بۇگىن پالاتا سپيكەرى نۇرلان نىعماتۋليننىڭ توراعالىعىمەن ءماجىلىس بيۋروسى ءوتتى. وندا 30 ءساۋىر مەن 7 مامىر ارالىعىندا دەپۋتاتتاردىڭ ايماقتارعا ساپارى تۋرالى ماسەلە قارالدى. بۇل تۋرالى پارلامەنت ءماجىلىسىنىڭ ءباسپاسوز قىزمەتى حابارلادى.
ءماجىلىس توراعاسى اتاپ وتكەندەي, دەپۋتاتتاردىڭ حالىقپەن كەزدەسۋلەرىندە ءبىرىنشى كەزەكتە, ەلباسى نۇرسۇلتان نازارباەۆتىڭ الەۋمەتتىك باستامالارىنىڭ جۇزەگە اسىرىلۋ بارىسى, ونىڭ ىشىندە, تۇرمىسى تومەن جانە كوپبالالى وتباسىلاردى قولداۋ شارالارىنا ەرەكشە كوڭىل بولىنەدى.
دەپۋتاتتار كەزدەسۋ بارىسىندا وسى باعىتتا قابىلدانعان زاڭنامالىق قۇجاتتارمەن قاتار, جالپى زاڭشىعارۋشىلىق جۇمىستار جونىندە باياندايدى.
حالىق قالاۋلىلارى ءوندىرىس ورىندارىندا, اۋىلشارۋاشىلىق جانە الەۋمەتتىك نىسانداردا بولىپ ەڭبەك ۇجىمدارىمەن جانە جاستارمەن كەزدەسەدى, سونداي-اق ازاماتتاردىڭ قوعامدىق قابىلداۋىن وتكىزەدى دەپ جوسپارلانۋدا.
ءماجىلىس دەپۋتاتتارىنىڭ حالىقپەن كەزدەسۋى وبلىس, اۋدان ورتالىقتارىمەن قاتار شالعايداعى ەلدى مەكەندەردى دە قامتيتىن بولادى.