پاۆلودار قالاسىندا قازاقستاننىڭ تۇڭعىش پرەزيدەنتى – ەلباسى قورىنىڭ كۇندەرى ءوتتى. ماقسات – وبلىس اكىمدىگىمەن بىرلەسە مەملەكەت باسشىسىنىڭ تالانتتى جاستاردى قولداۋعا باعىتتالعان يدەيالارىن ناسيحاتتاۋ, قور جوبالارىنا پاۆلودار وبلىسىنىڭ جاستارىن قاتىسۋعا شاقىرۋ.
ساپار اياسىندا پاۆلودار وبلىسىنىڭ اكىمى بولات باقاۋوۆپەن كەزدەسۋىندە تۇڭعىش پرەزيدەنت قورى اتقارۋشى ديرەكتورىنىڭ ورىنباسارى يگور روگوۆ قوردىڭ قىزمەتى تۋرالى ايتىپ بەردى.
– ءبىز جىلىنا 100-گە جۋىق جوبا وتكىزەمىز. ولار ادامي كاپيتالدىڭ جيناقتالۋىنا, باسەكەلەستىگىن جوعارىلاتۋعا جانە قازاقستاندىقتاردىڭ جاڭا گەنەراتسياسىن قالىپتاستىرۋعا باعىتتالعان. ءبىز عىلىم, مادەنيەت جانە يننوۆاتسيانىڭ دامۋىنا قىزىعۋشىلىق تانىتاتىن جاس دارىندارعا كومەكتەسەمىز. بۇل باعىتتاردىڭ بارلىعى قازاقستان پرەزيدەنتى نۇرسۇلتان نازارباەۆتىڭ جاستار جىلىنىڭ اشىلۋ بارىسىندا ايتقان يدەيالارىمەن جانە قويىلعان مىندەتتەرمەن سايكەس كەلەدى, – دەدى ي.روگوۆ.
تاراپتار جاستاردى قولداۋ ماقساتىندا قارىم-قاتىناستى نىعايتۋعا جانە ىنتى-
ماقتاستىقتى قالىپتاستىرۋعا كەلىستى.
كەزدەسۋ سوڭىندا قور اتىنان «جاستاردىڭ باستامالارىن دامىتۋ ورتالىعىنا» كومپيۋتەرلىك قۇرالدار الۋ ءۇشىن 3 ملن تەڭگە كولەمىندەگى سەرتيفيكات تابىستالدى.
رەسمي كەزدەسۋدەن سوڭ س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىندە جاستارمەن كەزدەسۋ ۇيىمداستىرىلدى.
سونىمەن قاتار قور قوناقتارىنا «استانا – ۇلى دالانىڭ جاۋھارى» فوتوكورمەسى تانىستىرىلدى, ال كلاسسيكا ونەرىنە قۇشتار قاۋىمعا قوردىڭ لاۋرەاتتارى ناۋرىز مەرەكەسىنە ارنالعان كونتسەرت بەردى.
جالپى, قازاقستاننىڭ تۇڭعىش پرەزيدەنتى – ەلباسى قورىنىڭ كۇندەرىن وبلىستاردا وتكىزۋ داستۇرگە اينالدى. جاستار جىلىن ەلباسى قورى پاۆلودار وبلىسىنان باستادى. بۇل قور وكىلدەرى ات باسىن تىرەگەن سەگىزىنشى ايماق.
فاريدا بىقاي,
«Egemen Qazaqstan»
پاۆلودار