بىرىنشىدەن, قازاقستان دۇنيە جۇزىندەگى ەڭ وزىق دامىعان وتىز مەملەكەتتىڭ بىرىنە اينالۋعا دەن قويعانى ءمالىم. ول ءۇشىن ەلىمىز الەمدەگى قارقىندى وزگەرگەن جاعدايلارعا جىلدام ءارى ۇتىمدى بەيىمدەلە بىلگەنى ءجون. دەمەك, بۇل قادام سايلاۋ سەكىلدى مەملەكەتتىك ماڭىزدى ءىستى كەلەر جىلعا دەيىن سوزبالاڭعا سالماي, الەمدەگى احۋالدىڭ ودان ءارى كۇردەلەنۋىن كۇتپەي, الدىن الا قيمىلداۋعا باعىتتالۋدا. ايتپەسە, تەگەۋرىنى توتەن, تەپكىسى قاتتى زاماندا ەلەكتورالدى كەزەڭنىڭ كوپكە ۇزاۋى مەملەكەتتىڭ دامۋىن تەجەۋى, كوشىن كەرى كەتىرۋى ىقتيمال.
ەكىنشىدەن, بۇل بيلىك ءترانزيتىن اياقتاۋ, مەملەكەت تاعدىرىن, ەل تىزگىنىن قازاقستان حالقى سايلاعان پرەزيدەنتكە تابىستاۋ ءۇشىن كەرەك.
وسىنىڭ ارقاسىندا مەملەكەت ءوز ىشىندەگى قوعامدىق پىكىردى تىنىشتاندىرىپ قانا قويماي, وزىنە سۇق كوزىن قاداعان, سۋىق ءسوزىن ارناعان سىرتقى كۇشتەردى دە ساباسىنا تۇسىرەدى, ولاردىڭ ەلدەگى بيلىك اۋىسۋىن پايدالانىپ, قاراۋ نيەتتەرىن جۇزەگە اسىرۋىنا جول بەرمەيدى.ۇشىنشىدەن, بۇل ەل ەكونوميكاسىنا مول قارجى سالعان شەتەلدىك ينۆەستورلاردى الاڭداۋشىلىقتان ارىلتۋ ءۇشىن دە قاجەت: ولار ەلدىڭ تىزگىنى تۇراقتى پرەزيدەنتتە بولۋىن قالايدى.
قازىرگى كەزدە الماعايىپ الەم الاساپىرانعا تۇسۋدە. كوپتەگەن ەلدەر ساياسي, الەۋمەتتىك, ەكونوميكالىق قيىنشىلىقتار مەن قايشىلىقتار قىسپاعىندا قالۋدا. ال قازاقستان جاھاندانۋدىڭ بۇل تەرىس قۇبىلىستارىنا قارسى قارىمدى قايرات كورسەتىپ, تەگەۋرىندى توسپا قۇرىپ, ولاردىڭ مەملەكەتكە جانە ءوز ازاماتتارىنا نۇقسان كەلتىرۋىنە جول بەرمەۋدە. ونىڭ ورنىنا ەلباسىنىڭ «الەۋمەتتىك قامقورلىق» جاڭا الەۋمەتتىك باستامالارى ارقاسىندا مەملەكەتىمىز حالىققا قۋاتتى قولداۋ كورسەتۋدە. بۇل تەك اۋقاتتى, الەۋەتتى ەلدەردىڭ قولىنان عانا كەلەدى.
ەلىمىزدىڭ اتا زاڭىندا: «قازاقستان پرەزيدەنتى – حالىق پەن مەملەكەتتىك بيلىك بىرلىگىنىڭ, كونستيتۋتسيانىڭ مىزعىماستىعىنىڭ, ادام جانە ازامات قۇقىقتارى مەن بوستاندىقتارىنىڭ نىشان-سيمۆولى ءارى كەپىلى» دەپ جازىلعان. ەندەشە, بۇل ماڭىزدى ىسكە بارشا قازاقستان حالقى دا جاۋاپكەرشىلىكپەن قاراپ, بەلگىلەنگەن كۇنى ءوز ىقتيارىن بىلدىرەرىنە سەنىمدىمىن. وسى ارقىلى قازاق ەلى كوشىمىزدىڭ ءتۇزۋ, ىنتىماعىمىزدىڭ بەرىك, باعدارىمىزدىڭ ايقىن, كەلەشەگىمىزدىڭ جارقىن ەكەنىن تاعى ءبىر ايعاقتاي تۇسەدى.باقىتبەك سماعۇل,
«Qazaqstan ardagerleri» قاۋىمداستىعىنىڭ توراعاسى, ءماجىلىس دەپۋتاتى