ءمينيستردىڭ ايتۋىنشا, قازاقستان تاۋەلسىزدىككە قول جەتكىزگەننەن كەيىن حالىقارالىق كولىك جەلىلەرىنە قوسىلۋ ءۇشىن ۇلكەن كۇش جۇمسادى. بىرقاتار سالالىق باعدارلامالار قابىلداندى, جاڭا الەۋمەتتىك-ەكونوميكالىق جاعدايلارعا جاۋاپ بەرەتىن سالانىڭ قۇقىقتىق نەگىزى قالىپتاستى. كولىك قىزمەتتەرىن كورسەتەتىن باسەكەلەستىك ورتا قۇرىلدى.
«سوڭعى 10 جىلدا كولىك سالاسىن دامىتۋعا شامامەن 30 ملرد اقش دوللارى جۇمسالدى. 2 مىڭ شاقىرىمنان استام تەمىر جول سالىندى, 6,3 مىڭ شاقىرىم اۆتوموبيل جولدارى قايتا جاڭارتىلدى, كاسپيدەگى پورتتىق قۋات 26 ملن تونناعا دەيىن ۇلعايتىلدى, 15 اۋەجايدىڭ ۇشۋ-قونۋ جولاقتارى قايتا جاڭارتىلدى», دەدى مينيستر.
رومان سكليار ەكى ەلدىڭ ساۋدا-ەكونوميكالىق ءوزارا ءىس-قيمىلىن نىعايتاتىن قازاقستان مەن قىتايدىڭ كولىك-لوگيستيكالىق سەكتورىنداعى تىعىز ارىپتەستىك ىنتىماقتاستىقتى اتاپ ءوتتى.
بۇگىندە قىتايمەن شەكارادا كەدەرگىسىز ساۋدانى دامىتۋ ماقساتىندا «قورعاس – شىعىس قاقپاسى» ارنايى ەكونوميكالىق ايماعىن قۇرۋ جۇمىستارى تولىعىمەن اياقتالدى. قازىر وندا 79 قاتىسۋشى تىركەلدى جانە ءوندىرىس رەتكە كەلتىرىلۋدە.
ارنايى ەكونوميكالىق ايماق ينفراقۇرىلىمىنا يندۋستريالىق جانە لوگيستيكالىق ايماقتارمەن قاتار قۇرعاق پورت كىرەدى. ول ەلدىڭ شىعىسىنداعى جۇكتەردى شوعىرلاندىرۋ مەن ديستريبۋتسيالاۋ ءۇشىن 2015 جىلى ىسكە قوسىلعان بولاتىن.
تەڭىز تاسىمالدارىنىڭ الەمدىك كوشباسشىسى, COSCO Shipping قىتاي كومپانياسى جەرۇستى ترانسكونتينەنتالدىق تاسىمالدارعا قىزىعۋشىلىق تانىتتى جانە قۇرعاق پورتتى دامىتۋعا بەلسەنە اتسالىسادى. سونداي-اق حالىقارالىق باسقارۋشى رەتىندە DP World ء(باا) تەڭىز پورتتارىنىڭ وپەراتورى تارتىلدى.
2014 جىلى ليانيۋنگان پورتىندا قىتاي سەرىكتەستەرىمەن بىرلەسكەن لوگيستيكالىق تەرمينال قۇرىلدى. ول بۇگىنگى كۇنى قازاقستانعا نەمەسە قازاقستاننان وتەتىن جۇك اعىندارىن شوعىرلاندىرۋدىڭ نەگىزگى پۋنكتى.
«قۇرعاق پورت قىتايمەن شەكارادا ەكى تەمىر جول وتكەلىمەن تەحنولوگيالىق ۇيلەسىمدە. «جەتىگەن-قورعاس» تەمىر جولى مەن «باتىس ەۋروپا – باتىس قىتاي» اۆتوماگيسترالى ارقىلى قۇزىرەتتى ءىرى كولىك-لوگيستيكالىق وپەراتورلاردى تارتا وتىرىپ, ەۋرازيالىق ترانسكونتينەنتالدىق تاسىمالداردى دامىتۋدىڭ جاڭا كەزەڭىن اشتى», دەپ اتاپ ءوتتى مينيستر رومان سكليار.
ايتا كەتۋ كەرەك, 25-27 ءساۋىر ارالىعىندا بەيجىڭدە وتەتىن «ءبىر بەلدەۋ, ءبىر جول» ەكىنشى فورۋمىنا 40-قا جۋىق مەملەكەت جانە ۇكىمەت كوشباسشىلارى قاتىسادى.