باتىس قازاقستان وبلىسىنىڭ اكىمى التاي كولگىنوۆ, اسسامبلەيا كەڭەسىنىڭ مۇشەلەرى, ەتنومادەني بىرلەستىكتەردىڭ وكىلدەرى قاتىسقان وتىرىستا بقو قحا انالار كەڭەسىنىڭ ءتورايىمى شالقىما قۇرمانالينا «مەكتەپكە دەيىنگى جانە ورتا ءبىلىم بەرۋ جۇيەسىندە ءبىلىم بەرۋ ساپاسىن تۇبەگەيلى جاقسارتۋعا بەلگىلەنگەن تاسىلدەردىڭ ورىندالۋى تۋرالى» بايانداما جاسادى. ول پەداگوگتاردىڭ بىلىكتىلىگى, ءبىلىم بەرۋ جۇيەسىنە جاڭا تەحنولوگيانى ەنگىزۋ, ماتەريالدىق-تەحنيكالىق بازانى زامانعا ساي جاڭعىرتۋ ماسەلەسىندە ولقىلىقتار بار ەكەندىگىن ايتتى.
ءوڭىر باسشىسى التاي كولگىنوۆ مەكتەپتە وقۋشىلاردى تاماقتاندىرۋ ماسەلەلەرىنە قاتىستى كوپتەگەن ارىز-شاعىم تۇسەتىنىن مالىمدەپ, «بالالاردى ساپالى تۇردە تاماقتاندىرۋ ءۇشىن ءوڭىر بيۋدجەتىنەن قوماقتى قاراجات بولىنەدى. سوندىقتان بۇل باعىتتاعى ماسەلەلەر ءتيىستى شەشىمىن تابۋى ءتيىس» دەدى. اۋداندار مەن ورال قالاسى اكىمدەرىنە مەكتەپكە دەيىنگى جانە ورتا ءبىلىم بەرۋ سالاسىندا جۇمىس ساپاسىن ارتتىرۋ بويىنشا جاسالىپ جاتقان جۇمىستارعا كەشەندى تالداۋ جۇرگىزۋ تاپسىرىلدى.
«اعايىن» قازاق ەتنو-مادەني بىرلەستىگىنىڭ توراعاسى ماقسوت بەرگەن العاشقى مەديكو-سانيتارلىق جاردەمنىڭ قولجەتىمدىلىگى جانە مەديتسينالىق قىزمەت ساپاسى مەملەكەتتىڭ ەڭ باستى قۇندىلىعى – ۇلت دەنساۋلىعىنا ىقپال ەتەتىنىن ناقتى ايتتى.
وڭىردە دارىگەر ماماندارىنىڭ جەتىسپەۋشىلىگى دە بار, وبلىس ورتالىعىندا مەديتسينالىق مەكەمەلەر دە قاجەت. التاي كولگىنوۆ ورال قالاسىنداعى كوپبەيىندى اۋرۋحانا جانىنان جاڭا كارديوورتالىق سالۋ ماسەلەسى جوسپارلانىپ, قاراجات قاراستىرىلعانىن مالىمدەدى. جاڭا كارديوورتالىق قۇرىلىسى 2020 جىلى باستالماق. سونداي-اق ورال قالاسىندا جاڭا, №7 ەمحانا اشۋ قاجەتتىلىگى تۋىنداعان. ءوڭىر باسشىسى قالالىق اۋرۋحانا جاڭا عيماراتقا كوشكەن كەزدە بوساعان كورپۋستى «قاراشىعاناق» ب.ۆ. كومپانياسىنىڭ قاراجاتى ەسەبىنەن كۇردەلى جوندەۋدەن وتكىزىپ, ەمحاناعا اينالدىرۋ جوسپارىمەن ءبولىستى.
باتىس قازاقستان وبلىسىنىڭ اگروونەركاسىپ كەشەنى الەۋەتىن دامىتۋ تۋرالى بايانداما جاساعان بقو قازاقستان حالقى اسسامبلەياسى قوعامدىق كەلىسىم كەڭەسىنىڭ مۇشەسى جەڭىس ساعيدۋللين سالادا ەڭبەك ونىمدىلىگىن ارتتىرىپ, اۋىل شارۋاشىلىعى ونىمدەرىن وڭدەۋ, زاماناۋي اگروتەحنولوگيانى قولدانۋ, شەتەلدىك بىلىكتى مامانداردىڭ تاجىريبەسىن پايدالانۋ تۋرالى ماسەلەلەردى كوتەردى. الداعى ۋاقىتتا اۋىل كاسىپكەرلەرىن شارۋاشىلىق جۇرگىزۋدىڭ جاڭا ادىستەرىنە ۇيرەتەتىن كۋرستاردا جاپپاي وقىتۋ جوسپارلانعان.
سۋرەتتى تۇسىرگەن رافحات حالەلوۆ
باتىس قازاقستان