سوڭعى دەرەكتەرگە قاراعاندا, جارىلىستان قازا تاپقاندار سانى 262 ادامعا جەتكەن. ال جاپا شەككەندەردىڭ جالپى سانى 500-گە جۋىق. جاپا شەككەندەر اراسىندا دانيا, جاپونيا, پاكىستان, ماروككو, ءۇندىستان, بانگلادەش, قحر, نيدەرلاند, اقش, تۇركيا جانە انگليا ازاماتتارى بار. بىراق نەگىزگى بولىگى جەرگىلىكتى ازاماتتار. دەرەكتەرگە قاراعاندا, بارلىعى 35 شەتەلدىك ازاماتتىڭ جاپا شەككەندىگى ايتىلۋدا. قازا تاپقاندار اراسىندا تەك ۇلىبريتانيا ازاماتتارىنىڭ بار ەكەندىگى ءمالىم بولدى.
قازاقستان سىرتقى ىستەر مينيسترلىگى شري-لانكا ىشكى ىستەر مينيسترلىگىنىڭ اقپاراتىنا سۇيەنىپ, قازا تاپقاندار اراسىندا قازاقستان ازاماتتارى جوق ەكەنىن حابارلادى.
قازىر شري-لانكا وكىمەتى جارىلىستارعا قاتىسى بولۋى مۇمكىن دەگەن 13 ادامدى قۇرىقتاعان. قازاقستاننىڭ سىرتقى ىستەر مينيسترلىگى تەرروريستىك اكتىلەردى ايىپتاعان مالىمدەمە تاراتتى. وندا قازاقستان تەرروريزمنىڭ بارلىق تۇردەگى فورمالارىن ايىپتايتىندىعى جانە الەمدىك قوعامداستىقپەن ءبىرلەسىپ, بۇل جاۋىزدىققا قارسى باتىل كۇرەس جۇرگىزۋى كەرەكتىگى ايتىلعان. سونىمەن بىرگە ءمالىمدەمەدە جاپا شەككەندەردىڭ وتباسىلارىنا, بارلىق شري-لانكا حالقى مەن وكىمەتىنە كوڭىل ايتىلىپ, تەراكتىلەردى ۇيىمداستىرۋشىلار مەن ورىنداۋشىلار ءتيىستى جازاسىن الاتىنىنا سەنىم بىلدىرىلگەن.
قازىر شري-لانكا وكىمەتى ەلدە توتەنشە جاعداي جاريالاپ, كومەندانتتىق ساعات ەنگىزگەن. ەلدىڭ قورعانىس مينيسترى رۋۆان ۆيەۆاردەنە سەگىز جارىلىستىڭ ەكەۋىن تەرروريست-جانكەشتىلەردىڭ جاساعانى انىقتالعانىن جاريالادى. قازىر ولاردىڭ كىم ەكەندىگى انىقتالعان جانە ولار ەكسترەميستىك توپتارعا ءمۇشە ەكەندىگى دە بەلگىلى بولدى.
ەسكە سالا كەتەتىن بولساق, بيىل 15 ناۋرىزدا جاڭا زەلانديانىڭ كرايستچەرچ قالاسىنىڭ ەكى مەشىتىندە 28 جاسار برەنتون تاررانت دەگەن قانىشەر دە تەرروريستىك اكتى جاساپ, 50 ادامدى ءولتىرىپ, تاعى دا 50-گە جۋىق ادامدى جارالاعان ەدى. الدىمەن ول ءال-نۇر مەشىتىنە كەلىپ, ناماز ۋاقىتىندا مۇسىلماندارعا وق جاۋدىرعان. سودان كەيىن اۆتوماشيناسىنا ءمىنىپ, ەكىنشى مەشىتكە جەتكەن. مۇندا دا كارى-جاسقا قاراماي, مەشىتتەگىلەردىڭ ءبارىن قىرا بەرگەن. قانىشەردىڭ قولىنان قازا تاپقانداردىڭ جاستارى ءۇش پەن 77 جاس ارالىعىنداعى بەيبىت جاندار. ال قانىشەردىڭ ءوزى اۋستراليانىڭ ۋلترا وڭشىل كوزقاراستاعى توبىنىڭ مۇشەسى ەكەندىگى انىقتالعان. ەگەر كەيبىر ازاماتتار ونىڭ قولىنا ۇمتىلىپ, قارۋىن قاعىپ ءتۇسىرۋگە تىرىسپاسا, قازا بولعاندار مەن جاپا شەككەندەر سانى بۇدان دا ارتىق بولار ەدى. سونىڭ ءبىرى اۋعانستاننان 80-جىلدارى جاڭا زەلاندياعا قونىس اۋدارعان 71 جاستاعى داۋد نابي بولعان.
تەرروريزمدە ۇلت تا جوق, ءدىن دە جوق. ولاردىڭ قاندى ارەكەتتەرىن ەشكىم دە, ەشقاشان دا اقتامايدى. ەشقانداي جازىعى جوق بەيبىت تۇرعىنداردى ءوزىنىڭ قاسكوي ارەكەتىنىڭ قۇربانى ەتۋ – ناعىز نادان ادامداردىڭ ارەكەتى.