اپات ايتىپ كەلمەيدى دەيدى. اسىرەسە, ساقتىق شارالارى ءتيىستى دارەجەدە قولعا الىنباعان كەزدە اپپاتتىڭ قاۋىپتىلىگى ەكى ەسە ارتا تۇسەدى. سونىڭ ءبىرى استانا قالاسىندا سوڭعى كەزدەرى ءورت جيىلەپ كەتتى. وتكەن اپتانىڭ وزىندە الماتى اۋدانى بويىنشا 9 ءورت وقيعاسى تىركەلدى. ماسەلەن, اقپان ايىنىڭ اياعىندا ورتكە قارسى قىزمەت ءبولىمىنىڭ جەدەل باسقارۋ ورتالىعىنا اقان سەرى كوشەسىندەگى جەكە تۇرعان جەر ۇيدە ءورت شىققاندىعى تۋرالى حابار ءتۇستى. بىراق حابار كەش تۇسكەن سوڭ ءورت سوندىرۋشىلەر وقيعا ورنىنا جەتكەندە جالىن 20 شارشى مەتر كولەمدى شارپىپ ۇلگەرگەن ەكەن. وكىنىشكە وراي, ءتىلسىز جاۋ 5 ادامنىڭ ءومىرىن جالماپ كەتتى.
ال جالپى سوڭعى 2 ايدا استانادا 182 ءورت تىركەلىپ, 11 ادام قازا تاپتى, بۇل بىلتىرعى جىلمەن سالىستىرعاندا 17 پايزعا كوپ دەگەن ءسوز. ءورت وقيعاسىنان تۋىنداعان ادام ءولىمى دە بىلتىرعى جىلمەن سالىستىرعاندا 80 پايىزعا ارتىپ وتىر. ءورتتىڭ باستى سەبەپتەرى ەلەكتر قۇرالدارىن ورناتۋ نورمالارىنىڭ بۇزىلۋى, پەش جاققان كەزدە ءورت قاۋىپسىزدىگى شارالارىنىڭ ساقتالماۋى جانە ابايلاماۋ سالدارى بولىپ وتىر. كوپشىلىك ءورت قاۋىپسىزدىك ەرەجەسىنە نەمقۇرايلى قارايدى.
سونىڭ سالدارىنان ەلوردادا جەر ۇيلەردە تۇرعىنداردىڭ ءيىستى گازدان ۋلانىپ اۋرۋحانالارعا ءتۇسۋى, قازا بولۋ فاكتىلەرى دە كوبەيىپ كەتتى. وسىعان بايلانىستى توتەنشە جاعدايلار باسقارماسىنىڭ قىزمەتكەرلەرى استانا قالاسىنىڭ تۇرعىندارىنا ءورت وقيعاسى بولعان جاعدايدا ازاماتتاردىڭ قانداي شارالار قولدانۋ جانە ەلەكتر قۇرالدارى مەن پەشتەردى پايدالانۋ كەزىندە ءورت قاۋىپسىزدىگىن ساقتاۋ قاجەتتىگىن ءتۇسىندىرۋ ماقساتىندا 1 اقپان مەن 1 ءساۋىر ارالىعىندا الماتى اۋدانىنىڭ تۇرعىن ءۇي سەكتورىندا ءورت قاۋىپسىزدىگى ايلىعىن وتكىزۋدى قولعا الدى.
اۆتورى: سەرىك بەيسەمبەكوۆ, استانا تجد الماتى اۋدانىنىڭ اعا ينجەنەرى.