ءبىز تاريحي وقيعانىڭ كۋاسى بولدىق. ەلباسى ءوزىنىڭ پرەزيدەنتتىك وكىلەتتىگىن توقتاتتى. ءسويتىپ كونستيتۋتسياعا سايكەس قازاقستان رەسپۋبليكاسى پرەزيدەنتىنىڭ وكىلەتتىگىن اتقارۋ سەنات توراعاسىنا كوشەتىنى تۋرالى جارلىققا قول قويدى. ارينە, بۇل جۇرتتىڭ كوبىنە كەزدەيسوق وقيعا بولدى دەپ ويلايمىن. بىراق شىنتۋايتىندا تاريحي وقيعا. نۇرسۇلتان نازارباەۆ قازاقستانعا كوپ ەڭبەك ءسىڭىردى. انىعىن ايتقاندا, ۇلى دالادا ەلدى تالاي ادامدار باسقاردى. ولاردىڭ اراسىندا ۇلى حاندار دا, بيلەر دە, نەبىر باتىرلار دا بولدى. سولار ۇلى دالانى قورعاۋ ءۇشىن باستارىن بايگەگە تىكتى. بىراق امال نەشىك, ولاردىڭ ءبىرى دە, ءتىپتى ابىلاي حان دا تاۋەلسىزدىككە قول جەتكىزە المادى. ماسەلەن, مۇحتار اۋەزوۆ سەكىلدى, قانىش ساتباەۆ سەكىلدى ءبىزدىڭ ۇستازدارىمىز, اعالارىمىز تاۋەلسىزدىكتى كورە العان جوق. تاۋەلسىزدىكتى ءبىز كوردىك. تاۋەلسىزدىككە ءبىز جەتتىك. نۇرسۇلتان نازارباەۆ جەتتى. ول ءوزىنىڭ حالقىمەن بىرگە, ەلىمەن بىرگە جەتتى.
ارينە, باستاپقىدا قازاقستان اتى بار دا, زاتى جوق, كەڭەس وداعى تارقاعاننان كەيىن قاڭىراپ بوس قالعان, قيراعان مەملەكەت ەدى. سول قۇلاندىدان, قيراندىدان مىقتى تاۋەلسىز مەملەكەت ورناتۋ ءۇشىن جۇرەك كەرەك ەدى. نۇرسۇلتان نازارباەۆ تاۋەكەلگە باردى. سول كەزدە جۇرت جالاقى, زەينەتاقى الا الماي جۇرگەن ىزى-قيقى زامان بولاتىن. زاۋىتتاردىڭ ءبارى توقتاعان ەدى. سونداي قيىنشىلىقتاردى ەڭسەرە وتىرىپ, ەلباسى ەكونوميكاسى زور مەملەكەت تۇرعىزدى. ونى ودان ءارى دامىتتى. الەمگە تانىتتى. قازاقستان الەمدەگى وزىق ەلۋ ەلدىڭ قاتارىنا قوسىلدى. بۇل, ارينە, ايتۋعا عانا جەڭىل. مەن تاۋەلسىزدىكتىڭ الدىندا, ەلەڭ-الاڭدا, سوسىن تاۋەلسىزدىكتەن كەيىنگى جىلداردا, ياعني ەڭ اۋىر جىلداردا سول كىسىنىڭ جانىندا بولدىم. سول كەزدەگى بار اۋىرتپالىقتاردى كوزىممەن كوردىم. نۇرەكەننىڭ ۇيقىسىز تۇندەرىنىڭ, كۇلكىسىز كۇندەرىنىڭ كۋاسى بولدىم. توڭىرەكتىڭ ءبارى كوز تىگىپ وتىردى. بىراق سول قيىنشىلىقتارعا قايمىقپادى. مەملەكەت ءىسىن ويداعىداي ۇيىمداستىرا ءبىلدى. دالەلدەدى. ۇلى دالادا شىن مانىندە تاۋەلسىز مەملەكەت ورناتتى. بۇگىندە قازاقستان الەم مويىنداعان, ەسەپتەسەتىن, ساناساتىن مەملەكەتكە اينالدى.
العاشقى قولىنا بيلىك تيگەن كەزدەن باستاپ نۇرەكەڭ يادرولىق پوليگوندى جاپتى. 1991 جىلى جەلتوقساندا پرەزيدەنت سايلاۋى بولدى. سايلانعاننان كەيىن 16 جەلتوقساندا تاۋەلسىزدىك الدىق. سول تاۋەلسىزدىكتى العاننان كەيىن بىردەن, نۇرەكەڭ مەنى شاقىرىپ, قولىمىزعا ءوز بيلىگىمىز ءتيدى, ەندى دۇنيە ءجۇزى قازاقتارىنىڭ قۇرىلتايىن وتكىزەيىك دەدى. سوندا بايقاساڭىز, قازىنانىڭ ءتۇبى تەسىك ەدى. الايدا, ءبىز سول كەزدە قازاقتىڭ تۇڭعىش قۇرىلتايىن وتكىزدىك. سودان بەرى تالاي قۇرىلتاي ءوتتى عوي, بىراق العاشقى قۇرىلتايعا ءبىرى جەتپەيدى. ول قۇرىلتاي ەلدىڭ اۋزىندا اڭىز بولىپ قالدى.
ءبىز قالا سالعاندى كورگەن جوقپىز. زاۋىت سالعاندى, ءۇي سالعاندى بىلەمىز. ال ەندى ۇلكەن قالا سالعاندى دا كوردىك. ەلباسى استانانى اقمولاعا كوشىردى. جاسىرىپ, جاباتىنى جوق, ول كەزدە مەن دە بۇل شەشىمگە قارسى بولدىم. ەلدىڭ جاعدايى ناشار, نەگە كەرەك دەدىم. سوندا بۇل كىسى بولاشاقتى ناقتى بولجاعان ەكەن. ءبارىن الدىن الا ءبىلىپتى. تاۋبە. استانانى كوشىردى. بۇعان جۇرەك, ۇلكەن اقىل كەرەك ەدى. الدا ۇلى ىستەر كۇتىپ تۇردى. ءبارىن ەڭسەردى. ادام تاڭعالاتىن, ىستەردى جۇزەگە اسىردى. ەندى بۇل قالا ەۋرازيانىڭ استاناسىنا اينالىپ بارادى.
لاتىن الىپبيىنە كوشتىك. بۇكىل تۇركى دۇنيەسىنىڭ رۋحاني استاناسى – تۇركىستانعا وڭتۇستىك قازاقستان وبلىسىنىڭ ورتالىعىن كوشىردى. ءسويتىپ ءبارىمىزدىڭ كوكەيىمىزدە جۇرگەن ارمانىمىزدى جۇزەگە اسىردى. سوڭعى كەزدەرى رۋحانياتقا ەرەكشە ءمان بەرە باستادى. ولار: «رۋحاني جاڭعىرۋ», « ۇلى دالانىڭ جەتى قىرى» سەكىلدى ماقالالار. ەندى ءوزىنىڭ ورنىنا تاڭداعان ادامى ابدەن لايىقتى دەپ ەسەپتەيمىن. قاسىم-جومارت توقاەۆ اقىلدى, بىلگىر, تاجىريبەلى ديپلومات ادام. مۇنىڭ ءبارىن مەن وتە دۇرىس دەپ ەسەپتەيمىن.
مىرزاتاي جولداسبەكوۆ