- ەلدوس, بيىلعى ماۋسىمدا دزيۋدودان بىرنەشە حالىقارالىق سىندا تۇعىردان كورىندىڭىز. دەسە دە, ءسىزدى جاراقات ءجيى مازالاپ جۇرگەنىن بىلەمىز. ەكاتەرينبۋرگتەگى Grand Slam تۋرنيرىنە دە قاتىسپاۋىڭىزدىڭ ءبىر سەبەبى وسى. قازىرگى كەزدە دەنساۋلىعىڭىز قالاي؟
- اللاعا شۇكىر, ءبارى جاقسى. سپورت بولعان سوڭ, جاراقات تا قاتار جۇرەدى. ونىڭ ۇستىنە, جەكپە-جەك تۇرىندە جاراقات الماۋ مۇمكىن ەمەس. مۇنداي كىشىگىرىم سىرقاتتارمەن كۇرەسە بەرەمىز. دارىگەرلەر نۇسقاۋىن تولىعىمەن ورىنداپ, كەلەسى جارىسقا دەيىن قالپىما كەلۋگە, بابىما ەنۋگە تىرىسامىن. باستىسى, سپورتتاعى عۇمىرىڭا بالتا شاباتىن, ءارى قاراي كۇرەسۋگە مۇمكىندىك بەرمەيتىن جاراقاتتاردان ساقتاسىن. سپورتشى ءۇشىن بۇدان اسقان وكىنىش جوق.
- بۇيىرسا, جاقىن ارادا قىتايدىڭ حوحوت قالاسىنداعى تۋرنيرگە قاتىساسىز. سول جارىستان باستاپ وليمپيادا ويىندارىنا تولىققاندى ۇپاي بەرىلە باستايدى. ءارى قاراي الەم چەمپيوناتى دا الىس ەمەس. باستى قارسىلاستار كىمدەر بولۋى مۇمكىن؟
- بيىلعى الەم چەمپيوناتى دزيۋدونىڭ وتانى جاپونيادا وتەدى. دەمەك, ەشكىمگە دە وڭاي بولماسى انىق. دزيۋدودا بۇگىن باعى جانىپ, بارلىق قارسىلاسىن قوعاداي جاپىرعان سپورتشى ەرتەڭ ءبىرىنشى اينالىمدا-اق ۇتىلۋى مۇمكىن. سول سەبەپتى, ەشكىمدى بولە جارماي, قارسىلاستىڭ بارىنە بىردەي دايىندالىپ, ارقايسىسىمەن التىنعا تالاساتىنداي سەزىممەن كۇرەسۋ كەرەك دەپ ەسەپتەيمىن. جالپى العاندا, سپورتتىڭ بۇل تۇرىنەن فاۆوريتتەر كوپ, ونىڭ ىشىندە جاپونداردىڭ ورنى ەرەكشە. ءوز جەرىندە وتەتىن سىندا ولاردىڭ ايانىپ قالمايتىنى انىق. سوندىقتان, ءوزىم جاپون حالقىنىڭ بالۋاندارىن باستى قارسىلاس ەسەپتەيمىن.
- بيىلدان باستاپ دزيۋدوشىلار وليمپيادا جولداماسى ءۇشىن تارتىسۋدا. ءاربىر جارىستا ۇپاي بەرىلىپ, رەيتينگ ءتۇزىلىپ وتىرادى. ۇلتتىق قۇرامانىڭ باس باپكەرى ايدىن سماعۇلوۆ ءسىزدى وليمپياداداعى باستى ۇمىتتەردىڭ بىرىنە بالاپ وتىر. جالپى, وسىلاردىڭ بارىنە پسيحولوگيالىق تۇرعىدان دايىنسىز با؟
- شىنى كەرەك, مۇنداي كەزەڭنەن الدەقاشان ءوتىپ كەتتىم. تالاي جارىسقا قاتىسىپ, تالاي مارتە ەلىمىزدىڭ بايراعىن كوتەردىم. تاتاميدە كىل مىقتىلارمەن كۇرەسىپ ءجۇرمىن. سوندىقتان, ماعان ءۇمىت ارتىلۋى دا زاڭدى. بىراق پسيحولوگيالىق تۇرعىدان بۇل ماعان ايتارلىقتاي اسەر ەتپەيدى. ويتكەنى, مەن جارىس رۋحىنا ۇيرەندىم. مەن ءۇشىن تۋرنيرلەردىڭ اتى عانا وزگەرىپ تۇرادى, ال قارسىلاستاردىڭ بارلىعى دا سول بۇرىنعى جىگىتتەر. قاراپ وتىرسام, بۇگىنگە دەيىن وليمپيادادان باسقا تۋرنيرلەردىڭ بارىنەن التىن الىپپىن. ريو ويىندارىنىڭ فينالىندا التىنعا قول سوزىم جەردەن توقتاپ, كۇمىستى قاناعات تۇتقانىمدى بىلەسىزدەر. مىنە, سول وليمپيادا التىنى مەنىڭ سپورتتى اياقتاماي, ءارى قاراي تالپىنۋىما سەبەپكەر بولىپ وتىر. وليمپيادانىڭ التىنى ءۇشىن كۇرەسىپ ءجۇرمىن. بۇيىرسا, سول ارمانىما جەتۋ ءۇشىن بار كۇشىمدى سالامىن.
- ءسىز الەمدەگى شەبەر دزيۋدوشىلاردىڭ ءبىرىسىز. بۇگىنگە دەيىن سىزگە ىڭعايسىز قارسىلاس سانالعان بالۋان بار ما؟
- ماعان قارسىلاستاردىڭ بارلىعى دا بىردەي. كەرىسىنشە, كوپشىلىك بالۋاندار ءۇشىن مەن ىڭعايسىز سپورتشى سانالامىن. «بالۋانعا وڭى مەن سولى بىردەي» دەمەكشى, مەن وڭ جاقپەن دە, سول جاقپەن دە كۇرەسە بەرەمىن. ال كوپتەگەن دزيۋدوشىلار ءۇشىن وڭ نەمەسە سول جامباسى ىڭعايلى.
- حوحوتتاعى تۋرنيرگە دايىندىعىعىز قالاي؟
- دايىندىق جوعارى دەڭگەيدە ءوتىپ جاتىر. ءبىزدىڭ سپورتتا دەمالاتىن ۋاقىت جوق. جارىستار تىزبەگى بىرىنەن سوڭ ءبىرى جالعاسىپ جاتىر. توكيو ويىندارىنا جولداما الۋ ءۇشىن الەم بالۋاندارى جانتالاسۋدا. سولاردىڭ قاتارىندا ءبىز دە بارمىز. سول سەبەپتى, جەڭىسكە جەتىپ, ۇپاي جيناپ, ليتسەنزياعا يەلىك ەتۋ ءۇشىن بار كۇشىمىزدى سالامىز.