سادىق اعامىزدىڭ اقىندىعى دا بار. كوپ ءاننىڭ ءارىن اشاتىن «ءتىلىن» دە ءوزى جاقسى تاۋىپ, ەكەۋىن ەكپىندەتىپ قوسا تۋىنداتىپ جىبەرەدى, وندايدا اۋەن مەن ءسوز ادەمى جىمداسىپ, جاقسى جاراسىم تاۋىپ شىرايلانىپ شىعا كەلەدى.
وتكەن جىلدىڭ اياعىندا «ونەر» باسپاسىنان سادىق قۇنانباەۆتىڭ «تۇلپارسازدا اۋىلىم نەمەسە سادىقتىڭ سازدى اندەرى-اي» اتتى اندەر جيناعى جارىققا شىقتى. مۇندا كومپوزيتوردىڭ جۇزدەن اسا ءانى نوتاسىمەن بەرىلگەن. ەڭ الدىندا كوڭىل اۋدارىپ, كوش باستاپ تۇرعانى – «تاۋەلسىزدىك – ۇلى كۇن!», ودان كەيىن «تۋعان ەلىم – قازاقستان», «استانا – ءانىم مەنىڭ», «اينالدىم الماتىمنان» دەپ جالعاسىپ كەتە بارادى.
جيناقتىڭ باس جاعىندا سادىقتىڭ اندەرىنە كەزىندە ىستىق ىقىلاسىن, جىلى لەبىزىن بىلدىرگەن ادەبيەتىمىز بەن ونەرىمىزدىڭ بيبىگۇل تولەگەنوۆا, شەرحان مۇرتازا, قادىر مىرزاليەۆ, نۇرعالي ءنۇسىپجانوۆ ءتارىزدى تۇعىرى بيىك تۇلعالارىنىڭ سوزدەرى كەلتىرىلىپتى.
قالىڭ قازاقتىڭ قايران قادىرى «بۇل جىگىتتى مەن كوپ جىلداردان بەرى بىلەمىن. ماعان كەلگەندە, الدىمەن ولەڭىن كورسەتەتىن. ءان جازاتىنىن كەيىن ءبىلدىم. العاشقى كىتابى − «مەنىڭ مويىنقۇمىم». سول كىتابىنا كەزىندە قولتاڭبا بەرىپ, ءبىر اۋىز ولەڭ جازعانىم راس – «قۇنانباەۆتار قاتارىندا تۇرعانىڭ –قانداي جاقسى, باۋىرىم!».
«سادىق-اۋ, تىڭدادىق قوي
ءانىڭدى مىڭ, ايتايىن ولەڭىڭنىڭ تاۋىرلىگىن. اۋىلىن الاتاۋعا ارقالاعان, ءبىر ۇلى سەندەي بولسىن مويىنقۇمنىڭ!
13 تامىز, 2010 جىل, الماتى ق.» دەپ جازىپتى ءوزىنىڭ اق تىلەگىندە.
بۇل اسەم سازدى ادەمى ءانىن ءار جۇرەككە جەتەلەپ جەتكىزىپ جۇرگەن ءورىستى ونەر يەسى سادىقتىڭ شىعارماشىلىعىنا بەرىلگەن لايىقتى باعا بولار دەپ ويلايمىز. بەرىكباي قادىقوۆ,
جۋرناليست
الماتى وبلىسى, قاراساي اۋدانى