استاناداعى «كورمە» ورتالىعىندا اۋىل شارۋاشىلىعى مينيسترلىگى, استانا قالاسىنىڭ اكىمدىگى, «قازاگرو» ۇلتتىق باسقارۋشى حولدينگى, قازاقستاننىڭ فەرمەرلەر وداعى, قۇس وسىرۋشىلەر وداعى, جىلىجاي شارۋاشىلىقتارى وداعى سەكىلدى ۇيىمداردىڭ تىزە قوسىپ قولداۋىمەن حالىقارالىق «AgriTek/FarmTek Astana-2019» اۋىلشارۋاشىلىق كورمەسى ءوتتى.
ەكى كۇنگە سوزىلعان كورمەگە اۋستريا, بەلارۋس, گەرمانيا, يزرايل, يسپانيا, يتاليا, كانادا, قىتاي, نيدەرلاند, رەسەي, سلوۆاكيا, تۇركيا, ۋكراينا, چەحيا, اقش سىندى ەلدەردەن كەلگەن 200-دەن استام كومپانيا, سونداي-اق قازاقستان كومپانيالارى قاتىسىپ, ءوز ونىمدەرى مەن جاڭا تەحنولوگيالارىن, اۋىل شارۋاشىلىعى سالاسىنداعى سوڭعى جەتىستىكتەرىن ۇسىندى. جوعارى ساپالى اۋىل شارۋاشىلىعى تەحنيكالارى, ەگىن سۋارۋ, جەمشوپ ءوندىرۋ, مال مەن قۇس ءوسىرۋ تەحنولوگيالارى سالاسىنداعى سوڭعى جاڭالىقتار بيىل دا كورمەدەن ورىن الدى.
– ەلباسىمىز اتاپ كورسەتكەندەي, اۋىل شارۋاشىلىعى ەل ەكونوميكاسىنىڭ ماڭىزدى سالاسى رەتىندە ونىڭ الەۋەتىن ارتتىراتىن قوزعاۋشى كۇشكە اينالۋعا ءتيىس. وعان قول جەتكىزۋدە مۇنداي ارناۋلى كورمەلەردىڭ فەرمەرلەرگە, اۋىل شارۋاشىلىعى ونىمدەرىن وندىرۋشىلەر مەن وڭدەۋشىلەرگە بەرەتىن پايداسى زور. كورمەگە كەلۋشىلەر وسىندا قويىلعان تەحنيكالارمەن جانە تەحنولوگيالارمەن تانىسا وتىرىپ, الدىڭعى قاتارلى ەلدەردىڭ, سونداي-اق ءوز ەلىمىزدىڭ ۇزدىك كومپانيالارىنىڭ قانداي جەتىستىكتەرگە جەتىپ جاتقانىن بايقاپ, وزىنشە ءتۇيىن تۇيەدى. ءوز شارۋاشىلىقتارىندا سونداي تەحنولوگيالاردى ەنگىزۋگە ۇمتىلادى. ماسەلەن, مەن ءوزىم كورمەنى ارالاي ءجۇرىپ, مۇندا سوڭعى كەزدەرى فەرمەرلەردىڭ نازارىنا ىلىگىپ وتىرعان دالمە-ءدال ەگىنشىلىك تەحنولوگيالارىنىڭ قويىلعانىن كوردىم. سونداي تەحنولوگيالاردى ۇسىنعان كومپانيالارمەن ەنگىزۋ جولدارىن تالقىلاپ, وسى جەردە كەلىسىمشارتقا وتىرۋعا بولادى, – دەيدى ەلىمىزدىڭ اۋىل شارۋاشىلىعى مينيسترلىگى وسىمدىك شارۋاشىلىعى ونىمدەرىن قايتا وڭدەۋ دەپارتامەنتى ديرەكتورىنىڭ ورىنباسارى اكبار ماۋلەنوۆ.
«كورمە» ورتالىعىنىڭ ديرەكتورى گەننادي دياكيننىڭ ايتۋىنشا, وسى ءوتىپ جاتقان اۋىلشارۋاشىلىق تەحنيكالارى مەن تەحنولوگيالارى كورمەسىنىڭ ءبىر ەرەكشەلىگى, كورمە كولەمىنىڭ بۇرىنعىعا قاراعاندا ەداۋىر ۇلعايا ءتۇسۋى بولىپ وتىر. ول «كورمە» ورتالىعىنىڭ بەس بىردەي زالىن قامتىعان. سونداي-اق ءىرى تەحنيكالار «كورمە» ورتالىعى عيماراتىنىڭ ماڭايىنا شوعىرلاندىرىلعان. دەمەك, وسىمەن 14-ءىنشى رەت وتكىزىلىپ وتىرعان كورمەگە قاتىسۋشى كومپانيالاردىڭ ىقىلاسى ارتا تۇسكەن.
– بۇل جولعى كورمەنىڭ تاعى ءبىر ەرەكشەلىگى, بۇرىن كوبىنەسە جاڭا تەحنيكالارعا عانا ءمان بەرىلۋشى ەدى. ال بۇل جولى ەگىنشىلىك سالاسىنداعى تۇقىمدار مەن تىڭايتقىشتار, جىلىجايلار ىشىنە ورناتىلاتىن سۋارۋ قۇرالدارى, ۆەتەريناريا سالاسىنداعى سوڭعى جەتىستىكتەردى ايگىلەيتىن تەحنولوگيالار مەن قۇرالدارعا دا ءمان بەرىلۋدە. ويتكەنى وسىنىڭ بارلىعى فەرمەرلەرگە كەرەك. ەكىنشىدەن, بۇل ەلىمىزدىڭ اۋىل شارۋاشىلىعىنىڭ تيىمدىلىك پەن ساپاعا قاراي بەت العانىن كورسەتەدى, – دەيدى گ.دياكين.
راسىندا بيىلعى كورمەنى ارالاپ كورگەن ادامنىڭ سالاداعى سوڭعى جاڭالىقتارعا قىزىعۋشىلىعى ارتا تۇسەدى. ويتكەنى كورمەگە قاراپ, الەمدىك اۋىل شارۋاشىلىعى سالاسىنىڭ جىلدان-جىلعا وزگەرىسكە ءتۇسىپ جاتقانىن, جاڭا تەحنيكالار مەن تەحنولوگيالاردىڭ دەندەپ ەنە باستاعانىن بايقاۋعا بولادى.
سۇڭعات ءالىپباي,
«Egemen Qazaqstan»