«بىرىنشىدەن, اۋە قورعانىسى كۇشتەرى اتىنان 13 جىگىتىمىزدىڭ وتباسىلارىنا كوڭىل ايتامىن. قايعىمىزدا شەك جوق. 27 ناۋرىز كۇنى استانا ۋاقىتى بويىنشا 18.20-18.30 مينۋت اراسىندا ءبىزدىڭ ءتورت تىكۇشاق اقتاۋ قالاسىنان شىمكەنتكە ۇشىپ كەلە جاتقان كەزدە جالاعاش اۋىلىنىڭ ماڭىندا ولاردىڭ ءبىرى اپاتقا ۇشىرادى. بۇل اپاتتا تىكۇشاقتىڭ ءۇش ۇشقىشى جانە ون ساربازىمىز قازا بولدى. اتالمىش اۋە كەمەسىندە ءبىزدىڭ مايور رومان كوستىگوۆ كوماندير بولدى. ول 2-سىنىپ ۇشقىشى. اپات جايلى ەستىگەن كەزدە سول كۇنى مەملەكەتتىك كوميسسيا قىزىلوردا وبلىسىنىڭ اۋەجايىنا ۇشىپ شىقتى. قازىرگە دەيىن 9 جىگىتتى تۋعان جەرىنە جەرلەدىك. بۇگىنگى تاڭدا گەندىك ساراپتاما ەلوردادا وتكىزىلىپ جاتىر. ءتورت جىگىتتى (دەنەسىن) بۇگىن تۋعان جەرىنە جەتكىزەمىز دەپ ويلايمىن», - دەدى داۋرەن قوسانوۆ.
ايتا كەتسەك, قىزىلوردا وبلىسىندا تىكۇشاق اپاتىنان قازا تاپقان 9 اسكەري قىزمەتشىنىڭ دەنەسى جەر قوينىنا بەرىلدى. قالعان تورتەۋىنىڭ مۇردەسى تۋعان جەرلەرىنە بۇگىن جەتكىزىلەدى.
سونىمەن قاتار, اپاتقا ۇشىراعان مي-8 تىكۇشاعىنىڭ ەكيپاجى اۋە كەمەسىن شارۋا قوجالىعىنىڭ ۇستىنە قۇلاۋىنا جول بەرمەگەندىگىن دە اتاپ ءوتتى.
«مەن اپات ورىن بولعان جەرگە ءبىرىنشى جەتتىم. العاشقىدا كورگەنىم تىكۇشاق بولىكتەرىنىڭ جان-جاققا شاشىراپ كەتكەنى بولدى. كۋاگەر اۋىل تۇرعىنىنىڭ ايتۋىنشا, «تىكۇشاق تۋرا ۇستىنەن ۇشىپ ءوتىپ بارىپ, قۇلاعان. بۇل ەكيپاجدىڭ سوڭىنا دەيىن كۇرەسكەنىن دالەلدەيدى. شارۋا قوجالىعى زارداپ شەكپەس ءۇشىن تىكۇشاقتى باسقا جاققا بۇرىپ اكەتكەن. مەن 13 جىگىت تە - باتىر دەپ ەسەپتەيمىن», - دەدى اسكەري-اۋە كۇشتەرىنىڭ قولباسشىسى.
ەسكە سالايىق, 27 ناۋرىز كۇنى كەشكە قىزىلوردا وبلىسىنىڭ جالاعاش اۋدانىندا مي-8 تىكۇشاعى اپاتقا ۇشىرادى. قورعانىس مينيسترلىگىنىڭ اقپاراتىنا سايكەس, اتالعان تىكۇشاق اقتاۋ قالاسىنان شىمكەنتكە بەت العان 4 اسكەري تىكۇشاق قۇرامىندا بولعان. بارلىق ەكيپاج مۇشەسى - 13 ادام قازا تاپتى. وسىعان دەيىن قورعانىس مينيسترلىگى كوز جۇمعان اسكەري قىزمەتشىلەردىڭ ەسىمدەرى مەن فوتوسۋرەتتەرىن جاريالاعان بولاتىن.