سەنبى, 2 ماۋسىم 2012 7:39
ۆەلوسپورت جانكۇيەرىن دۇرلىكتىرگەن دجيرو ۆەلوبايگەسى دە مارەگە جەتتى. 21 كەزەڭدە 3500 شاقىرىمدى ۆەلوسيپەد ەرشىگىنە وتىرىپ باعىندىرعان 200-گە جۋىق شاباندوز ەلدەرىنە ورالدى. بيىلعى 95-ءشى «دجيرو» كانادا ساڭلاعى, «Garmin-Barracuda» وكىلى رايدەر حەشەدالعا باعىندى.
سەنبى, 2 ماۋسىم 2012 7:39
ۆەلوسپورت جانكۇيەرىن دۇرلىكتىرگەن دجيرو ۆەلوبايگەسى دە مارەگە جەتتى. 21 كەزەڭدە 3500 شاقىرىمدى ۆەلوسيپەد ەرشىگىنە وتىرىپ باعىندىرعان 200-گە جۋىق شاباندوز ەلدەرىنە ورالدى. بيىلعى 95-ءشى «دجيرو» كانادا ساڭلاعى, «Garmin-Barracuda» وكىلى رايدەر حەشەدالعا باعىندى.
«استانا» تەرگەن جەمىسكە كەلسەك, ەكى كەزەڭدىك جارىستا تۇعىردان قول بۇلعادىق. جالپى ەسەپتەگى ەڭ ۇزدىك كورسەتكىش كوماندا كاپيتانى رومان كرويتسيگەردىڭ ەنشىسىندە. قازاقستاندىقتار اراسىندا اندرەي زەيتس 85 ورىنعا جايعاستى. ال سوڭعى جەكەلەي سىندا الەكساندر دياچەنكو كوشباسشى ماركو پينوتتيدەن (BMC Racing Team) 2 مينۋت 13 سەكۋند ارتتا قالىپ, 37-ورىننان كورىندى.
ءۇمىتسىز شايتان
قازاقستاندىق ءبىر توپ جۋرناليست يتالياعا «دجيرو» كوپكۇندىگىنىڭ 18-كەزەڭى اياقتالعاندا جەتتىك. ءبىز كەلگەندە, «استانا» كومانداسىنىڭ تەحنيكالىق قىزمەتكەرلەرى, ءبىرى شايتاناربانى جۋىپ, ءبىرى مايلاپ الەك ەكەن. شاباندوزداردىڭ ءوزى تىنىعۋعا ءبولمەلەرىنە اتتانىپتى. كوماندانىڭ سپورت باسشىلارى باس قوسقان جينالىستان جاڭا شىققان دميتري سەدۋندى سوزگە تارتتىق. بىلگىمىز كەلگەنى – تىم جاقسى كەلە جاتقان كوماندانى اياقتان شالعان نە قىرسىق؟
«ون جەتىنشى كەزەڭدە روماننىڭ اياق تامىرلارى تارتىلىپ, مارەگە زورعا جەتتى. ءوز باسىم روماندى مۇنداي كۇيدە كورگەنىم جوق. سونىڭ سالدارىنان 11 مينوت ارتتا قالىپ, جالپى ەسەپتە جيىرماسىنشى ورىننان ءبىر-اق شىقتى. مۇمكىن, «دجيروعا» دايىندىق بارىسىندا ەسكەرىلمەگەن, كوڭىل بولىنبەگەن تۇستار بولعان شىعار. بىراق, ول ءالى جاس. ۇلكەن جەڭىستەرى الدا دەپ سەنىڭىزدەر. ال كوماندا تاكتيكانى وزگەرتتى. سوڭعى ەكى تاۋلى كەزەڭدە جەڭىسكە جەتۋگە بارىمىزدى سالىپ جاتىرمىز», دەپ اعىنان جارىلدى استانا باپكەرى.
«دجيرونى» باعىندىرۋ
ۆەلوشاباندوزدار سورەدەن شىعىپ, جارىس جولىنا شىققان سوڭ, ءبىز اۆتوكولىككە وتىرىپ, تەڭىز دەڭگەيىنەن 2757 مەتردە ورنالاسقان پاسسو دەللو ستەلۆيو شاڭعى شيپاجايىنا تارتتىق. ايتا كەتۋ كەرەك, 2010 جىلى ءدال وسى جەردە قازاقستان ساڭلاعى الەكساندر ۆينوكۋروۆ «ترەنتينو» جارىسىندا قارسىلاستارىن شاڭ قاپتىرىپ, مارەنى ءبىرىنشى بولىپ كەسكەن ەدى. ەلىمىزدىڭ اتاق-داڭقىن اسپانداتقان ستەلۆيو مارەسىنە ۇمىتپەن قارادىق. ءبىر قىزىعى, ادەتتە جارىس جولى «دجيرونىڭ» رەسمي ءتۇسى – قىزىل-كۇلگىن ءتۇستى شارلارمەن بەزەندىرىلەتىن. ءمارەگە ەكى شاقىرىم قالعاندا اينالاعا بايراعىمىز تۇستەس شارلاردىڭ ىلىنگەنىن كوزىمىز شالدى. ءىشىمىزدەن ونى دا جاقسىلىققا بالادىق. ايتقانداي-اق, ويلاماعان جەردەن چەحتىڭ ورىمدەي جىگىتى رومان كرويتسيگەر سۋىرىلىپ العا ۇمتىلدى. قاسىندا سەنىمدى كومەكشىلەرى قازاقستاندىق اندرەي زەيتس پەن بەلگيالىق لەگيونەر كەۆين سەلدرايەرس. ارتىنان ميشەل سكارپوني باستاعان ءجۇيرىكتەر قۋىپ كەلەدى. مارەگە ءىلىنگەن كوگىلدىر ەكراننان كوز الماي قاراپ وتىرعان جانكۇيەرلەر رومان مارە سىزىعىن كەسكەندە, «استانا! رومان!» دەپ شۋ ەتە قالدى.
كوماندالىق ارىپتەسىن قولداۋعا كەلگەن الەكساندر ۆينوكۋروۆ «رومانعا العىسىمىز شەكسىز. ءبۇگىنگى جەڭىس ناعىز مىقتىلاردىڭ قولىنان عانا كەلەدى», دەدى.
استانانىڭ بەتىن قاقپا, بەلىن بۋ
ەندى ءبىر ايدان سوڭ مارتەبەسى ەڭ جوعارى «تۋر دە فرانس» ۆەلودوداسى باستالادى. «استانا» سلوۆەنيالىق يانەتس برايكوۆيچتى كاپيتان سايلاپتى. الەكساندر ۆينوكۋروۆ تا بار قاتاردا. ونىڭ ءمىندەتى – جارىس جولىندا جاستارعا اقىل-كەڭەس بەرۋ. ال باستى ماقساتى – سپورتپەن قوشتاسار الدىندا فرانتسيادا كەزەڭدىك جارىستاردىڭ ءبىرىندە توپ جارۋ. ەلىمىزدىڭ اتاق-داڭقىن اسپانداتۋگا بەل بۋعان ساڭلاقتارىمىزعا اق جول تىلەيىك! وسىعان بايلانىستى ەرەسەكتەر «استاناسى» مەن وتكەن جىلى قۇرىلعان «استانا-2» جوباسىنىڭ تىزگىنىن قاتار ۇستاعان دميتري سەدۋنعا «قاراكوز ۆەلوسپورتشىمىز قاشان شىعادى؟» دەپ سۇراقتى توتەسىنەن قويدىق. «قازاق ۆەلوسيپەد تەبە الادى. ءبىر-ەكى جىلدا قازاقتان تاعى ءبىر ۆينوكۋروۆ شىعىپ جاتسا, تاڭقالماڭىز. ماقسات ايازباەۆ, نۇربولات قۇلىمبەتوۆ, نازار جۇمابەكوۆتەر بار. ايانباي تەر توكسە, بولاشاعى زور جىگىتتەر», دەپ قىسقا قايىردى ول.
دينا ىسقاقوۆا, جۋرناليست, ارنايى
«ەگەمەن قازاقستان» گازەتى ءۇشىن.
الماتى – ميلان – ترەۆيزو – پامپەاگو – ستەلۆيو – الماتى.