ءماجىلىس دەپۋتاتى, قازاقستان حالىق پارتياسى (قحپ) فراكتسياسىنىڭ جەتەكشىسى ماگەررام ماگەرراموۆ كونستيتۋتسيالىق رەفورما جونىندەگى كوميسسيانىڭ 12-ءشى وتىرىسىندا جاڭا كونستيتۋتسيا جوباسىنىڭ ەل دامۋى ءۇشىن ماڭىزىن اتاپ ءوتتى. ونىڭ ايتۋىنشا, قۇجات وڭىرلەردە كەڭىنەن تالقىلانىپ, قوعام تاراپىنان قولداۋ تاپقان, دەپ حابارلايدى Egemen.kz.
دەپۋتات جاڭا جوبا «ادىلەتتى قازاقستان» قاعيداتىن مەملەكەتتىك دامۋدىڭ ىرگەلى باعدارى رەتىندە ايقىنداعانىنا نازار اۋداردى.
«قازاقستان رەسپۋبليكاسىنىڭ جاڭا كونستيتۋتسياسىنىڭ جوباسى العاش رەت پرەامبۋلا مەن جالپى ەرەجەلەر دەڭگەيىندە مەملەكەتتىك دامۋدىڭ ىرگەلى باعدارى رەتىندە «ادىلەتتى قازاقستان» قۇندىلىعىن بەلگىلەدى. ادىلەتتى قازاقستان قاعيداتى قازاقستان حالىق پارتياسى تولىق قولدايتىن الەۋمەتتىك ادىلەتتىلىكتى بىلدىرەدى. ادىلەتتى قازاقستان – «زاڭ مەن ءتارتىپ» قاعيداتىن ءسوزسىز ۇستاناتىن, تەڭ مۇمكىندىكتەر ۇسىناتىن ەل», دەدى ماگەررام ماگەرراموۆ.
«بايتاق» پارتياسى «ەكولوگيا جانە ادام دەنساۋلىعى» ۇعىمىن مەملەكەتتىڭ بازالىق قۇندىلىعى رەتىندە بەكىتۋدى ۇسىندى
ونىڭ سوزىنشە, قۇجاتتا تاريحي ساباقتاستىق پەن ۇلتتىق قۇندىلىقتارعا ايرىقشا ءمان بەرىلگەن. پرەامبۋلادا ەتنوسارالىق جانە كونفەسسياارالىق كەلىسىم قوعامدىق تۇراقتىلىق پەن ورنىقتى دامۋدىڭ باستى نەگىزى رەتىندە كورسەتىلگەن. سونداي-اق ەڭبەك ەتۋ قۇقىعىنا قاتىستى نورما ەرەكشە قولداۋعا يە بولعان.
ينستيتۋتسيونالدىق وزگەرىستەر دە جوبانىڭ ماڭىزدى بولىگى سانالادى. دەپۋتات مەملەكەتتىك بيلىك قۇرىلىمىنىڭ جاڭاشا ۇلگىسى ۇسىنىلعانىن ايتتى. ءبىرپالاتالى پارلامەنت قۇرۋ, «حالىق كەڭەسى» اتتى جوعارى كونسۋلتاتيۆتىك ورگان قالىپتاستىرۋ سياقتى باستامالار جاڭا ساياسي باعداردىڭ ايعاعى رەتىندە باعالاندى. ماگەرراموۆتىڭ پايىمىنشا, ەندىگى جەردە مەملەكەت تەك ۇدەرىستەردى باسقارۋشى ەمەس, ازاماتتارعا قىزمەت ەتەتىن ينستيتۋتقا اينالۋعا ءتيىس.
ول قۇجاتتىڭ قوعامدا كەڭ قولداۋ تاپقانىن اتاپ ءوتتى.
«ەل تۇرعىندارىنىڭ باسىم كوپشىلىگىنىڭ جاڭا كونستيتۋتسيا جوباسىن تولىق قولدايتىنىن سەنىممەن ايتا الامىن. مۇنى تەك كوميسسيانىڭ عانا ەمەس, سونىمەن قاتار ەلىمىزدىڭ بارلىق وڭىرلەرىندەگى جاڭا كونستيتۋتسيا جوباسىن ءارتۇرلى قوعامدىق, الەۋمەتتىك توپتارمەن, قوعامدىق ۇيىمدارمەن جانە ەڭبەك ۇجىمدارىمەن تالقىلاۋ اياسىندا كەزدەسۋلەردى وتكىزگەن حالىق پارتياسى فيليالدارىنىڭ جۇمىسىنا بايلانىستى ايتىپ وتىرمىن», دەدى دەپۋتات.
قحپ ايماقتاردا جاڭا كونستيتۋتسيا جوباسىن تالقىلاۋدى جانداندىردى
ماجىلىستە قازاقستان حالىق پارتياسى فراكتسياسىنىڭ باستاماسىمەن بارلىق وڭىرلىك فيليالدار, ساراپشىلار, عىلىمي جانە زاڭگەرلىك قاۋىمداستىق وكىلدەرى, كاسىپكەرلەر مەن ۇكىمەتتىك ەمەس ۇيىمدار قاتىسقان كەڭەيتىلگەن وتىرىس وتكەن. 100-گە جۋىق ادام قاتىسقان جيىندا جاڭا كونستيتۋتسيا جوباسىنا ءبىراۋىزدان قولداۋ بىلدىرىلگەن.
«جاڭا كونستيتۋتسيانىڭ جوباسى – وتكەن كەزەڭ مەن بۇگىنگى باسىمدىقتاردى تۇسىنە وتىرىپ, قازاقستاننىڭ بولاشاقتاعى جاڭا باعدارى تۋرالى شەشىم قابىلداعان حالىقتىڭ بىرلىگى مەن بىرتۇتاستىعىنىڭ بەلگىسى دەپ ايتۋعا بولادى. جوعارىدا ايتىلعانداردى ەسكەرە وتىرىپ, ءبىز جاڭا كونستيتۋتسيانىڭ جوباسىن جالپىحالىقتىق رەفەرەندۋمعا شىعارۋدى ۇسىنامىز», دەپ تۇيىندەدى ماگەررام ماگەرراموۆ.
ۆيتسە-پرەزيدەنت جانە حالىق كەڭەسى: جاڭا اتا زاڭ جوباسى ۆارشاۆادا تانىستىرىلدى