بۇل ۇسىنىستى قر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ ورتالىق سايلاۋ كوميسسياسىنىڭ كەڭەيتىلگەن وتىرىسىندا ايتتى.
ءمينيستردىڭ ايتۋىنشا, سوڭعى 2-3 جىلدا مۇمكىندىگى شەكتەۋلى جانداردىڭ داۋىس بەرۋىنە جاعداي جاساۋدا مينيسترلىك پەن ورتالىق سايلاۋ كوميسسياسى بىرلەسىپ, ەلەۋلى جۇمىستار اتقاردى.
«كەزەكتەن تىس سايلاۋدا بارلىق سايلاۋشىلارعا, ونىڭ ىشىندە مۇمكىندىگى شەكتەۋلى ازاماتتارعا جاعداي جاساۋىمىز كەرەك. قازاقستاندا 680 مىڭ مۇمكىندىگى شەكتەۋلى ادامدار تۇرادى. ودان بالالاردى جانە سوت شەشىمىمەن سايلاۋعا قاتىسپايتىن ازاماتتاردى الىپ تاستاعاندا, ەڭ كەمى 500 مىڭ مۇگەدەك سايلاۋعا قاتىسۋى كەرەك. سونىمەن بىرگە, 2015 جىلى مۇمكىندىگى شەكتەۋلى جانداردىڭ قۇقىعى تۋرالى بۇۇ كونۆەنتسياسىن ماقۇلدادىق, وزىمىزگە حالىقارالىق مىندەت الدىق. سونى ورىنداۋىمىز كەرەك», دەدى بەردىبەك ساپارباەۆ.
مينيستر جەرگىلىكتى بيلىك وكىلدەرىمەن بىرگە, مۇمكىندىگى شەكتەۋلى ازاماتتاردىڭ جانىندا كومەكشىلەردىڭ, سۋرواۋدارماشىلاردىڭ بولۋىن قامتاماسىز ەتۋدى ۇسىندى.
«ءبىزدىڭ ويىمىزشا, جەرگىلىكتى بيلىك وكىلدەرى وسى جۇمىستارعا, ەرىكتىلەردى, ونىڭ ىشىندە 3-4 كۋرستاعى جوو ستۋدەنتتەرىن پايدالانۋى كەرەك. ەڭ نەگىزگىسى - بارلىق 9 950 سايلاۋ ۋچاسكەلەرىندە بۇل ازاماتتارعا جاعداي جاسالۋى كەرەك. بىلتىردان باستاپ, ءبىزدىڭ مينيسترلىك جانىندا ينتەرنەت-پورتال جۇمىس ىستەيدى. سول ينتەرنەت-پورتالعا 30 مىڭنان استام الەۋمەتتىك جانە كولىك ينفراقۇرىلىمى نىساندارى ەنگىزىلگەن, وعان قوسىمشا 6,5 مىڭعا جۋىق سايلاۋ ۋچاسكەلەرى دە ەنگىزىلگەن», دەپ اتاپ ءوتتى ب. ساپارباەۆ.