پرەزيدەنت تاپسىرماسى: مينيسترلىكتەردىڭ الداعى مىندەتتەرى ناقتىلاندى

ونەركاسىپ جانە قۇرىلىس

ونەركاسىپ جانە قۇرىلىس ءمينيسترى ەرسايىن ناعاسپاەۆ وتاندىق ءوندىرىستى قولداۋ, ارنايى ەكونوميكالىق ايماقتاردى (اەا) جاڭعىرتۋ جانە گەولوگيالىق بارلاۋدى كۇشەيتۋ باعىتىنداعى جۇمىستارعا توقتالدى. بۇگىندە وتاندىق تاۋار وندىرۋشىلەر تىزىلىمىندە 5,6 مىڭ كومپانيا تىركەلگەن.

ءمينيستردىڭ ايتۋىنشا, اەا قىزمەتى كەزەڭ-كەزەڭىمەن ترانسفورماتسيالانادى. قازىرگى تاڭدا ارنايى ەكونوميكالىق ايماقتاردا وڭدەۋ ونەركاسىبى بويىنشا جالپى قۇنى 4,4 ترلن تەڭگەنى قۇرايتىن 555 جوبا ىسكە اسىرىلىپ, 33 مىڭنان استام تۇراقتى جۇمىس ورنى اشىلعان. تەرەڭ وڭدەۋ سالاسىندا شيكىزات ەكسپورتىن رەتتەۋ جانە جوعارى قوسىلعان قۇنى بار ءونىم ءوندىرۋدى ىنتالاندىرۋ شارالارى كوزدەلىپ وتىر. سونىمەن قاتار ماڭىزدى مينەرالدار سالاسىن دامىتۋ ستراتەگياسى ازىرلەنىپ جاتىر. گەولوگيالىق بارلاۋ باعىتىندا الداعى 3 جىلدا قارجىلاندىرۋ كولەمىن سوڭعى 30 جىلدا تارتىلعان ينۆەستيتسيا دەڭگەيىنە جەتكىزۋ جوسپارلانعان.

اۋىل شارۋاشىلىعى

اۋىل شارۋاشىلىعى ءمينيسترى ايداربەك ساپاروۆ اگروونەركاسىپ كەشەنىن دامىتۋدىڭ جاڭا كەزەڭى باستالاتىنىن ايتتى. نەگىزگى نازار 2026-2030 جىلدارعا ارنالعان مال شارۋاشىلىعىن دامىتۋ جونىندەگى كەشەندى جوسپاردى ىسكە اسىرۋعا جانە سالانى جەڭىلدەتىلگەن قارجىلاندىرۋ شەڭبەرىن كەڭەيتۋگە اۋدارىلادى. ۆەتەريناريالىق قاۋىپسىزدىكتى كۇشەيتۋ, قاداعالاۋدىڭ تسيفرلىق قۇرالدارىن ەنگىزۋ مىندەتتەرى دە ايقىندالعان.

قايتا وڭدەۋ جانە تاماق ونەركاسىبىندە 2026 جىلدان باستاپ ينۆەستيتسيالىق سۋبسيديالار ۇلعايتىلىپ, قوسىلعان قۇن سالىعى تومەندەتىلەدى. شيكىزاتتى قايتا وڭدەۋ جانە تەرەڭ وڭدەۋ باعىتىنداعى جاڭا جوبالارعا قوسىمشا ىنتالاندىرۋ تەتىكتەرى قاراستىرىلعان.

ولجاس بەكتەنوۆ: ۇكىمەت «شىنايى مۇقتاج ادامدارعا عانا كومەك» قاعيداتىن قاتاڭ ۇستانادى

وقۋ-اعارتۋ

وقۋ-اعارتۋ ءمينيسترى جۇلدىز سۇلەيمەنوۆا ءبىلىم بەرۋ سالاسىن قارجىلاندىرۋ تەتىكتەرىن جەتىلدىرۋ جونىندەگى ۇسىنىستارىن تانىستىردى. پرەزيدەنت تاپسىرماسىنا سايكەس, جەكەمەنشىك مەكتەپتەردى قارجىلاندىرۋ وڭىرلىك قاجەتتىلىككە ساي باسىم جوبالارعا باعىتتالادى ءارى ولاردىڭ مەملەكەتتىك ستاندارتتارعا سايكەستىگىن باقىلاۋ كۇشەيتىلەدى.

مەكتەپكە دەيىنگى ۇيىمداردى ۆاۋچەرلىك قارجىلاندىرۋ تەتىگى وڭ ناتيجە بەرگەن. 2025 جىلدىڭ قورىتىندىسى بويىنشا 25,7 ملرد تەڭگە ۇنەمدەلگەن. بۇل جۇيەنى كەزەڭ-كەزەڭىمەن كەڭەيتۋ جوسپارلانىپ وتىر.

ەڭبەك جانە حالىقتى الەۋمەتتىك قورعاۋ

ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتاەۆ الەۋمەتتىك قولداۋ جۇيەسىن تسيفرلاندىرۋ بارىسىنا توقتالدى. قازىرگى ۋاقىتتا بىرىڭعاي تسيفرلىق الەۋمەتتىك قورعاۋ پلاتفورماسى نەگىزىندە قولداۋ شارالارىن پرواكتيۆتى فورماتقا كوشىرۋگە دايىندىق جۇرگىزىلىپ جاتىر.

سونىمەن بىرگە ەڭبەك نارىعىن جاڭعىرتۋ مىندەتى قويىلعان. مەملەكەتتىك-جەكەشەلىك ارىپتەستىك مودەلى اياسىندا ۇلتتىق ماماندىقتار ترانسفورماتسياسى ورتالىعىن قۇرۋ جوسپارلانىپ وتىر. ونىڭ شەڭبەرىندە سۇرانىسقا يە كاسىپتەر بويىنشا قايتا دايارلاۋ جانە وقىتۋ باعدارلامالارى ىسكە قوسىلادى, وقۋشىلاردىڭ كاسىپتىك دياگنوستيكاسى كەڭەيتىلەدى.

ۇكىمەت پرەزيدەنت تاپسىرمالارىن جۇزەگە اسىرۋعا كىرىستى

دەنساۋلىق ساقتاۋ

دەنساۋلىق ساقتاۋ ءمينيسترى اقمارال ءالنازاروۆا بىرىڭعاي مەملەكەتتىك مەديتسينالىق اقپاراتتىق جۇيە قۇرىلعانىن حابارلادى. بۇل جۇيە سالانىڭ ءىت شەشىمدەرىن بىرىكتىرىپ, ۇدەرىستەردىڭ اشىقتىعىن قامتاماسىز ەتۋگە ءتيىس. بىرىڭعاي مەملەكەتتىك مەديتسينالىق اقپاراتتىق جۇيە مەن دەنساۋلىق ساقتاۋ پورتالىن ىسكە قوسۋ 2026 جىلدىڭ 1 جەلتوقسانىنا جوسپارلانعان.

امبۋلاتوريالىق ءدارى-دارمەكپەن قامتاماسىز ەتۋ باعىتىندا «الەۋمەتتىك ءاميان» تەتىگى دامىپ جاتىر. 2025 جىلى وسى جۇيە ارقىلى 13,8 ملن-نان استام رەتسەپت بەرىلىپ, بۇل جالپى كولەمنىڭ 82 پايىزىن قۇراعان.

كولىك 

كولىك ۆيتسە-ءمينيسترى ماقسات قالياقپاروۆ ترانزيتتىك الەۋەتتى ارتتىرۋ جانە تسيفرلاندىرۋ شارالارىن باياندادى. 2026 جىلى ترانزيت كولەمىن 55 ملن تونناعا دەيىن جەتكىزۋ كوزدەلگەن, بۇل – 65 پايىزدىق ءوسىم. بىرقاتار ءىرى ينفراقۇرىلىمدىق جوبا اياقتالادى. رەسەي جانە قىتايمەن شەكارالىق ينفراقۇرىلىمدى ۇيلەستىرۋ جۇمىستارى جۇرگىزىلىپ جاتىر. «قتج» جول كارتاسى مەن جاڭا تاريفتىك ساياسات بەكىتىلگەن.

اۆتوجول سالاسىندا قىزىلوردا, سارىاعاش, رۋدنىي قالالارىندا 3 اينالما جولدىڭ قۇرىلىسى باستالادى. 33 وتكىزۋ پۋنكتى جاڭعىرتىلىپ جاتىر. جاساندى ينتەللەكت شەشىمدەرىن ەنگىزۋ اياسىندا Smart Cargo پلاتفورماسىن مەملەكەتتىك جانە سالالىق سەرۆيستەرمەن ىقپالداستىرۋ جالعاسادى. 2027 جىلعا دەيىن ءبىرتۇتاس ينتەللەكتۋالدى كولىك ەكوجۇيەسىن قالىپتاستىرۋ جوسپارلانعان.

پرەزيدەنت قاسىم-جومارت توقاەۆتىڭ ۇكىمەتتىڭ كەڭەيتىلگەن وتىرىسىندا سويلەگەن ءسوزى