قوستاناي قالاسىنداعى «اۋەجاي» جاڭا شاعىن تۇرعىن اۋدانىندا ورنالاسقان «قوستاناي» سپورت جانە ويىن-ساۋىق ورتالىعىنىڭ ات شاپتىرىم زالى ىعى-جىعى جاستار. جاعالاي اۋداندار مەن قالالاردان كەلگەن كاسىپورىندار مەن شارۋاشىلىقتار, ياعني جۇمىس بەرۋشىلەر, سونىمەن قاتار «اتامەكەن», «دامۋ», «توبول» اكك سەكىلدى كوممەرتسيالىق جانە قارجىلىق قۇرىلىمدار, بارلىعى ەلۋدەن استام قۇرىلىم وكىلدەرى ولارعا بوس ورىندار ۇسىندى. شارانىڭ اشىلۋ سالتاناتىندا وبلىس اكىمى ارحيمەد مۇحامبەتوۆ سويلەپ, جاس ماماندار ءۇشىن جارمەڭكەنىڭ ءساتتى ءوتۋىن تىلەدى.
«جارمەڭكە جۇمىس بەرۋشىلەر ءۇشىن بىلىكتى مامانداردى تارتۋعا, ال جاس ماماندار ءۇشىن لايىقتى جۇمىس ورنىن تابۋعا مۇمكىندىك بەرەدى. وبلىستا ءوندىرىس ورىندارى اشىلىپ, جاڭا جۇمىس ورىندارى ۇسىنىلىپ جاتىر. اۋداندار مەن قالالاردىڭ تەك بيۋدجەتتىك سالاسىندا عانا بوس 1200 جۇمىس ورنى بار.
حالىقتى جۇمىسپەن قامتۋ ءۇشىن مەملەكەتتىك بىرنەشە باعدارلامالار بار. «ديپلوممەن اۋىلعا!», «سەرپىن-2050», «ەڭبەك», «بيزنەستىڭ جول كارتاسى-2020» جانە تاعى باسقا باعدارلامالار جاس ماماندارعا بارلىق قولايلى شارتتاردى ۇسىنادى» دەدى ارحيمەد بەگەجان ۇلى.
2009 جىلدان بەرى «ديپلوممەن – اۋىلعا!» باعدارلاماسى بويىنشا وبلىس قالالارى مەن اۋداندارىنا 4310 جاس مامان باردى. ولارعا مەملەكەت تاراپىنان 4,7 ميلليارد تەڭگە قولداۋ كورسەتىلدى. بيىلعى جىلى «سەرپىن» باعدارلاماسى ارقىلى وبلىستاعى جوعارى جانە ورتا وقۋ ورىندارىنان ءبىلىم العان 700-دەن استام ستۋدەنت بوس ورىندار جارمەڭكەسىنە قاتىستى. ءوڭىر باسشىسى جاستارعا بيىلعى جارمەڭكەنىڭ ەرەكشەلىگىن دە اتاپ ءوتتى.
«سىزدەر «ەڭبەك» باعدارلاماسى مەن «ەڭبەك رەسۋرستارىنىڭ ۇتقىرلىعى» باعىتى بويىنشا تاماشا مۇمكىندىككە يە بولىپ وتىرسىزدار. 2018 جىلدان باستاپ باعدارلاما قاتىسۋشىلارىنىڭ قاتارىنا "ماڭگىلىك ەل جاستارى - يندۋسترياعا!" ("سەرپىن") جوباسىنىڭ تۇلەكتەرى دە قوسىلدى. ەندى «سەرپىن» جوباسى بويىنشا بۇرىنعىداي تەك وڭتۇستىك پەن باتىستاعى بەس وبلىستان عانا ەمەس, ەلىمىزدىڭ قاي شالعايىنان قونىس اۋدارسا دا, ولار قونىس اۋدارۋ باعدارلاماسىنا قاتىسا الادى» دەدى ارحيمەد بەگەجان ۇلى.
اۋداندار مەن قالالار اكىمدىكتەرى «سەرپىن» جوباسى بويىنشا جانە باسقا دا جاس ماماندارعا بارلىق قولايلى جاعدايلاردى جاساۋعا الاقانىنا تۇكىرىپ وتىر.
«بىزگە بارلىق ماماندار كەرەك. بيىل بەس دارىگەر كەلەدى, مەديتسينالىق جوعارى وقۋتورىندارىنداعى تۇلەكتەرمەن شارتقا وتىردىق. ولارعا ءبىر رەتتىك كومەك 1,5 ميلليون تەڭگە شاماسىندا تولەنەدى, اۋىلدا باسپانا ساتىپ الۋىنا جەڭىلدىكپەن نەسيە بەرىلەدى. اۋىل مەكتەپتەرىنە 30 شاقتى مۇعالىم قاجەت. كەلگەن مامانداردىڭ بارلىعىنا وسىنداي كومەك كورسەتىلەدى» دەيدى فەدوروۆ اۋدانىنىڭ اكىمى ءتاۋبا يساباەۆ.
كوپتەگەن شارۋاشىلىقتارعا مال دارىگەرى, زووتەحنيك, اگرونوم ماماندارى كەرەك. جارمەڭكەدە شارۋاشىلىق باسشىلارى تۇلەكتەرمەن شارتقا وتىردى.
جارمەڭكە تاڭەرتەڭنەن ءتۇس قايتقانشا بولدى. ونىڭ ناتيجەسى, ياعني قانشا جاستىڭ ءوز جۇمىس ورنىن تاپقانى الداعى كۇندەرى بەلگىلى بولادى.