بەيسەنبى, 23 اقپان 2012 8:10
اپتالاپ سوزىلعان ايازدى كۇندەردىڭ بىرىندە قىزىق بولدى. قىزىق ەمەس, شىجىق بولدى دەگەنىمىز ءجون شىعار. ويتكەنى, ۇرى-قارىڭىز ەكى كەشتىڭ ارالىعىنداعى اپاق-ساپاق ۋاقىتتا قاسىڭدا, قولتىعىڭدا كەلە جاتقان بايبىشەڭىزدىڭ قول سومكەسىن الا قاشىپ, جەتكىزبەي كەتسە, سولاي دەمەگەندە نە دەرسىڭ!
ول ءوزى قىسقارتىپ ايتساق, بىلاي بولدى. ياعني, سول كۇنى قاقاپ تۇرعان ايازعا قاراماستان اباي اتىنداعى دراما تەاترىنا بارعانبىز. وندا ارقالى اقىن ۇلىقبەك ەسداۋلەتوۆ جانە اتاقتى سازگەر-كۇيشى سەكەن تۇرىسبەكوۆپەن كەزدەسۋ وتكەلى جاتسا, ونسىز دا سۋىق ۇيدە قايتىپ قامالىپ وتىرارسىڭ!
بەيسەنبى, 23 اقپان 2012 8:10
اپتالاپ سوزىلعان ايازدى كۇندەردىڭ بىرىندە قىزىق بولدى. قىزىق ەمەس, شىجىق بولدى دەگەنىمىز ءجون شىعار. ويتكەنى, ۇرى-قارىڭىز ەكى كەشتىڭ ارالىعىنداعى اپاق-ساپاق ۋاقىتتا قاسىڭدا, قولتىعىڭدا كەلە جاتقان بايبىشەڭىزدىڭ قول سومكەسىن الا قاشىپ, جەتكىزبەي كەتسە, سولاي دەمەگەندە نە دەرسىڭ!
ول ءوزى قىسقارتىپ ايتساق, بىلاي بولدى. ياعني, سول كۇنى قاقاپ تۇرعان ايازعا قاراماستان اباي اتىنداعى دراما تەاترىنا بارعانبىز. وندا ارقالى اقىن ۇلىقبەك ەسداۋلەتوۆ جانە اتاقتى سازگەر-كۇيشى سەكەن تۇرىسبەكوۆپەن كەزدەسۋ وتكەلى جاتسا, ونسىز دا سۋىق ۇيدە قايتىپ قامالىپ وتىرارسىڭ!
ءسويتىپ, قاس تالانتتارمەن ءوتكەن جىلى ءجۇزدى جۇزدەسۋدەن سوڭ جانىمىز جادىراپ, بويىمىز جىلىنىپ قالعانداي بولعان. سول جاقسى اسەرمەن تايعاناقتاي باسىپ, ءۇيدىڭ بۇرىشىنا ىلىككەنىمىز سول ەدى, سوڭىمىزدان گۇرس ەتكەن ءبىر دىبىس ەستىلدى. مەن بولسام باستاپقىدا بايبىشەم تايعاناقتاپ قۇلاپ قالدى ما دەپ ويلاعانمىن. بىراق ىلە-شالا ونىڭ «سومكەنى الىپ كەتتى» دەگەن داۋسىن ەستىپ, تۇرا ۇمتىلدىم. بىراق كەيىن انىقتالعانىنداي جيىرمانىڭ ءۇستىندەگى جاس جىگىت گۇرس ەتىپ تايعاناقتاپ قۇلاپ تۇسكەنمەن, اتىپ تۇرىپ زىمىراپ بەرگەندە پايعامبار جاسىنا تاقاپ قالعان بىزگە قايدان جەتكىزسىن! ال ساعات ءتىلى كەشكى جەتىگە ءالى جەتپەگەنمەن, ايازدى كۇنى كوشەدە جان بالاسى جوق ەدى.
ارتىنان, ەس جيناعان سوڭ «كادىمگى ءسابيت مۇقانوۆتىڭ» سوڭىندا قالعان ءبىر كۇلكىلى اڭگىمەسى ەسىمىزگە ورالىپ, ال كۇلەيىك. بىردە ءتۇن ءىشىندە دەيدى سابەڭ, اكادەميك مۇحامەتجان قاراتاەۆ ەكەۋمىز قوناقتان شىعىپ, ۇيگە قايتىپ كەلە جاتقانبىز. ءبىر ۋاقىتتا ءالدەكىم مۇحامەتجاننىڭ باسىنداعى ونداترا قۇلاقشىنىن الا قاشسىن. مەن دە ءجۇيرىكپىن عوي, الگىنىڭ سوڭىنان قالماي كەلەمىن. بىراق مۇحامەتجان مەنەن دە جۇيرىك ەكەن, ۇرىڭىزعا تاقاپ-اق قالدى. «ءيا, سودان ۇرىنى ۇستاپ العان شىعار» دەيدى عوي سابەڭنىڭ جەلدىرتىپ ايتقان اڭگىمەسىن ىنتا قويا تىڭداپ وتىرعاندار. سويتسە سابەڭ «ۇرىڭىز مۇحامەتجاننان دا ءجۇيرىك ەكەن, جەتكىزبەي كەتتى» دەيتىن كورىنەدى.
بوراندى كۇنى يت پەن بالا قۇتىرادى دەمەكشى, ايازدى كۇنى ءبىزدى ۇرىڭىز وسىلايشا قاتىرىپ كەتتى. ول قاعىپ كەتكەن سومكەدە ۇيالى تەلەفون مەن ءۇيدىڭ كىلتى, ەڭ باستىسى جولداسىمنىڭ جەكە باسىنىڭ كۋالىگى بار ەدى. اقشا سالعان ءاميانىن سوعان دەيىن دۇكەننەن شىققاندا قالتاسىنا سالا سالعان عوي. بىراق, قالاي دەسەڭىز دە تاپاداي تال تۇستە دەرلىك شاقتا تونالعانىڭىزعا قاپا بولادى ەكەنسىز. «وزىمنەن دە جۇيرىك» ۇرىعا جەتە الماي, تونالعان جەرىمىزگە قايتىپ كەلسەم, ءدال سول تۇستا ءبىر ۇيالى تەلەفون جاتىر ەكەن. مەن ونى سومكەدەن ءتۇسىپ قالعان ءوز دۇنيەمىز بە دەسەم, ولاي بولماي شىقتى.
دەمەك, بۇل الگى سابازدىكى بولۋى مۇمكىن عوي دەگەن ويمەن ۇيگە كەلىسىمەن ورتالىق پوليتسيا ءبولىمىنە تەلەفون شالدىم. وسى ارادا ايتايىن دەگەنىم سول, پوليتسيا قىزمەتكەرلەرى اينالاسى بەس-التى مينۋتتىڭ ىشىندە پاتەرىمىزگە جەتىپ كەلدى. سونسوڭ رۋسلان رىمبەكوۆ, ءبىرجان قۇداجانوۆ دەگەن پوليتسيا لەيتەنانتتارى مەنى ءماشينەگە وتىرعىزىپ الىپ, بىردەن ءىز كەسۋگە شىقتى. شىنى كەرەك, بۇلاردىڭ جەدەل ءىس-قيمىلىنا ءىشىم جىلىپ قالدى. ولار اينالاسى ءبىر ساعاتتىڭ ىشىندە ونشاقتى كۇدىكتىنى تەرگەپ ۇلگەردى. بىراق «ءوز ۇرىمىزدى» تاپ باسىپ تانىماعان سوڭ, باسقانىڭ وبالىنا قالىپ نەمىز بار. وسى ورايدا, سومكەمىز تابىلماي كەتكەن كۇننىڭ وزىندە ءتارتىپ ساقشىلارىنا ريزا ەدىك. ۋاقىتپەن ساناسپاي, كۇنى-ءتۇنى دەرلىك جۇمىستان تابىلاتىن ولاردى دا كەيدە ورىنسىز جازعىرىپ جاتاتىنىمىز راس قوي.
سول كۇنى بولماعانمەن, ۇرىمىز اراعا كۇن سالىپ قولعا ءتۇستى. الگى ءتۇسىپ قالعان ۇيالى تەلەفون سونىكى بولىپ شىقتى. راسىندا سونىكى ەمەس, ونىڭ جولداسىنىكى ەكەن. وسى ەكى ارالىقتا ۇرىمىز ءبىزدىڭ ۇيالى تەلەفوندى وتەم رەتىندە جولداسىنا بەرىپ ۇلگەرىپتى. سونىڭ ءبارىن تەرگەۋشى, پوليتسيانىڭ اعا لەيتەنانتى نۇرجان باشىعۇلوۆ ىندەتىپ وتىرىپ, تەز-اق انىقتادى. ىلە شالا ءبىزدى ۇرىمەن دە بەتتەستىردى. جاسى جيىرمادان ەندى عانا اسقان جاس جىگىت بالالار ءۇيىنىڭ تۇلەگى ەكەن. ونىڭ وسىنىڭ الدىندا عانا تاعى ءبىر ايەلدىڭ قول ءسومكەسىن قاعىپ كەتكەنى دە انىقتالدى.
تەرگەۋشى مۇنىڭ ءىسى ەندى سوتقا جىبەرىلەدى دەگەندە, ءبىز ابىرجىپ قالدىق. جەتىم بالانى سوتتاتىپ نەمىز بار, ءبىز كەشىردىك دەپ جاتىرمىز وزىمىزشە. ارتىنان انا ايەل دە ءبىزدى قوستاپ جاتتى. ال تەرگەۋشى بولسا, ونى مەن ەمەس, سوت شەشەدى دەدى.
ەندى سوتتى كۇتپەسكە امال جوق. وسىندايدا ەرىكسىز ويعا قالادى ەكەنسىز. جاقسى, ۇرى قۇتىلا سالىپ, تۇتىلدى. بىراق, سولاي ەكەن دەپ قۋانۋدىڭ ءجونى قايسى؟ ءار ءنارسەنىڭ سەبەبىمەن عانا ەمەس, سالدارىمەن كۇرەسكەنىمىز دۇرىس بولار. ياعني, جەتىم بالار ءۇيىنىڭ تۇلەگى باسىندا باسپاناسى, اينالىساتىن جۇمىسى بولسا, مۇندايعا بارار ما ەدى؟ ول بىزدەن كەشىرىم وتىنگەندە جۇرەگىمىزگە بىرەۋ ينە سۇعىپ العانداي بولعانى دا راس. مۇمكىن كەرىسىنشە قاتىگەزدەنىپ بارا جاتقان قوعام وسىنداي جەتىمدەردەن كەشىرىم ءوتىنىپ جاتسا, كانەكي! ءايتپەسە, سەبەپتىڭ سالدارىنا ءۇڭىلمەي, قىلمىسكەردى تەك جازالاۋعا عانا ۇمتىلساق, بۇدان قوعامدا ءتارتىپ ورنىعادى دەگەنگە ءوز باسىم سەنبەيمىن!
سولاي سولاي. بىراق, قالاي دەسەك تە ورتالىق پوليتسيا ءبولىمىنىڭ باستىعى الىبەك باعداتوۆ مىرزا بىلتىرعى جىلى ونىڭ الدىنداعى جىلمەن سالىستىرعاندا قىلمىستى اشۋ ءبىرشاما ىلگەرىلەگەنىن ايتقاندا, ول دا دۇرىس ەكەن دەستىك.
داۋلەت سەيسەن ۇلى,
سەمەي.