قازاقستان مەن رەسەي اراسىنداعى XV ايماقارالىق ىنتىماقتاستىق فورۋمى اياسىندا قاراعاندىلىق جانە رەسەيلىك تۋروپەراتورلار ىنتىماقتاستىق تۋرالى كەلىسىمشارت جاساستى. بۇل قۇجات بويىنشا بيىلدان باستاپ رەسەيدىڭ تۇمەن وبلىسىنىڭ تۋريستەرى بالقاش كولىنە كەلىپ دەمالاتىن بولادى. ولار ءۇشىن ازىرلەنگەن تۋر باعدارلاماسىندا قازاقستان استاناسى – نۇر-سۇلتان قالاسىنىڭ كورىكتى جەرلەرىنە ەكسكۋرسيا جاساۋ جانە بالقاش كولىنە ترانسفەر قاراستىرىلعان. باعدارلاما ۇيلەستىرۋشىلەرى رەسەيلىكتەردى جاڭا تۋريستىك مارشرۋتتا كوزدەلگەن جايماشۋاق كۇن مەن جايلى جاعاجاي عانا ەمەس, سونىمەن قاتار تارتىمدى باعالار دا قىزىقتىرادى دەگەن سەنىمدە. تۇمەندىكتەر ءتۇسەتىن نەگىزگى نىسان رەتىندە شۇبارتۇبەك جانە توراڭعىلىق دەمالىس ايماقتارى بەلگىلەنگەن.
سونداي-اق اتالعان فورۋمدا ءتۋريزمدى دامىتۋداعى جاڭا تاسىلدەر مەن ۇردىستەر دە تالقىلاندى.
بۇگىنگى كۇندە ءتۋريزمدى دامىتۋ مەملەكەتتىك باعدارلاماسى بويىنشا بالقاش كولى ماڭىندا جاڭا نىساندار سالۋ, جاعاجايلاردى اباتتاندىرۋ, كوممۋنيكاتسيالاردى جۇرگىزۋ سىندى كەشەندى جۇمىستار قولعا الىنعان. بيىل ۇزىندىعى 360 شاقىرىمدى قۇرايتىن ءتورت جولاقتى «قاراعاندى – بالقاش» اۆتوبانىنىڭ قۇرىلىسىن باستاۋ دا جوسپاردا بار.
قاراعاندى