كونستيتۋتسيالىق رەفورما جونىندەگى كوميسسيانىڭ 12-ءشى وتىرىسىندا ءماجىلىس دەپۋتاتى سەرگەي پونومارەۆ جاڭا كونستيتۋتسيا جوباسىن ءبىرتۇتاس, تەڭدەستىرىلگەن ءارى جان-جاقتى پىسىقتالعان قۇجات دەپ باعالاپ, ونى بۇكىلحالىقتىق رەفەرەندۋمعا شىعارۋعا تولىق دايىن ەكەنىن ايتتى, دەپ جازادى Egemen.kz.
دەپۋتاتتىڭ سوزىنشە, ونىڭ جاڭا اتا زاڭ جوباسىن قولداۋداعى ۇستانىمى قازاقستان قوعامىنىڭ بۇگىنگى ءومىر ءسۇرۋ احۋالىن جانە ازاماتتاردىڭ ناقتى سۇرانىستارىن تۇسىنۋگە نەگىزدەلگەن.
«قوعامدىق جانە پارلامەنتتىك جۇمىستا ادامدار مەملەكەتتەن تۇسىنىكتى ەرەجەلەر, بارىنە بىردەي قارىم-قاتىناس پەن ەرتەڭگى كۇنگە دەگەن سەنىمدىلىكتى كۇتەدى. بۇل ءۇمىت اتا زاڭدا قانداي قۇندىلىقتار مەن قاعيداتتار بەكىتىلگەنىنە تىكەلەي بايلانىستى», دەدى ول.
سەرگەي پونومارەۆ ۇسىنىلعان تۇزەتۋلەردىڭ وزەگىندە ادام مەن ازاماتتىڭ قۇقىقتارى مەن بوستاندىقتارىن قورعاۋ تۇرعانىن اتاپ ءوتتى.
«جاڭا كونستيتۋتسيانىڭ جوباسى ءدال وسى لوگيكاعا قۇرىلعان. ول ادام قۇقىقتارى كەپىلدىكتەرىنىڭ ءبىرتۇتاس جۇيەسىن قالىپتاستىرادى جانە دەكلاراتسيالارمەن شەكتەلمەي, ولاردى قورعاۋدىڭ ناقتى تەتىكتەرىن جاسايدى», دەدى دەپۋتات.
باقىت نۇرمۇحانوۆ: جاڭا كونستيتۋتسيانىڭ جوباسىندا وتپەلى ەرەجەلەر ناقتىلاندى
ونىڭ ايتۋىنشا, جاڭا اتا زاڭ جوباسى مەملەكەتتىك دامۋدىڭ تۇراقتى ءارى جاۋاپتى مودەلىن قالىپتاستىرىپ, قوعامدىق سۇرانىسقا جاۋاپ بەرەدى. قۇجات بولاشاق ۇرپاق الدىنداعى جاۋاپكەرشىلىكتى سەزىنەتىن ۇزاق مەرزىمدى پەرسپەكتيۆاعا باعىتتالعان. بۇل قورشاعان ورتانى ساقتاۋ, قوعامدىق قاۋىپسىزدىك, تۇراقتى ەكونوميكا مەن الەۋمەتتىك تۇراقتىلىقتى ءوزارا تىعىز بايلانىستى قۇندىلىقتار رەتىندە قاراستىرۋدى كوزدەيدى.
سەرىك ەگىزباەۆ: جاڭا كونستيتۋتسيا قوعام سۇرانىسىنا جاۋاپ بەرەدى
دەپۋتات جاڭا كونستيتۋتسيا جوباسىنداعى ماڭىزدى باعىتتاردىڭ ءبىرى ازاماتتىق قوعامنىڭ ءرولىن كۇشەيتۋ ەكەنىن دە اتاپ ءوتتى.
«قوعامدىق بىرلەستىكتەر قىزمەتىنىڭ ەركىندىگى جانە ازاماتتاردىڭ قوعامدىق ومىرگە قاتىسۋ مۇمكىندىكتەرىن كەڭەيتۋ تۇراقتى ديالوگ پەن قوعامدىق باقىلاۋ ءۇشىن جاعداي جاسايدى. بۇل باسقارۋ جۇيەسىن اشىق ءارى تۇسىنىكتى ەتەدى, ال قابىلداناتىن شەشىمدەر سالماقتى بولا تۇسەدى», دەدى ول.
سەرگەي پونومارەۆ قوعامدىق كەلىسىم مەن بىرلىكتى نىعايتۋدىڭ ايرىقشا ءمانى بار ەكەنىن دە تىلگە تيەك ەتتى.
ء«ار ادامنىڭ قادىر-قاسيەتىن قۇرمەتتەۋ, تەڭ قۇقىقتىق پەن قوعامدىق ۇدەرىستەرگە بەلسەنە قاتىسۋ تۇراقتىلىق پەن قاۋىپسىزدىكتىڭ بەرىك نەگىزىن قالايدى», دەدى دەپۋتات.
اسسامبلەيا جاستارى جاڭا كونستيتۋتسيا جوباسىنا قولداۋ ءبىلدىردى
ءسوز سوڭىندا ول جاڭا كونستيتۋتسيا جوباسىن قوعامنىڭ ناقتى تالاپ-تىلەگىن ايقىن كورسەتەتىن, مەملەكەت باسشىسى ايقىنداعان باسىمدىقتارعا ساي كەلەتىن پىسىقتالعان ءارى ءبىرتۇتاس قۇجات رەتىندە باعالادى.
«ول قازىرگى جانە بولاشاق ۇرپاقتىڭ مۇددەسىن ەسكەرە وتىرىپ, مەملەكەتتىڭ ادام قۇقىقتارى, ەكونوميكا, قاۋىپسىزدىك جانە الەۋمەتتىك سالاداعى جاۋاپكەرشىلىگىنىڭ ايقىن باعدارلارىن قالىپتاستىرادى. ۇسىنىلعان جوبا پىسىقتالعان ءارى تەڭدەستىرىلگەن, سوندىقتان ونى بۇكىلحالىقتىق رەفەرەندۋمعا شىعارۋعا بولادى», دەپ تۇيىندەدى سەرگەي پونومارەۆ.