قوستانايلىق كاسىپكەر گالينا شنايدەر وڭىردە كۇن ەنەرگياسى مەن جەلدى بيزنەس قاجەتىنە تۇڭعىش پايدالانعانداردىڭ ءبىرى. ستۋدەنتتەر مەن كاسىبىن ەندى باستاعاندار ءۇشىن ول قالا ىرگەسىندەگى ءوزى باسقاراتىن «زولوتوي فازان» مەيرامحانا-قوناق ءۇي كەشەنىنە ەكسكۋرسيا ۇيىمداستىردى. كاسىپكەردىڭ «تالىمگەردىڭ ۇستانىمدارىن ۇيرەتەتىن جوبالىق وقۋ» كۋرسى شەڭبەرىندە اڭگىمەسىن ءو.سۇلتانعازين اتىنداعى قوستاناي مەملەكەتتىك پەداگوگيكالىق ۋنيۆەرسيتەتىنىڭ ستۋدەنتتەرى تىڭداۋعا اسا قىزىعۋشىلىق ءبىلدىرىپتى. ويتكەنى جاقىندا عانا وقۋ ورداسىندا «U – SMART» بيزنەس-ينكۋباتور اشىلعان بولاتىن. ەكىنشىدەن ۋنيۆەرسيتەتتە دايىندالاتىن بولاشاق تۋريزم ماماندارى ءبىلىمىن كاسىپكەرلەر تاجىريبەسىمەن تولىقتىرىپ وتىرۋدى ماقسات تۇتادى.
«مەنىڭ ستارتاپتارىم تاقىر جەردەن باستالدى دەسەم بولادى. وزىڭە قولايلى, ەركىن سەزىنەتىن ورنىڭدى, ءىسىڭدى تاۋىپ الۋ – بيزنەستەگى جارتى تابىسىڭ بولىپ تابىلادى. مەن ارزان باعامەن ساتىلاتىن سىيلىقتار دۇكەنىن اشتىم. بۇل ناعىز قىزىقتى سىيلىقتاردىڭ اينالىمىنا اينالدى, توقتاماي جۇمىس ىسەتۋىنە بولادى.سوسىن ارت-كافە اشۋ ويىما كەلدى. ول جەردە ادامداردىڭ رۋحاني سەرپىلەتىن قىزىقتى كەشتەر وتكىزۋىنە جاعداي جاساعىم كەلدى. ودان ويىما مەيرامحانا-قوناق-ءۇي كەشەنىن اشۋ تۋرالى وي كەلە قالدى دا, وسىمەن اۋرە بولىپ كەتتىم» دەيدى گالينا.
مۇندا كەلگەن سوڭ, كاسىپكەر جاڭا جوباسىن «جاسىل تەحنولوگيانى» پايدالانۋدان باستادى. ويتكەنى ونى بۇل ىسكە قارجىنى ۇنەمدەۋ ءىسى يتەرمەلەدى. پايدالانعان ەلەكتر ەنەرگياسىنىڭ اقىسىن تولەۋ وڭاي ەمەس ەدى. ول ديزەلدى گەنەراتور ورناتىپ كوردى, بىراق ونىڭ شىعىنى دا از ەمەس ەكەن. اقىرىندا «جاسىل تەحنولوگياعا» توقتادى.
«اۋەلدە مەن كۇن باتارەيالارىن كوردىم. 2014 جىلى قىتاي ءوندىرىسى شىعارعان پانەلدەر ساتىپ الدىم, ودان كەيىن بولوتوۆتىڭ جەل گەنەراتورىن الدىم. بۇل ەكەۋى ءبىر جۇيە رەتىندە جۇمىس ىستەيدى. قازىر ەلەكتر ەنەرگياسى ءۇشىن بۇرىنعىدان ەكى ەسە كەم تولەيمىن. الداعى ۋاقىتتا وسى جەردەن, تابيعات اياسىنان ەكوەتونوپارك, ياعني تازا ەكولوگيالىق ماتەريالداردان جاسالعان شاعىن كيىز ۇيلەر قالاشىعىن ورناتۋدى ويلاستىرىپ ءجۇرمىن» دەپ بيزنەس-لەدي گالينا ستۋدەنتتەرگە ءوزىنىڭ الداعى جوسپارىن ءبولىستى.
گالينا شنايدەر ستارتاپەرلەرمەن تاعى ءبىر قىزىقتى باستاماسىن ءبولىستى. ول وسى جەردەن زووباق اشىپ, ونى بىلىكتى كاسىپكەردىڭ قولىنا تابىستاعىسى كەلەتىنىن ايتتى. بيزنەس-لەدي ستۋدەنتتەرگە مەملەكەت كاسىپكەرلەرگە جاساپ وتىرعان جاعدايدى, قولىڭا ۇستاتىپ وتىرعان «قۇرالداردى» ءتيىمدى, ۋاقىتىندا پايدالانىپ ۇيرەنۋ كەرەكتىگىن ايتتى. ويتكەنى گالينانىڭ ءوزى بىرنەشە رەت نەسيەلەر مەن گرانتتار الىپ ءساتتى, ءتيىمدى پايدالانا ءبىلدى. بۇل ورايدا ستارتاپەرلەرگە وبلىستىق كاسىپكەرلەر پالاتاسىنداعى بيزنەس-جاتتىقتىرۋشى الەنا يسراپيلوۆانىڭ بەرەر كومەگى كوپ.
«ءبىزدىڭ تىڭداۋشىلارىمىزدىڭ اراسىندا دايىن باستامالارى مەن قىزىقتى جوبالارى بار كىسىلەر كوپ. ولاردى تەك دۇرىس باعىتتاي ءبىلۋ كەرەك. بيزنەس قاناتتاسقاندا داميدى. گالينا شنايدەردى باستامالارى تاۋسىلمايتىن ناعىز تالىمگەر دەۋگە بولادى. ول جاس كاسىپكەرلەرگە بىلگەنىن ۇيرەتۋدەن, ايتۋدان جالىقپايدى, ءتىپتى تالاپتىلارعا ءوزىنىڭ جوباسىن جۇزەگە اسىرۋ ءۇشىن كومەك رەتىندە ورىن دا بەرىپ ءجۇر» دەيدى الەنا.
بيزنەس-لەديدىڭ ستۋدەنتتەرمەن كەزدەسۋى ءتۋريزمدى دامىتۋدى ارماندايتىن بولاشاق كاسىپكەرلەردىڭ ويىنا ۇشقىن تاستاعانداي بولدى.
قوستاناي