پرەمەر-مينيستر اسقار مامين الماتى وبلىسىنا جۇمىس ساپارىمەن كەلدى. ۇكىمەت باسشىسى الدىمەن پانفيلوۆ اۋدانىنداعى «قورعاس — شىعىس قاقپاسى» ارنايى ەكونوميكالىق ايماعىنا ورنالاسقان نىساندارمەن تانىستى.
ۇكىمەت باسشىسى الدىمەن بارعان «نۇر جولى» كەدەندىك باقىلاۋ-وتكىزۋ بەكەتى وتكەن جىلى اشىلعان. بۇل قۇرىلىم تەحنيكالىق جابدىقتالۋ, كولىك قۇرالدارىن تەكسەرىپ, وتكىزۋ جىلدامدىعى جانە باقىلاۋ جۇيەسىن ەنگىزۋ بويىنشا قازاقستانداعى ترانزيتتىك-لوگيستيكالىق قىزمەت كورسەتۋ ساپاسىن جاڭا ساتىعا كوتەردى. قازىر مۇنداعى جۇك كولىكتەرىن كەدەندىك جانە شەكارالىق راسىمدەۋ ۋاقىتى 40 مينۋتقا دەيىن قىسقارىپ, ەكى باعىتقا 2500 اۆتوكولىك ءبىر مەزەتتە وتە الادى. الداعى ۋاقىتتا بەكەت تاۋلىگىنە 5000 كولىككە دەيىن كولىك وتكىزۋ مۇمكىنگىنە كوشەدى.
ەلىمىزدىڭ ترانزيتتىك الەۋەتىنىڭ ارتۋىنا ۇلەس قوساتىن نىساندار نەگىزىنەن «قورعاس – شىعىس قاقپاسى» ارنايى ەكونوميكالىق ايماعىندا ورنالاسقان. پرەمەر-مينيستر اسقار مامين وسى اۋماقتا بولىپ, بىرنەشە نىساندى ارالاپ كوردى. وسى جەردە اسقار مامينگە جۇمىس ىستەپ تۇرعان ونەركاسىپتىك كاسىپورىنداردىڭ جۇمىسىنىڭ نەگىزگى كورسەتكىشتەرى جانە جاڭا نىسانداردىڭ جوبالارى تانىستىرىلدى. قۋاتتىلىعى جىلىنا 60 000 توننانى قۇرايتىن «فەنيكس فيد ميللس» قوسپا جەم شىعاراتىن زاۋىت بيىل ءساۋىر ايىندا پايدالانۋعا ەنگىزىلەدى. 87 جۇمىس ورنى قۇرىلعان.
«KIF Warehouses» سەرىكتەستىگىنىڭ قۇرعاق جۇك ساقتايتىن قويمالارىنىڭ قۇرىلىسى الداعى ءساۋىر ايىندا اياقتالماق. بىرىككەن اراب امىرلىكتەرىمەن ارىپتەستىك اياسىندا جۇزەگە اسقان جوبانىڭ جالپى قۇنى 5,1 ملرد تەڭگە. مۇنداعى «ا» سىنىپتى قويمالاردىڭ 24964 شارشى مەترى قۇرعاق جۇك ساقتاۋعا ارنالسا, قالىپتى تەمپەراتۋرادا جۇمىس ىستەيتىن بولىگى 14 516 شارشى مەتردى الىپ جاتىر.
ال «زاريا LTD» سەرىكتەستىگىنىڭ جۇگەرى تۇقىمىن قابىلداپ, كەپتىرىپ, ساقتاۋعا ارنالعان قويماسىن ىسكە قوسۋعا 1,5 ملرد تەڭگە قاراجات جۇمسالعان ەكەن. قازىرگى كۇنى العاشقى جەلىسى تولىقتاي ىسكە قوسىلعان قويما 15 مىڭ تونناعا دەيىن شيكىزات ساقتاپ, سىرتقى نارىققا جونەلتىپ وتىر. جاقىن كۇندەرى ەلەۆاتور كەشەنىنىڭ ەكىنشى جەلىسىنىڭ قۇرىلىسى اياقتالىپ, ءونىم ساقتاۋ كولەمى 2 ەسەگە دەيىن كوبەيمەك. پرەمەر-مينيستر نازارىنا ۇسىنىلاعان كەلەسى نىسان جۇك تەرمينالى بولدى. مۇندا كۇن سايىن 100 تونناعا دەيىن جۇك جونەلتىلەدى. «قورعاس – شىعىس قاقپاسى» ارنايى ەكونوميكالىق ايماعىنداعى جۇكتەردى بۋىپ-ءتۇيىپ, دىتتەگىن جەرىنە جونەلتۋمەن وسى جۇك تەرمينالى اينالىسۋدا.
جاقىندا ەكونوميكالىق ايماق اۋماعىندا «Qaz Lumiere» ساۋدا ورتالىعى اشىلعان ەدى. مۇندا الداعى كۇندەرى وتاندىق وندىرۋشىلەر ءۇشىن 15 كۇن بويىننا وتەتىن ساۋدا جارمەڭكەسى اشىلماقشى. اسقار مامين ساۋدا ورتالىعىندا بولىپ, دايىندىق جۇمىستارىن پىسىقتادى.
ۇكىمەت باسشىسى پانفيلوۆ اۋدانىنداعى قورعاس وزەنىنىڭ جاعالاۋىن بەكىتۋ جۇمىسىمەن دە تانىستى. «قازسەلدەنقورعاۋ» مەكەمەسىنىڭ تاپسىرىس بەرۋىمەن وزەن جاعاسىنداعى قۇرىلىسپەن «سك-بازيز» كومپانياسى اينالىسۋدا. قۇنى 30 ملرد تەڭگە تۇراتىن جوبا كەلەر جىلى تولىق اياقتالۋى ءتيىس. قازىر ۇزىندىعى 6 شاقىرمعا جۋىق دامبى سالىنعان. باسقۇنشى اۋىلى مەن «دوستىق» سۋ ارناسىنا دەيىنگى 9 شاقىرىمدىق جول جاسالىپ, شۇكىربۇلاق سۋ قوماسى مەن قازانكول وزەنىنە دەيىنگى 17 شاقىرىم جاعالاۋ بەكىتىلگەن.
- «قورعاس – شىعىس قاقپاسى» ارنايى ەكونوميكالىق ايماعىنداعى نىسانداردىڭ ماڭىزى زور. سوندىقتان اۋماقتى تابيعات اپاتىنىڭ سالدارىنان قورعاۋىمىز كەرەك. بۇل باعىتتاعى جۇمىستار ءالى دە باياۋ ءجۇرىپ جاتىر. بولىنگەن قارجىنىڭ 9 ملرد تەڭگەگە جۋىعى عانا يگەرىلگەن. ىسكە قارقىن قوسۋ كەرەك, - دەدى اسقار مامين پانفيلوۆ اۋدانىنداعى ساپارىن قورتىندىلاي كەلە.
پرەمەر-ءمينيستردىڭ الماتى وبلىسىنداعى جۇمىس ساپارى تالدىقورعان قالاسىندا جالعاستى. اسقار مامين وبلىس ورتالىعىندا الدىمەن ات شالدىرعان نىسان – قالالىق كوپسالالى اۋرۋحانا بولدى. مۇندا ونكولوگيالىق اۋرۋلاردى ەرتە كەزەڭدە انىقتايتىن جاعداياتتىق ورتالىق جۇمىس ىستەيدى. سوڭعى ۇلگىدەگى راديولوگيالىق-اقپاراتتىق كەشەن قاۋىپتى دەرتتى باستاپقى كەزەڭدە انىقتاۋعا مۇمكىندىك بەرەدى. ورتالىق جۇمىسى تولىقتاي تسيفرلىق جۇيەگە كوشكەن. قىزمەتتى ورتالىق سەرۆەرگە قوسىلعان جاساندى ينتەللەكت اتقارادى. ءارى بۇل جەرگە وبلىستاعى 13 ەمدەۋ مەكەمەسىنە قويىلعان سەكسەنگە جۋىق تسيفرلى قوندىرعىلارى تىكەلەي جالعانعان. ياعني, ورتالىقتانعان جۇيەدە ناۋقاس بويىندا وبىر بەلگىلەرىنىڭ بار-جوعى وڭاي انىقتالاتىن بولدى.
- ورتالىق بىلتىر جەلتوقسان ايىندا ىسكە قوسىلدى. سودان بەرى 36 مىڭنان استام تەكسەرۋدەن ءوتىپ, 146 ادامدا قاتەرلى ىسىك اۋرىنىڭ بەلگىلەرى انىقتالدى. بۇل ايماقتاعى دەنساۋلىق ساقتاۋ سالسىن دامىتۋداعى وزىق ۇلگى,- دەدى ۇكىمەت باسشىسىنا ورتالىق جۇمىسى جايلى تۇسىندىرگەن وبلىستىق دەنساۋلىق ساقتاۋ باسقارماسىنىڭ باسشىسى باۋىرجان ىسقاق.
سونداي-اق, اسقار مامين قالاداعى «تالدىقورعان» يندۋستريالى ايماعىنىڭ ينفراقۇرىلىمىمەن تانىستى. بۇگىندە ايماق بويىنشا جالپى كولەمى 4192,5 گەكتاردى قۇرايتىن 6 يندۋستريالىق ايماقتى دامىتۋ بويىنشا جۇمىس جۇرگىزىلۋدە. وبلىس ورتالىعىنداعى ارنايى اۋماقتا بيىل ەكى جوبا ىسكە قوسىلادى. ونىڭ ءبىرى مايلى داقىلداردى وڭدەيتىن «جەتىسۋ ماجيكو» اگروكەشەنىنىڭ زاۋىتى بولسا, ەكىنشىسى ەت ونىمدەرىن شىعاراتىن «لۋنيۋان جەتىسۋ» زاۋىتى بولماق.
باعىتتى دامىتۋ بويىنشا ءتيىستى تاپسىرمالار بەرگەن پرەمەر ىرگەتاسى 1975 جىلى قالانىپ, بۇگىنگى كۇنگە دەيىن الەمدىك دەڭگەتسدە سۇرانىسقا يە ءونىم شىعارىپ وتىرعان «قاينار» اككۋمۋلياتور زاۋىتىندا بولدى. 1600 ادام ەڭبەك ەتەىن زاۋىت بىلتىر 2,5 ملن دانا قۋات باتەرەيالارىن جاساعان. بۇل قارجىعا شاققاندا شامامەن 27 ملرد تەڭگە بولادى.
قالادا جاڭادان سالىنىپ جاتقان كوپ قاباتتى تۇرعىن ءۇي مەن جەدەل مەديتسينالىق باسقارۋ ورتالىعىنىڭ قۇرىلىسىن كوزبەن كورگەن كەيىن ۇكىمەت باسشىسى كوپ بالالى انالارعا ارناپ سالىنىپ جاتقان كوتتەجد قالاشىعى اۋماعىنا باردى. جالپى, بيىل الماتى وبلىسىندا 784 مىڭ شارشى مەتر باسپانا پايدالانۋعا بەرىلەدى دەپ كۇتىلۋدە. وعان «نۇرلى جەر» باعدارلاماسى بويىنشا 19 ملرد 100 ملن تەڭگە قاراجات بولىنگەن. وعان 42 مىڭ شارشى مەتر جالعا بەرىلەتىن باسپانا سالۋ كوزدەلگەن. ال 2,8 ملرد تەڭگە قوسىمشا قارجى كوپ بالالى وتباسىلارعا ارنالعان 8 تۇرعىن ءۇي سالۋعا جۇمسالماق.
تالدىقورعانداعى جۇمىس ساپارى بارىسىندا ۇكىمەت باسشىسى اسقار مامينگە الماتى وبلىسىنىڭ «الەۋمەتتىك كارتاسى» تانىستىرىلدى. وندا الەۋمەتتىك قورعاۋدى قاجەت ەتەتىن ادامدارعا ارنالعان جوبا مەن كوپ بالالى انالاردى باسپانامەن قامتۋعا بايلانىستى شارالارعا باسىمدىق بەرىلگەن.
قالماحانبەت مۇقامەتقالي,
«Egemen Qazaqstan»
الماتى وبلىسى