اشىق ليۋكتەر ماسەلەسى قالا اكىمدىگىنىڭ تۇراقتى باقىلاۋىندا: پايدالانۋشى ۇيىمدار وتىنىمدەرگە بايلانىستى كۇن سايىن اشىق قۇدىقتاردى انىقتاۋ جانە جويۋ بويىنشا جۇمىستار جۇرگىزۋدە.
بۇگىنگى كۇنى بارلىق وتىنىمدەر تيەسىلى بالانس ۇستاۋشىلارمەن پىسىقتالدى.
كارىز قۇدىقتارىنىڭ اشىق قالماۋى ءۇشىن جانە اپاتتىڭ الدىن الۋ ءۇشىن اكىمدىك كەلەسى جۇمىستاردى اتقارۋدا: قۇدىقتاردى تولىق تۇگەندەۋ جۇرگىزىلەدى, جوبالاناتىن جوبالاردا پوليمەرلىك ماتەريالدان جاسالعان ليۋكتەردى ورناتۋ قاراستىرىلادى.
سونىمەن قاتار, قولدانىستاعى قۇدىقتارعا تەمىر تور ورناتىلۋدا, ول ەگەر قۇدىق قاقپاعىن ۇرلاپ كەتسە دە ادامنىڭ, جان-جانۋاردىڭ, تاعى دا باسقا ماتەريالدىڭ قۇدىق ىشىنە ءتۇسىپ كەتۋىن ساقتايدى. قازىرگى كۇنى تەمىر تور 11 مىڭنان استام قۇدىققا ورناتىلعان.
جانە دە بالانستا قۇدىقتارى بار مەكەمەلەر قۇدىقتاردى جابۋ بويىنشا جۇمىستار جۇرگىزۋدە.
28 ناۋرىزداعى جاعداي بويىنشا بارلىق اۋدانداردا 11 538 دانەكەرلەنگەن تورلار ورناتىلعان, سونىڭ ىشىندە «استانا-اەك» اق - 246, «استانا-تەپلوترانزيت» اق - 8 121, «استانا سۋ ارناسى» - 807 دانا قورعاعىش تورلار ورناتقان.
سونىمەن قاتار, قالالىق پوليتسيا دەپارتامەنتى قۇدىق قاقپاقتارىن ۇرلاۋدىڭ الدىن الۋ بويىنشا ۇنەمى جەدەل-رەيدتىك ءىس-شارالار, ەسكەرتۋ جانە جولىن كەسۋ بويىنشا جۇمىستار جۇرگىزەدى.
پوليتسەيلەر مەملەكەتتىك كىرىستەر دەپارتامەنتىنىڭ وكىلدەرىمەن بىرلەسىپ مەتالل سىنىقتارىن قابىلدايتىن ورىنداردا تەكسەرۋ بويىنشا اۋقىمدى ءىس-شارالار جۇرگىزەدى.
تۇرعىندارمەن ەسەپتىك كەزدەسۋ بارىسىندا قالا اكىمى باقىت سۇلتانوۆ قۇدىق قاقپاقتارىن ۇرلاۋ «استانانىڭ اۋرۋى» دەگەن بولاتىن. ونىڭ سوزىنشە, وتكەن جىلدىڭ كۇزىنەن باستاپ كوممۋنالدىق سالا قىزمەتكەرلەرى مىڭداعان اشىق قۇدىقتاردى انىقتاعان.
ادامداردىڭ قاۋىپسىزدىگى جانە قايعىلى جاعدايدى بولدىرماۋ ءۇشىن قالا اكىمى قۇدىقتاردى ۇنەمى تەكسەرىپ, ولارعا تەمىر تورلار ورناتۋدى تاپسىرعان بولاتىن.