دەپۋتاتىق ساۋالدىڭ تولىق ءماتىنىن نازارلارىڭىزعا ۇسىنىپ وتىرمىز:
قازاقستاننىڭ حالىقارالىق بەدەلىنە ۇلكەن ۇلەس قوسىپ كەلە جاتقان سالا – ونەر مەن سپورت سالاسى. بۇل ەكى سالاعا ماماندار دايىنداۋدىڭ وزىندىك ەرەشەلىكتەرى بار. سەبەبى ەكى سالاعا دا ماماندار دايىنداۋ مەكتەپتەن باستالادى. ونەر جانە سپورت سالاسىنداعى ارنايى مەكتەپتەردە 4-ءشى سىنىپتان دايىندىق باستالىپ, ولار كەيىن ءوز بىلىمدەرىن ورتا ارنايى وقۋ ورىندارى – كوللەدجدەردە, سونان سوڭ جوعارى وقۋ ورىندارىندا جالعاستىرادى. قازاقستانداعى ونەر جانە سپورت سالاسىنداعى ۇزدىكسىز ءبىلىم بەرۋ جۇيەسىنىڭ قالىپتاسۋىنىڭ ناتيجەسىندە بىلىكتىلىگى جوعارى ماماندار ءار ءتۇرلى حالىقارالىق بايقاۋلار مەن جارىستاردا, وليمپيادالاردا ەلدىڭ نامىسىن قورعاپ, جوعارى جەتىستىكتەرگە جەتۋدە. قازىر ەلىمىزدەگى ونەر سالاسىنداعى 7 كوللەدجدە جىل سايىن 600 – دەن استام تۇلەك بىتىرسە, ال سپورت سالاسىندا مامان دايىندايتىن 5 ارنايى كوللەدجدە 200-گە جۋىق تۇلەك بىتىرەدى. جىل سايىن تۇلەكتەردىڭ 60-70 % جوعارى وقۋ ورىندارىنا قۇجات تاپسىرادى. الايدا سوڭعى جىلدارى كوللەدج تۇلەكتەرىنىڭ جوعارى ءبىلىم الۋىنا بەلگىلى ءبىر كەدەرگىلەر تۋىنداۋدا. ونەر جانە سپورت سالاسىنداعى كوللەدجدەردە وقىپ ءجۇرىپ, حالىقارالىق دەڭگەيدە جوعارى جەتىستىككە جەتكەن تۇلەكتەر جوعارى وقۋ ورىندارىنا ءتۇسۋ بارىسىندا كەشەندى تەستىلەۋدەن تومەن باعا الىپ, مەملەكەتتىك سۇرانىس بويىنشا بەرىلگەن ورىندارعا وتە الماي قالادى.
اتاپ ايتقاندا, 2018 جىلى «دەنە شىنىقتىرۋ جانە سپورت» ماماندىعىنا بولىنگەن 450 گرانتقا 2 353 ءوتىنىش بەرىلدى. ءوتىنىش بەرگەندەردىڭ ىشىندە 1222 سپورتشى بولىپ, بايقاۋ قورىتىندىسى بويىنشا ولاردىڭ تەك 107 ادام عانا ءبىلىم گرانتىن الدى. ناتيجەسىندە جۇزدەگەن سپورتشىلار, ءار ءتۇرلى جارىستاردىڭ چەمپيوندارى مەن جۇلدەگەرلەرى, حالىقارالىق دارەجەدەگى 11 سپورت شەبەرى, 50 سپورت شەبەرى جانە 300-دەن استام سپورت شەبەرىنە ۇمىتكەر مەملەكەتتىك گرانتتان تىس قالدى. ولاردىڭ قاتارىندا قازاقستاننىڭ الدىڭعى قاتارلى سپورتشىلارى فريستايلدان ەۋروپا چەمپيونى امرەنوۆا اياۋلىم, دزيۋدودان الەم چەمپيونى ىستىباي ايبولات, كاراتەدەن الەم چەمپيوناتىنىڭ قولا جۇلدەگەرى بەلىح يواننا جانە قول كۇرەستەن نارىك دينارا, كاراتەدەن ازيا چەمپيونى وسپانوۆا گۇلدانا جانە كوپتەگەن سپورتشىلار بار.
سەناتور جوعارىدا اتالعانداردى نەگىزگە الا وتىرىپ ارنايى كوللەدجدەردىڭ تۇلەكتەرىن ونەر مەن سپورت سالاسىنداعى جەتكەن تابىستارىنا سايكەس كەشەندى تەستىلەۋدەن بوساتۋدىڭ تەتىكتەرىن قاراستىرۋ تۋرالى تالاپ قويدى.