ماڭداي تەر, تابان اقىسىن كوپ ۋاقىتتان داۋلاپ, الا الماي جۇرگەندەر قاتارى دا ازايار ەمەس. بۇگىنگى كۇنى كاسىپورىن-مەكەمەلەردىڭ قارىزى 100 ميلليون تەڭگەگە جەتەعابىل. جۇمىسشى-قىزمەتكەرلەردى قىسقارتپاۋ, جالاقىنى ۋاقىتىلى تولەپ وتىرۋ جونىندە 12 مىڭعا جۋىق مەموراندۋم جاسالعانىمەن, ءتۇيىندى پروبلەمالار جەتىپ ارتىلادى.
«11 ءىرى كاسىپورىنمەن 2018-2025 جىلدار ارالىعىن قامتيتىن جول كارتاسى جاسالعان. ۇجىمدىق كەلىسىم -شارتپەن ەڭبەككەرلەردىڭ 94,7 پروتسەنتى قامتىلعان. بيىل وندىرىستە ورىن العان وقىس وقيعالاردىڭ سانى 55,6 پروتسەنتكە تومەندەگەن. ەڭ باستىسى – جالاقىنى ۋاقىتىندا تولەۋ, ونىڭ مولشەرىن ارتتىرۋ», دەدى ەڭبەك قۇقىعى ماسەلەلەرى تالقىلانعان جيىندا ايماق باسشىسى قۇمار اقساقالوۆ.
قۇمار ىرگەباي ۇلىنىڭ ايتۋىنشا, ءاربىر جۇمىسبەرۋشى ازىق-ت ۇلىك پەن كوممۋنالدىق قىزمەت باعاسىنىڭ جوعارىلايتىنىن ەسەپكە الىپ وتىرۋلارى كەرەك. كەي اۋدانداردا بۇل ءىس ءجوندى جۇرگىزىلمەيدى. سالدارىنان قاراپايىم ادامدار از ەڭبەكاقىعا كۇن كورۋگە ءماجبۇر. رەسپۋبليكاداعى ورتاشا جالاقى كورسەتكىشى بويىنشا تەرىسكەي ءوڭىرى كوش سوڭىندا كەلەدى. ءىرىلى-ۇساقتى 5 مىڭنان اسا كاسىپورىندا 200 مىڭداي ادام جۇمىس ىستەيدى. اگرارلى ولكەدە تۇرعىنداردىڭ ءال-اۋقاتىن جاقسارتۋ–باستى مىندەتتەردىڭ ءبىرى.
وتىرىستا شارۋاشىلىق-كاسىپورىن باسشىلارى تاراپىنان جۇمىسشى- قىزمەتكەرلەرگە جاسالىپ وتىرعان الەۋمەتتىك قولداۋلار مىسالعا كەلتىرىلدى. ماسەلەن, «مامبەتوۆ جانە ك» كس-ءنىڭ ديرەكتورى ەركەبۇلان مامبەتوۆ ەكى اۋىل تۇرعىندارىن قامقورلىققا العان. مەڭگەسەر مەن بەكسەيىت ەلدى مەكەندەرىندە بۇلدىرشىندەرگە ارناپ شاعىن ورتالىق اشقان. 3 جىلدىڭ ىشىندە جاس ماماندار ءۇشىن 8 باسپانا تۇرعىزىلعان. بيىل تاعى 4 ءۇي سالىنادى. تۇرعىندار تەك كوممۋنالدىق قىزمەتتەر ءۇشىن عانا اقى تولەيدى.
دەسەك تە, جولداردى اسفالتتاۋعا, قالپىنا كەلتىرۋگە شارۋاشىلىقتاردىڭ كۇشى جەتە بەرمەيدى.
«بيىل 700 شاقىرىم اۆتوموبيل جولدارىن جوندەمەكپىز. بىراق, تراسسانى كوپ ۇزاماي جۇك كولىكتەرى بۇزىپ تاستايدى. وسىدان ءۇش جىل بۇرىن پەتروپاۆل مەن كوكشەتاۋ اراسىنداعى جول وتە ساپالى سالىنعانىنا قاراماستان كەي جەرلەرىن ءىرى جۇك كولىكتەرى جارامسىز ەتىپ تاستاعان. سوندىقتان, ماشينالاردىڭ قانشا جۇك تاسىمالداپ جاتقانىن ەسەپتەيتىن ارنايى رامالار ورناتۋ قاجەت», دەدى اكىم.