20 ءساۋىر كۇنى تاڭعى ساعات 04:15-تە الماتى-تاشكەنت اۆتوجولىنىڭ 181 شاقىرىمىندا Toyotا Camri جەڭىل اۆتوكولىگى (مەملەكەتتىك ءنومىرى 811 IJA 02) وسى باعىتتا ءجۇرىپ بارا جاتقان Mersedes-Bens 814 (مەملەكەتتىك ءنومىرى 209 HOA 08) جۇك كولىگىنىڭ ارتىنا سوعىلعان. اپات سالدارىنان جەڭىل كولىكتە وتىرعان ايەل وقيعا ورنىندا كوز جۇمدى. سول ساتتە شىمكەنت قالاسىنان الماتى قالاسىنا باعىت العان Van Hool (مەملەكەتتىك نومەرى 8213 FA 13) اۆتوبۋسى اپاتقا ۇشىراعان كولىكتى اينالىپ وتپەك بولىپ, اۋدارىلىپ, 8 جولاۋشى وقيعا ورنىندا قازا بولدى. كولىك ىشىندە بولعان 46 ازاماتتىڭ 44-ءى وزبەكستان ازاماتتارى بولسا, قالعان 2 جولاۋشى قازاقستاندىق ازاماتتارى بولىپ شىقتى.
جامبىل وبلىسى اكىمى ءباسپاسوز قىزمەتىنىڭ حابارلاۋىنشا, وقيعا ورنىنا جەدەل تۇردە قورداي اۋدانىنىڭ اكىمى بولاتبەك بايتولە جانە جەدەل جاردەم, توتەنشە جاعداي قىزمەتتەرى جەتىپ, زارداپ شەككەندەردى وتار ستانتسياسىنداعى جانە قورداي اۋدانىنداعى اۋرۋحانالارعا جەتكىزدى. اپاتقا ۇشىراعانداردىڭ 2-ەۋى اۋرۋحاناعا جەتپەي كوز جۇمعانى بەلگىلى بولدى. سونىمەن, اپات سالدارىنان 11 ادام قازا تاپتى. سونداي-اق, 5 ادام وتا ۇستەلىندە, ال 3 ادام جان ساقتاۋ بولىمىندە جاتىر. جاراقات العان باسقا جولاۋشىلارعا ءتيىستى كومەك كورسەتىلۋدە. زارداپ شەككەندەرگە جەدەل كومەك كورسەتۋگە جامبىل وبلىستىق دەنساۋلىق باسقارماسىنىڭ باسشىسى مارات جۇمانقۇلوۆ باستاعان 3 وتاشى-دارىگەر تىكۇشاقپەن قورداي اۋدانىنا جەتكىزىلدى.
ورىن العان وقيعاعا قاتىستى بۇگىن تاراز قالاسىندا ارنايى كوميسسيا قۇرىلدى. كوميسسيا قۇرامىندا جامبىل وبلىسى اكىمىنىڭ ءبىرىنشى ورىنباسارى بەكبولات ورىنبەكوۆ, وبلىستىق پوليتسيا دەپارتامەنتىنىڭ باستىعى, پولكوۆنيك ارمان ورازاليەۆ جانە باسقا دا ءتيىستى لاۋازىم يەلەرى بار. كوميسسيا وقيعا ورنىنا بارىپ, جول-كولىك وقيعاسىنىڭ ءمان-جايىن انىقتاپ, زارداپ شەككەندەرگە ساپالى كومەك كورسەتۋدى ۇيىمداستىرۋدا. سونىمەن بىرگە وقيعا ورنىندا جامبىل وبلىسىنىڭ پروكۋرورى جارقىن قۇسايىنوۆ جۇمىس جاساۋدا. ال, اپاتقا قاتىستى قازاقستان رەسپۋبليكاسى قىلمىستىق كودەكسىنىڭ 345 بابىنىڭ 4 تارماعىنا ساي قىلمىستىق ءىس قوزعالدى.
جامبىل وبلىسى