نۇر-سۇلتان قالاسىنىڭ قازاقستان حالقى اسسامبلەياسىن دامىتۋ شەڭبەرىندە ۇيىمداستىرىلعان اۋقىمدى ءىس-شاراعا قازاقستان حالقى اسسامبلەياسى توراعاسىنىڭ ورىنباسارى, قحا حاتشىلىعىنىڭ مەڭگەرۋشىسى – ج.تۇيمەباەۆ, قازاقستانداعى وزبەكستان رەسپۋبليكاسىنىڭ توتەنشە جانە وكىلەتتى ەلشىسى – س.نيازحودجاەۆ, مەملەكەتتىك سىيلىقتىڭ يەگەرى, ناۋاي ەڭبەكتەرىن قازاق تىلىنە اۋدارۋشى, بەلگىلى جازۋشى, ەپيك اقىن – ن.ايت ۇلى, سونداي-اق قر پارلامەنتى دەپۋتاتتارى, قازاقستانداعى تۇركيا, ءازىربايجان, قىرعىزستان, تاجىكستان ەلشىلىگىنىڭ وكىلدەرى, اسسامبلەيا مۇشەلەرى, قازاقستان جانە وزبەكستان جازۋشىلارى مەن ناۋايتانۋشىلارى, قوعام قايراتكەرلەرى, عالىمدار, اقىندار, ەتنومادەني جانە جاستار بىرلەستىكتەرىنىڭ وكىلدەرى قاتىستى.
كەشتى نۇر-سۇلتان قالاسىنىڭ قحا حاتشىلىعىنىڭ مەڭگەرۋشىسى ل.قۇسايىنوۆا: «ءبىزدىڭ نۇر-سۇلتان قالاسىنىڭ قازاقستان حالقى اسسامبلەياسىن دامىتۋ اياسىندا ەكى جارقىن وقيعانى: وزبەكستانداعى قازاقستان جىلى جانە قازاقستانداعى جاستار جىلىن ساباقتاستىرا ۇيىمداستىرعان ادەبي كەشىمىزدىڭ ماقساتى – ەكى ەل اراسىنداعى ءوزارا ىنتىماقتاستىقتى نىعايتۋ جانە وزبەك مادەنيەتىن ناسيحاتتاۋ», - دەگەن سوزدەرمەن باستادى.
قازاقستان حالقى اسسامبلەياسى توراعاسىنىڭ ورىنباسارى, قحا حاتشىلىعىنىڭ مەڭگەرۋشىسى ج.تۇيمەباەۆ كەلگەن قوناقتارعا العىسىن ءبىلدىرىپ, «ەكى ەل اراسىنداعى بەرىك دوستىقتىڭ ايعاعى رەتىندە ءوتىپ جاتقان بۇگىنگى كەشتىڭ ماڭىزى زور. سەبەبى مەملەكەتتەر اراسىنداعى دوستىق تەك ساۋدا-ەكونوميكالىق سالادان عانا ەمەس, مادەنيەت پەن ءبىلىم سالاسىنان دا كورىنىس تابۋى ءتيىس», - دەيدى.
مەملەكەتتىك سىيلىقتىڭ لاۋرەاتى, ناۋاي ەڭبەكتەرىن قازاق تىلىنە اۋدارۋشى, بەلگىلى جازۋشى ن.ايت ۇلى: «بۇكىل تۇركى حالىقتارىنىڭ ماڭدايىنا بىتكەن جارىق جۇلدىز ناۋايدىڭ شىعارمالارى ۇشان تەڭىز. ولاردى زەرتتەۋ, اۋدارۋ ۇرپاقتان ۇرپاققا جالعاسادى. 30 جىلدان بەرى ونىڭ حامساسىن اۋدارىپ كەلە جاتىرمىن. جاقىندا «ءلايلى-ءماجنۇندى» اۋدارىپ, 550 بەتتىك كىتاپ قىلىپ شىعاردىق. جالپى, تۇركى حالىقتارىنا ورتاق ۇلىلار تۋرالى مەكتەپ وقۋلىقتارىن جاساۋ قاجەت دەپ ەسەپتەيمىن. جاستايىنان عۇلامالاردى جاتتاپ وسەتىن ۇرپاق جامان بولمايدى», - دەگەن پىكىرىمەن ءبولىستى.
قر پارلامەنتى سەناتىنىڭ دەپۋتاتى ە.مامىتبەكوۆ «ناۋايدىڭ ۇلى اقىن, ويشىل بولعانى ءبىر بولەك. ول بەدەلدى مەملەكەتتىك قايراتكەر دە بولعان. ناۋايدىڭ جاقىن دوسى حۇسايىن بايقارا حوراساننىڭ ءامىرى بولعان كەزدە, ونىڭ ءمور ساقتاۋشىسى قىزمەتىن اتقارادى دا, كەيىن ءۋازىر بولىپ تاعايىندالادى. سول كەزدەرى ول عالىمدار, سۋرەتشىلەر, مۋزىكانتتار مەن اقىندارعا قامقورلىق جاساعان. ءوز قارجىسىنا جولدار, كوپىرلەر, مەكتەپتەر, شەبەرحانالار دا سالدىرىپ, حالىق بەدەلىنە يە بولعانىنا» نازار اۋدارتتى.
قر پارلامەنتى ءماجىلىسىنىڭ دەپۋتاتى س.ابدراحمانوۆ ءوزىنىڭ بايانداماسىندا «قر پرەزيدەنتى قاسىم-جومارت توقاەۆتىڭ العاشقى پرەزيدەنتتىك ساپارى كورشى وزبەكستان ەلىنە جاسالۋى – اعايىندى ەكى ەلدىڭ جاقىندىعىنىڭ نىشانى, ال ناۋاي ەسىمى – باۋىرلاس ەكى ەل اراسىنداعى التىن كوپىرلەردىڭ ءبىرى» دەپ, نۇر-سۇلتان قالاسىنىڭ قازاقستان حالقى اسسامبلەياسى شاڭىراعىنىڭ استىندا ءوتىپ جاتقان ناۋاي كەشىن وتە قۇپتايتىنىن جەتكىزدى.
قازاقستان مەن وزبەكستان اراسىنداعى تىعىز قارىم-قاتىناستى جوعارى باعالايتىن ءماجىلىس دەپۋتاتى ف.قاراتاەۆ: «ناۋايدىڭ شىعارمالارى قازاق تىلىنە اۋدارىلىپ, قازاق مەكتەپتەرىندە وقىتىلسا, ۇلى ابايدىڭ وزبەك تىلىنە اۋدارىلعان ەڭبەكتەرى وزبەكستاندا كەڭىنەن تاراعان. قازاقستاندا 500 مىڭنان استام وزبەك وكىلى ءومىر سۇرسە, وزبەكستاندا 1 ملن قازاق تۇرادى, 400-دەن استام قازاق مەكتەپتەرى دە بار. مۇنىڭ ءبارى ەكى ەلدىڭ جاقىندىعى, دوستىعى. ءوز تاراپىمىزدان, بۇگىنگى كەش بارىسىندا وزبەك ەتنومادەني ورتالىعىنا ناۋايدىڭ قازاق تىلىنە اۋدارىلعان 50 كىتابىن تابىس ەتكەلى وتىرمىز», - دەپ نيەت ءبىلدىردى.
«ناۋايدىڭ شىعارماشىلىعى وتە باي, 60 جىل ءومىر سۇرگەن عۇلاما 20 توم كىتاپ جازعانى سوعان دالەل. ونىڭ 500 جىل بۇرىنعى شىعارمالارى قازىرگى زامان تۋرالى جازىلعانداي. دوستىق, ىنتىماقتاستىق جايىندا جازعان ءا.ناۋاي شىعارمالارىنا ارناپ ۇيىمداستىرعان بۇگىنگى كەش ءۇشىن قازاقستان حالقى اسسامبلەياسىنا العىسىمىز شەكسىز» دەپ وزبەكستاننىڭ مەملەكەتتىك جانە قوعام قايراتكەرى, پروفەسسور م.احمەدوۆ ريزاشىلىعىن ءبىلدىردى.
شىعارماشىلىق كەش بارىسىندا «انالار اماناتى» كورمەسى مەن ستۋدەنتتەر اراسىندا مانەرلەپ وقۋ بويىنشا بايقاۋ وتكىزىلدى.