بيىل ءۇشىنشى رەت وتكەلى وتىرعان ءداستۇرلى مارافون كەڭ كولەمدە بولادى جانە ءۇش مىڭعا جۋىق قاتىسۋشى باق سىنايدى دەپ كۇتىلۋدە. بۇگىنگە دەيىن قازاقستاننىڭ ءىرى قالالارى - نۇر-سۇلتان, الماتى, وسكەمەن, ورال, اقتوبە, كوكشەتاۋدان جەلاياقتار بۇقارالىق جۇگىرۋگە قاتىسۋعا ءوتىنىم بەردى. ءۇشىنشى قايىرمدىلىق جۇگىرۋ شاراسىنداعى بەس قاشىقتىقتىڭ بىرىنە قاتىسۋعا شەتەل ازاماتتارى مۇناي كومپانيالارىنىڭ ماماندارى دا نيەت بىلدىرگەن.
- قاتىسۋشىلاردىڭ تاڭداۋىنا بەس قاشىقتىق 42 كم, 21 كم, 10 كم, 3 كم, 1,2 كم (بالالارعا ارنالعان) ۇسىنىلادى. جەڭىمپازدار جاستارىنا قاراي 76 سانات بويىنشا ماراپاتتالادى. جالپى جۇلدە قورى 5 ملن تەڭگە, - دەدى «Atyrau Marathon-2019» ۇيىمداستىرۋ كوميتەتنىڭ ۆيتسە پرەزيدەنتى يۋري پونومارەۆ.
ۇيىمداستىرۋشىلاردىڭ ايتۋلارىنشا, ەڭ الىس ءۇش قاشىقتىققا قاتىسۋ ءۇشىن اقشالاي تولەم جاساۋ كەرەك, تۇسكەن بارلىق قاراجات قايىرىمدىلىق ماقساتقا-جەتىم جانە الەۋمەتتىك جاعىنان از قامتىلعان وتباسى بالالارىنا جۇمسالادى. 3 جانە 1,2 كم قاشىقتىققا جۇگىرۋگە قاتىسۋ تەگىن. مارافوننىڭ بارلىق قاتىسۋشىلارىنا ەستەلىك مەدال بەرىلەدى, ال جۇلدەگەرلەردى دەمەۋشىلەر دايىنداعان ارنايى سىيلىقتار كۇتىپ تۇر. «Atyrau Marathon-2019» قر تۇڭعىش پرەزيدەنتى جاريالاعان جاستار جىلى اياسىندا وتەدى. ءار ءتۇرلى قاشىقتىقتاعى جۇگىرۋگە قالا مەن وبلىستاعى جاستار وكىلدەرى قاتىسادى.
- جاستار ساياساتىن دامىتۋ-قوعامداعى باستى باعىتتىڭ ءبىرى. ەل بولاشاعى جاستاردىڭ قولىندا. قاي سالادا بولسا دا جوعارى ناتيجە كورسەتىپ, سالاماتتى ءومىر سالتىن قولداپ, سپورتپەن شۇعىلدانۋ كەرەك. سوندىقتان, ءبىز ءوڭىر جاستارىن مارافونعا بەلسەندىلىكپەن قاتىسۋعا شاقىرامىز,- دەدى وبلىستىق دەنە شىنىقتىرۋ جانە سپورت باسقارماسىنىڭ باسشىسى رينات يبراگيموۆ.
مارافونعا قاتىسۋ ءۇشىن www.atyraumarathon.kz سايتىندا جانە قۇرمانعازى-12 مەكەنجايىندا ورنالاسقان INFINITY FITNESS كلۋبىندا تىركەلۋگە بولادى. بۇگىنگە دەيىن 1,5 جەلاياق تىركەۋدەن وتكەن. ايتا كەتۋ كەرەك, مارافوننىڭ بارلىق قاتىسۋشىلارى ءۇشىن اپتا سايىن جاتتىعۋ وتەدى. سەيسەنبى, بەيسەنبى كۇندەرى ساعات 19.30-دا سۇلتان بەيبارىس ەسكەرتكىشى الدىندا, جەكسەنبى 8.00 ح. دوسمۇحامەدوۆ اتىنداعى امۋ ستاديونىندا. «Atyrau Marathon-2019» قايىرىمدىلىق مارافونى 14 ساۋىردە بولادى. مارە ورنى- سۇلتان بەيبارىس الاڭى. بۇقارالىق جۇگىرۋ ۋاقىتىندا ورتالىق كوشەلەردە قوزعالىس شەكتەلەدى. جينالۋ تانعى ساعات 6 - دا.