ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى گۇلقاسيما سۇيىنتاەۆا بايانداماسىنا سايكەس, ءبىرىنشى توقسان قورىتىندىسىنان كىرىس كوزى 26,7 ملرد تەڭگەنى قۇراعان.
وبلىس باسشىسى اتالعان كەمشىلىكتەر بويىنشا اۋدان اكىمدەرىنە قاتاڭ ەسكەرتۋ جاسادى.
«ازىرگە مۇنى مەنىڭ تاراپىمنان ەسكەرتۋ دەپ تۇسىنىڭىزدەر, ەگەر جارتى جىلدىق قورىتىندىسى بويىنشا ءدال وسىنداي كورسەتكىشپەن جالعاساتىن بولسا ءتىپتى تارتىپتىك شارا قولدانىلادى», - دەدى وڭداسىن ورازالين.
كىرىس كوزىنىڭ تومەندەۋىنە سەبەپتىڭ ءبىرى, اقتوبەدەگى كەيبىر كاسىپورىن يەلەرى وزگە قالاعا نەمەسە وبلىسقا تىركەلگەندىكتەن, سالىقتى سول ايماققا تولەيدى.
سونداي اق, بيۋدجەتتىك باعدارلاما اكىمشىلەرى قارجىلىق ءتارتىپتى دۇرىس ساقتاي الماي وتىر. جوبالىق سمەتالىق قۇجاتتاردىڭ دۇرىس قۇرىلماۋىنان مەملەكەت قاراجاتى جەلگە ۇشقان. مۇنداي جاعداي قارعالى اۋدانىندا كەزدەستى. سپورتتىق مەكتەپتىڭ جوبالىق سمەتالىق قۇجاتىنا 4 ملن تەڭگە جۇمسالعانمەن, مەكتەپتىڭ قاجەتتىلىگى بولماي قالعان.
وبلىس اكىمى وڭداسىن ورازالين جيىندى قورىتىندىلاي كەلە, جاۋاپسىزدىققا جول بەرگەندەر مەن جوسپاردى دۇرىس قۇرماي, قاراجاتتى ءتيىمسىز جۇمساعاندارعا اياۋشىلىق تانىتپايتىنىن ايتتى.