فورۋم اياسىندا نۇر-سۇلتان دەلەگاتسياسى «Routes Silk Road 2019» ۇيىمداستىرۋشىسى رەتىندە جىبەك جولى اتتى تۇساۋكەسەرىن وتكىزدى. «جىبەك جولىن» دامىتۋعا ارنالعان ارنايى فورۋم وسى جىلدىڭ شىلدە ايىندا «Routes» كومپانياسىنىڭ قولداۋىمەن وتەدى.
قازاقستان وسىعان ۇقساس ءىس-شارانى وتكىزۋ قۇقىعىن العان ورتالىق ازياداعى العاشقى ەل بولدى. فورۋمدا نۇر-سۇلتاننىڭ ينۆەستيتسيالىق, اۆياتسيالىق جانە تۋريستىك الەۋەتى تانىستىرىلادى.
گاننوۆەردەگى «Routes Europe» قاتىسۋشىلارى نازارىنا قازاقستان ۇكىمەتىنىڭ ەلدەگى تۋريستىك ينفراقۇرىلىمدى جاڭعىرتۋ جانە دامىتۋ, سونداي-اق ۆيزالىق جانە كوشى-قوندى باقىلاۋ, تۋريزم سالاسىن دامىتۋدا اتقارىلىپ جاتقان بىرقاتار شارالار جايلى ايتىلدى.
تانىستىرىلىمدى نۇر-سۇلتان اكىمشىلىگىنىڭ قولداۋىمەن «استانا كونۆەنشن بيۋرو» جشس ۇيىمداستىرعان. پرەزەنتاتسيا ەل استاناسىن زاماناۋي, ىڭعايلى جانە تارتىمدى قالا جانە تۋريستىك حاب رەتىندە تانىتىپ, ەلىمىزدىڭ يننوۆاتسيالىق دامۋى مەن وركەندەۋىنە ىقپال ەتەدى.
ستاتيستيكالىق مالىمەتتەرگە ساي 2018 جىلى ەلىمىزگە كەلگەن شەتەلدىك تۋريستەردىك سانى 10% ارتقان.
بيىل «Routes Europe» ەۋرازيا قۇرلىعىنىڭ تانىستىرعان جۇزگە جۋىق اۆياكومپانيا مەن ءۇش ءجۇز اۋەجايدان 1,2 مىڭنان استام دەلەگاتسيا قاتىستى, سونداي-اق ءتيىستى مەملەكەتتىك ورگانداردىڭ وكىلدەرى, جەتەكشى حالىقارالىق تۋروپەراتورلار كەلدى.
«Routes Europe» - 1995 جىلدان بەرى گاننوۆەردە جىل سايىن وتكىزىلەتىن اۆياتسيالىق مارشرۋتتاردى دامىتۋ بويىنشا ەۋروپالىق ايماقتىق فورۋم.