پرەزيدەنت ساۋدا سالاسىنىڭ قازىرگى جاي-كۇيى مەن الداعى دامۋ باعىتتارى تۋرالى ەسەپتى تىڭدادى, دەپ جازادى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسىنا 2025 جىلدىڭ قورىتىندىسى بويىنشا ىشكى جالپى ءونىمنىڭ 19 پايىزعا جۋىعى ساۋدا-ساتتىققا تيەسىلى ەكەنى باياندالدى. قازاقستان ەكونوميكاسىنىڭ ماڭىزدى سەكتورلارىنىڭ ءبىرى سانالاتىن سالاعا 1,2 تريلليون تەڭگە ينۆەستيتسيا قۇيىلعان. ال تاۋار اينالىمى 8,9 پايىزعا ۇلعايىپ, 80,3 تريلليون تەڭگەگە جەتكەن.
قاسىم-جومارت توقاەۆقا ەلەكتروندى ساۋدانىڭ دامۋى جونىندە مالىمەت بەرىلدى. بىلتىر ونىڭ كولەمى 3,9 تريلليون تەڭگەنى قۇراعان. بۇل – بولشەك ساۋدانىڭ 15 پايىزىنا تەڭ. ەلىمىزدە 10 لوگيستيكا ورتالىعىنان تۇراتىن جەلى قالىپتاستى. استانا مەن الماتى قالالارىندا ەكى ءىرى فۋلفيلمەنت-ورتالىق سالىنىپ جاتىر.
تۇرعىن ءۇي ساۋداسى باسەڭدەدى: سۇرانىس نەگە ەكى ەسەگە ازايدى؟
ساۋدا جانە ينتەگراتسيا مينيسترلىگى ەلىمىزدىڭ ەكسپورتتىق الەۋەتىن نىعايتۋعا ايرىقشا ءمان بەرۋدە. جاھانداعى ەكونوميكالىق سىن-قاتەرلەرگە قاراماستان, سىرتقى نارىققا شىعارىلاتىن شيكىزاتتىق ەمەس تاۋار تۇرلەرى مەن قىزمەتتەر كولەمى 41 ميلليارد دوللارعا جەتتى. ەكسپورتتاۋشىلاردى قارجىلاي قولداۋ تەتىكتەرى ايتارلىقتاي كەڭەيدى. اتاپ ايتقاندا, ساقتاندىرۋ سوماسىنىڭ ماكسيمالدى مولشەرى 1,2 تريلليون تەڭگەگە دەيىن كوبەيىپ, قولداۋ شارالارى ەكى ەسە ارتتى.
مەملەكەت باسشىسىنا ەۋرازيالىق ەكونوميكالىق وداق اياسىندا اتقارىلىپ جاتقان جۇمىستار جونىندە ايتىلدى. ەاەو قۇرىلعاننان بەرى 70 ساۋدا كەدەرگىسىنىڭ 69-ى جويىلدى. كەلىسسوزدەر ناتيجەسىندە ەلىمىزدىڭ بىرقاتار ماسەلەگە قاتىستى ۇستانىمى ەسكەرىلدى. ونىڭ قاتارىندا قازاقستان كاسىپورىندارىنا دەمپينگكە قارسى باج سالىعىن تولەمەي, كەيبىر تاۋار تۇرلەرىن كىرگىزۋگە كۆوتا بەرۋ سەكىلدى ماڭىزدى مامىلەلەر بار.
ونلاين ساۋدادا وتاندىق تاۋاردىڭ ءباسى بيىك
پرەزيدەنت ۆەدومستۆوعا زاماناۋي ساۋدا ەكوجۇيەسىن قالىپتاستىرۋ, وتاندىق ءوندىرىستىڭ وسۋىنە قولايلى جاعداي جاساۋ, تۇتىنۋشىلاردىڭ قۇقىقتارىن جان-جاقتى قورعاۋ, ەكسپورتتىق الەۋەتتى نىعايتۋ, سونداي-اق ەلدىڭ ەكونوميكالىق مۇددەلەرىن ىلگەرىلەتۋ جونىندە بىرقاتار مىندەت جۇكتەدى.