم-جومارت توقاەۆ سەمەيدەن سوڭ وبلىس ورتالىعى – وسكەمەنگە كەلىپ, شىعىس قازاقستان مەملەكەتتىك تەحنيكالىق ۋنيۆەرسيتەتىندە جۇرتشىلىقپەن جۇزدەستى. بۇل جيىنعا وبلىسىمىزداعى ىرگەلى كاسىپورىندار مەن قوعامدىق ۇيىمداردىڭ وكىلدەرى, كاسىپكەرلەر مەن جاستار قاتىستى. «بۇگىن اسقار التايدىڭ باۋىرىندا سىزدەرمەن جۇزدەسىپ وتىرعانىما وتە قۋانىشتىمىن. شىعىس قازاقستان – ەلىمىزدىڭ التىن ءتاجى. بۇل ايماق بۇكىل ەۋرازيا حالىقتارىنىڭ تاريحىندا ەرەكشە ورىن الادى. قويناۋى قازىناعا تولى كەندى التايدىڭ ونىمدەرى بۇگىندە الەمگە تانىمال. ءوندىرىسى ورگە باسقان ءوڭىردى ەلباسى ۇدايى نازارىندا ۇستاپ كەلەدى. سوندىقتان العاشقى ساپارلارىمنىڭ ءبىرىن وسى قاسيەتتى ولكەگە ارناپ وتىرمىن. جاڭا عانا ءبىز جيدەبايعا بارىپ, اباي, شاكارىم رۋحىنا تاعزىم ەتتىك», دەدى قازاقستان پرەزيدەنتى جيىندى اشقان سوزىندە.
قاسىم-جومارت توقاەۆ جۇرتشىلىققا ارنالعان سوزىندە وبلىستىڭ نەگىزگى الەۋمەتتىك-ەكونوميكالىق كورسەتكىشتەرىنە توقتالدى. «وتكەن جىلدىڭ قورىتىندىسى بويىنشا ونەركاسىپ ءوندىرىسىنىڭ كولەمى 9,3 پايىزعا ارتقان. 2015-2018 جىلدارداعى يندۋستريالاندىرۋ باعدارلاماسىنىڭ اياسىندا 19 جوبا جۇزەگە اسىرىلىپ, 3,5 مىڭ جاڭا جۇمىس ورنى اشىلعان. وبلىس ەكونوميكادا جاقسى كورسەتكىشتەرگە قول جەتكىزىپ قانا قويماي, الەۋمەتتىك سالانى تابىستى دامىتۋ جاعىنان دا ۇلگى كورسەتىپ وتىر. وڭىردەگى مەديتسينالىق مەكەمەلەر زاماناۋي قۇرال-جابدىقتارمەن قامتاماسىز ەتىلگەن. دارىگەرلەر بىلىكتىلىكتەرىن ارتتىرعان. «مەنىڭ مەكتەبىم» جوباسى ارقاسىندا شىعىس قازاقستان رەسپۋبليكاداعى ءىت-سىنىپتارىمەن تولىقتاي قامتىلعان العاشقى ءوڭىر اتاندى. ايماقتا بالعىندار بالاباقشامەن 100 پايىز قامتىلعان. «رۋحاني جاڭعىرۋ» باعدارلاماسى اياسىندا ايماقتا ارحەولوگيا سالاسىندا دا يگى ىستەر اتقارىلۋدا. «تۋعان جەر» جوباسى شەڭبەرىندە مەتسەناتتار قاراجاتىنا كوپتەگەن الەۋمەتتىك نىساندار بوي كوتەرۋدە. ءبىر سوزبەن ايتقاندا, وبلىستىڭ الەۋمەتتىك-ەكونوميكالىق دامۋ كورسەتكىشتەرى اۋىز تولتىرىپ ايتۋعا تۇرارلىقتاي. ءسوزسىز, بۇعان وبلىس اكىمى دانيال احمەتوۆتىڭ سىڭىرگەن ەڭبەگى زور, – دەگەن مەملەكەت باسشىسى وبلىستا قولعا الىنۋى ءتيىس الداعى ماڭىزدى ماقسات-مىندەتتەرگە توقتالدى. «مەن ءۇشىن اكىمدەر جۇمىسىنىڭ باستى كورسەتكىشى – جاڭادان اشىلعان جۇمىس ورىندارىنىڭ سانى, ەڭبەكاقى كولەمى جانە ەڭبەك ەتۋگە جاسالعان جاعداي. وسىعان بايلانىستى وبلىس باسشىلىعىنا اتالعان باعىتتاعى جۇمىستاردىڭ تيىمدىلىگىن تۇبەگەيلى ارتتىرۋدى تاپسىرامىن. بىرنەشە ءىرى وندىرىستىك كاسىپورىننىڭ بولۋى – شىعىس قازاقستاننىڭ ارتىقشىلىعى. شاعىن جانە ورتا بيزنەسپەن بايلانىسىن ارتتىرۋ ءۇشىن ولاردىڭ مۇمكىندىكتەرىن بەلسەندى پايدالانۋ كەرەك», – دەدى پرەزيدەنت.
قازاقستان پرەزيدەنتى ازاماتتاردىڭ ءومىر ءسۇرۋ ساپاسىن ارتتىرۋدى باسىم باعىتتاردىڭ ءبىرى رەتىندە اتادى. «بۇگىندە وبلىستاعى 710 ەلدى مەكەننىڭ جارتىسىنان ءسال عانا اساتىن بولىگى ورتالىقتاندىرىلعان اۋىز سۋمەن قامتىلعان. ناقتى ايتساق, 54 پايىز. وڭىرلەردى دامىتۋ باعدارلاماسىنا سايكەس 2020 جىلعا قاراي اۋىلداردىڭ 80 پايىزىنا تازا اۋىز سۋ جەتكىزىلۋى كەرەك», دەدى مەملەكەت باسشىسى. الاكولگە باراتىن جول تەز ارادا جوندەلۋى ءتيىس
قاسىم-جومارت توقاەۆ وڭىردەگى تۋريستىك ينفراقۇرىلىمدى دامىتۋعا باسا نازار اۋدارۋ قاجەتتىگىن ايتتى. «قازىرگى جاعدايدا تۋريزم يندۋسترياسى ەكونوميكالىق ءوسىمنىڭ ماڭىزدى درايۆەرى ءارى جاڭا جۇمىس ورىندارىن اشۋعا مۇمكىندىك بەرەدى. ءتۋريزمدى دامىتۋ مەملەكەتتىك باعدارلاماسى اياسىندا جىلىنا 2 ميلليوننان استام تۋريست تارتا الاتىن الاكول جاعالاۋى 10 نەگىزگى تۋريستىك ورتالىقتىڭ قاتارىنا ەندى. بىلتىر كوپتەگەن قازاقستاندىق الاكولدە دەمالۋدى ءجون كورگەن, الايدا ولارعا ساپاسىز قىزمەت كورسەتىلگەن. حالىق جەرگىلىكتى اۆتوموبيل جولدارىنىڭ توزىپ كەتكەنىنە شاعىمداندى. وسىعان بايلانىستى شىعىس قازاقستان مەن الماتى وبلىستارىنىڭ اكىمدەرىنە جەرگىلىكتى جولداردى جوندەۋ, قىزمەت كورسەتۋ ساپاسىنىڭ دەڭگەيىن كوتەرۋ ماسەلەلەرىن تەز ارادا شەشۋدى تاپسىرامىن», دەدى قازاقستان پرەزيدەنتى. مەملەكەت باسشىسى وڭىردەگى كيەلى ورىندار تۋريستەر مەن قاراپايىم ازاماتتارعا قولجەتىمدى بولۋىن ەرەكشە اتاپ ءوتتى. « ۇلى اباي تۋعان جيدەبايعا ايرىقشا مارتەبە بەرۋ قاجەت. رەسەيدە – پۋشكين, ۇلىبريتانيادا – شەكسپير, گەرمانيادا گەتەگە تاعزىم ەتەتىنى سەكىلدى, بۇل جەر ەڭ تانىمال, حالىق ەڭ كوپ باراتىن ورىنعا اينالۋى كەرەك. وسى رەتتە مادەنيەت جانە سپورت مينيسترلىگىنە, وبلىس اكىمدىگىنە ءتيىستى شارالار قابىلداۋدى تاپسىرامىن», دەدى قاسىم-جومارت توقاەۆ.
مەملەكەت باسشىسى وڭىردەگى ەكولوگيالىق جاعدايدى جاقسارتۋعا جان-جاقتى توقتالدى. «سەمەي پوليگونىنىڭ بىزگە قانداي زارداپ اكەلگەنىن ەشقاشان ۇمىتپايمىز. يادرولىق قارۋدىڭ سىناقتارى ءبىزدىڭ جەرىمىز بەن تابيعاتىمىزعا ورنى تولماس اپات اكەلدى. ءبىزدىڭ ەلىمىز سەمەي پوليگونىن جاۋىپ, الەمدەگى يادرولىق قارۋعا قارسى قوزعالىستا كوشباسشى بولدى. الايدا, سول سىناقتاردىڭ اۋىر زارداپتارى ءالى كۇنگە ءبىزدىڭ ازاماتتارىمىزدىڭ دەنساۋلىعىنا زيانىن تيگىزۋدە. مەنى اسىرەسە, قان اينالىمى جۇيەسى مەن قاتەرلى ىسىك اۋرۋلارىنىڭ كوبەيىپ كەتكەنى قاتتى الاڭداتادى. بۇل اۋرۋلار بويىنشا وبلىستاعى كورسەتكىش رەسپۋبليكالىق ورتاشا ەسەپتەن 1,5 ەسەگە كوپ. ودان بولەك, ادامداردىڭ دەنساۋلىعى مەن كوڭىل كۇيىنە كەرى اسەر ەتەتىن زياندى زاتتاردىڭ اۋاعا شامادان تىس تاراۋى دا – ايماقتاعى وزەكتى ماسەلە», دەدى قاسىم-جومارت توقاەۆ.
وسىعان بايلانىستى پرەزيدەنت ۇكىمەت پەن شىعىس قازاقستان وبلىسىنىڭ اكىمدىگىنە ۇكىمەتتىك ەمەس ۇيىمدارمەن جانە كاسىپورىندارمەن بىرلەسىپ, قورشاعان ورتانىڭ ساپاسىن جاقسارتۋ ءۇشىن كەشەندى شارالاردى جۇزەگە اسىرۋدى تاپسىردى.
مەملەكەت باسشىسى جەمقورلىقتىڭ ءالى دە بولسا قوعامنىڭ اسقىنعان دەرتى ەكەنىن, ونىڭ ەل ءۇشىن اتقارىلۋى ءتيىس كوپتەگەن باستاما مەن جوبالارعا كەدەرگى كەلتىرىپ وتىرعانىنا وكىنىش ءبىلدىردى. «مەن ءوز تاراپىمنان بۇل جۇيەلى ماسەلەنى شەشۋ ءۇشىن بار كۇش-جىگەرىمدى سالامىن. الايدا, ازاماتتاردىڭ وزدەرى بەلسەندىلىك تانىتپاي, جەمقورلىقتى جويۋ مۇمكىن ەمەس. پرەزيدەنت رەتىندە ايتارىم, مەن ءۇشىن ادىلەتتىلىك – بارشانىڭ زاڭ الدىنداعى تەڭدىگى, – دەدى قاسىم-جومارت توقاەۆ.
كەزدەسۋ بارىسىندا ازاماتتىق قوعام وكىلدەرى, جاستار, پەداگوگتەر, دارىگەرلەر مەن كاسىپكەرلەر ءسوز الىپ, ءوز پىكىرلەرىن ءبىلدىردى. «قازتسينك» كومپانياسى كاسىپوداق ۇيىمىنىڭ توراعاسى سەرگەي سولداتوۆ جالپىعا ورتاق ەڭبەك قوعامىن قۇرۋ ارقىلى عانا ەلىمىزدى الدىڭعى قاتارلى مەملەكەتتەر ساناتىنا قوسۋعا بولاتىنىن جەتكىزدى. «شىعىس» وڭىرلىك ورتالىعىنىڭ مامانى سالتانات زامانبەكوۆا ەلىمىزدىڭ تۇڭعىش پرەزيدەنتى نۇرسۇلتان نازارباەۆ كەزىندە مەملەكەتتىڭ ءبىلىم سالاسىنا دارا جول سالعانىن ايتىپ, سول جولدى ەندى قاسىم-جومارت كەمەل ۇلى جالعاستىراتىنىنا سەنىم ءبىلدىردى. زايساندىق «اقباي» شارۋا قوجالىعىنىڭ جەتەكشىسى ساۋلەش ابىلعوجينا ءوزىنىڭ جەتى بالانى تاربيەلەپ-ءوسىرىپ وتىرعان كوپ بالالى انا ەكەنىن اتاپ كورسەتتى. وسكەمەندەگى انا مەن بالا ورتالىعىنىڭ ءبولىم باسشىسى الەكساندر پاترين مەملەكەت قامقورلىعىنىڭ ارقاسىندا ەلىمىزدەگى مەديتسينا سالاسى زاماناۋي قۇرال-جابدىقتارمەن قامتىلىپ وتىرعانىن العا تارتتى.
مەملەكەت باسشىسى قاسىم-جومارت توقاەۆ وسكەمەندەگى «كازتسينك» جشس-نا قاراستى مىس زاۋىتىندا دا بولدى. قازاقستان پرەزيدەنتىنە مەتالدى مىرىش, تازارتىلعان قورعاسىن, التىن مەن كۇمىس, كاتودتى مىس سياقتى شىعارىلاتىن ونىمدەردىڭ ءتىزىمى ۇسىنىلدى. زاۋىتتىڭ وندىرىستىك قۋاتى جىلىنا 305 مىڭ توننا مىرىش, 168 مىڭ توننا قورعاسىن, 70 مىڭ توننا مىس, 47 توننا التىن جانە 1440 توننا كۇمىس وندىرۋگە قاۋقارلى. قاسىم-جومارت توقاەۆ ەڭبەك ۇجىمىمەن اڭگىمەلەسۋ بارىسىندا «قازتسينك» جاۋاپكەرشىلىگى شەكتەۋلى سەرىكتەستىگى قازاقستان ءتۇستى مەتاللۋرگياسىنىڭ فلاگمانى جانە ءىرى ەكسپورتتاۋشىسى ەكەنىن اتاپ ءوتتى. «سىزدەردىڭ كاسىپورىندارىڭىز وسكەمەن مەن بۇكىل شىعىس قازاقستان وبلىسىنىڭ بيۋدجەتىن قالىپتاستىرۋعا جانە الەۋمەتتىك سالاسىن دامىتۋعا زور ۇلەس قوسىپ كەلەدى. «قازتسينك» ءوز جۇمىسشىلارىنا كومەكتەسىپ قانا قويماي, سونداي-اق قوعام ءۇشىن ماڭىزدى جوبالاردى جۇزەگە اسىرۋعا اتسالىسادى. بۇل – بيزنەستىڭ جوعارى الەۋمەتتىك جاۋاپكەرشىلىگىنىڭ جانە ءوڭىردىڭ بارلىق تۇرعىندارى ءۇشىن قولايلى ورتا قالىپتاستىرۋعا دەگەن نيەتىنىڭ دالەلى», دەدى قازاقستان پرەزيدەنتى.
ازامات قاسىم,
راۋشان نۇعمانبەك,
«Egemen Qazaqstan»