قالانىڭ بارلىق اۋداندارىنداعى اۋلالار, كوشەلەر, اۆتوتۇراقتار, دەمالىس ورىندارى تەكسەرىلدى.
جاڭا تۋريستىك ماۋسىم قارساڭىندا قالا باسشىسى استانانىڭ تەمىرجول بەكەتتەرىندە بولدى. نۇر-سۇلتان تەمىرجول ۆوكزالىندا تۇراق ورىندارىنىڭ جاعدايىمەن تانىسىپ, تۇرعىندار مەن قوناقتارعا ارنالعان دەمالىس ورىندارىن تەكسەرىپ, وعان جاقىن اۋماقتاردى كوگالداندىرۋ جۇمىستارىن جالعاستىرۋدى تاپسىردى. ودان كەيىن «نۇرلى جول» جاڭا تەمىرجول ۆوكزالىنىڭ ينفراقۇرىلىمىن تەكسەردى. ستانتسيا ديرەكتورىنىڭ ايتۋىنشا, كولىك حابىنىڭ وتكىزۋ قابىلەتى تاۋلىگىنە 35 مىڭ ادامدى قۇرايدى. باقىت سۇلتانوۆ زاڭسىز تاكسي جۇرگىزۋشىلەرى ماسەلەسىن شەشۋدى جانە ۆوكزال ماڭىن «سەرگەك» كامەراسىمەن جابدىقتاۋدى اياقتاۋدى تاپسىردى.
قالانىڭ كوشەلەرىن ارالاعان اكىم اۋلا اۋماقتارىن اباتتاندىرۋ جۇمىستارىنىڭ بارىسىمەن تانىستى. بەيبىتشىلىك كوشەسى بويىنداعى №31, 33, 35 ءۇيدىڭ اۋلالارىن قاراپ شىققاننان سوڭ ب. سۇلتانوۆ, اۋلالاردا اۆتوتۇراق ورىندارىنىڭ جەتكىلىكسىز ەكەندىگىن, اۆتوتۇراق كەڭىستىگىن كەڭەيتۋ تۋرالى ويلاۋدى تاپسىردى.
بۇدان كەيىن نۇر-سۇلتان قالاسىنىڭ اكىمى 2018 جىلى رەسپۋبليكا داڭعىلى مەن دۇكەن ۇلى كوشەسىنىڭ قيىلىسىندا ەلوردانىڭ 20 جىلدىعىنا وراي اشىلعان يلليۋزيا الاڭىنا باردى. باقىت سۇلتانوۆ ونىڭ جاعدايىن قاناعاتتانارلىقسىز دەدى. سارىارقا اۋدانىنىڭ اكىمى ەرعالي ەگەمبەرديەۆتىڭ ايتۋىنشا, بۇعان نىساننىڭ ازىرگە اۋدان اكىمدىگىنىڭ بالانسىنا وتپەۋى جانە وسى ايماققا كىمنىڭ جاۋاپتى ەكەندىگىنىڭ بەلگىسىزدىگى سەبەپ.
باقىت سۇلتانوۆ قورشاعان ورتانى قورعاۋ جانە تابيعاتتى پايدالانۋ باسقارماسىنىڭ جۇمىسىن سىنعا الىپ, ورىنباسارى ارمان تۇرلىبەككە ساياباقتى سارىارقا اۋدانى اكىمدىگىنىڭ بالانسىنا اۋىستىرۋدى, ونى جونگە كەلتىرىپ, جاسىل جەلەكتى جولدان ارىقاراي توسەۋدى تاپسىردى.
بۇدان باسقا, قالا اكىمى دۇكەن ۇلى كوشەسىندەگى سۇرىلگەن تۇرعىن ۇيلەردىڭ ورنىن تەكسەرىپ, جاۋاپتى تۇلعالارمەن كوشەنى جوندەۋ ماسەلەلەرىن تالقىلادى. اكىمگە حابارلاعانداي, دۇكەن ۇلى كوشەسىنىڭ جالپى ۇزىندىعى 1,9 شاقىرىمدى قۇرايتىن بەيبىتشىلىك كوشەسىنەن فۋرمانوۆا كوشەسىنە دەيىنگى ارالىعى جوندەۋ جۇمىستارىن جوبالاۋ ساتىسىندا. جالپى 24 گاراجدى جانە التى جەكە ءۇيدى بۇزۋ كوزدەلگەن. وعان قارجىلاندىرۋ قاجەت.
اكىم سونداي-اق, «اقىلدى اۋدان» جوباسى ىسكە اسىرىلىپ جاتقان «جاستار» ىقشام اۋدانىن قاراپ, بايقوڭىر اۋدانىنىڭ اكىمى ەرلان قاناليموۆپەن اۋلالاردى اباتتاندىرۋ جانە جولداردى جوندەۋگە قاتىستى سۇراقتاردى تالقىلادى. باقىت سۇلتانوۆتىڭ ايتۋىنشا, «جاستار» شاعىن اۋدانى ءالى «اقىلدى ايماق» بولۋعا دايىن ەمەس, ءالى دە كوپ جۇمىستار اتقارىلۋى كەرەك. قالا باسشىسى بايقوڭىر اۋدانىنىڭ اكىمىنە شاعىن اۋداندى اباتتاندىرۋعا قاتىستى بىرقاتار ناقتى تاپسىرما بەردى.
بۇدان بولەك, ب. سۇلتانوۆ «وتان قورعاۋشىلار» ەسكەرتكىشىندەگى الاڭعا بارىپ, ەسكەرتكىشتى تەكسەرىپ, الاڭدى ارالاپ شىقتى. اكىمنىڭ بۇيرىعىمەن مامىر مەرەكەسىنە دەيىن وسى ايماقتا اعىمدىق جوندەۋ جۇمىستارى, ال جىلدىڭ سوڭىنا قاراي كۇردەلى جوندەۋ جۇمىستارى جۇرگىزىلمەك.
ارى قاراي باقىت سۇلتانوۆ بوتانيكالىق باققا باردى. مۇندا اكىم جولعا توسەلگەن كەسپەتاسقا نازار اۋداردى.بۇدان بولەك ول بەلگىنى لاتىن قارپىندە جازىلعان جاڭا بەلگىگە اۋىستىرۋ قاجەتتىگىن اتاپ ءوتتى.
وسى جەردە قالا باسشىسى ەسىل اۋدانىنىڭ اكىمى تولەگەن زاكاريانوۆپەن جانە ارمان تۇرلىبەكپەن اۋماقتى اباتتاندىرۋ, قالالىق سەنبىلىككە دايىندىق جانە كوگالداندىرۋ ماۋسىمىنا دايىندىعىن تالقىلادى.