تۇركىستان قالاسىن كوگالداندىرۋ ماقساتىندا جىل سايىن ءتۇرلى اعاش كوشەتتەرى ەگىلەدى. وتكەن 2018 جىلدىڭ كۇز ايىندا قالانىڭ نەگىزگى كوشەلەرى مەن ءشاۋىلدىر تاسجولىنىڭ بويىنا 46 000 ءتۇپ اعاش كوشەتتەرى وتىرعىزىلىپ, قالانى سۋلاندىرۋ باعىتىندا 6 جەردەن تەرەڭ ۇڭعىمالى سكۆاجينا قازىلعان بولاتىن.
تۇركىستان وبلىسى اكىمىنىڭ ءباسپاسوز قىزمەتىنىڭ اقپاراتىنا سۇيەنسەك, بۇل جۇمىستار بيىل دا جالعاسىن تاۋىپ بيىلعى جىلى قالانىڭ بارلىق اۋماعىن قامتىپ, 100 مىڭ ءتۇپ اعاش كوشەتتەرىن وتىرعىزۋ جوسپارلانىپ وتىر. بۇل كوشەتتەردىڭ دەنىن شولمەن سۋعا ءتوزىمدى جيدە, قارا اعاش, ەمەن تايلاند جانە جەمىس اعاشتارىنىڭ تۇرلەرى قۇرايدى. جوسپارلانعان اعاش كوشەتتەرى تازالىق مەكەمەسىنىڭ جۇمىسشىلارى مەن سەنبىلىكتەرگە اتسالىسقان قالاداعى بارلىق ۇجىمدار, ۇكىمەتتىك ۇيىمدار مەن قالا جاستارىنىڭ كۇشىمەن ەگىلدى.
سونىمەن قاتار, تۇركىستاننىڭ كىرەبەرىس ءتورت قاپتالىنان جاپپاي «پاۆلوۆنيا» اعاشىن (10 مىڭ ءتۇپ) وتىرعىزۋ قولعا الىندى. وسىلايشا تۇركىستاندى جاسىل جەلەكپەن كومكەرۋ قىزۋ جۇرۋدە.