اقتاۋدا ماڭعىستاۋ وبلىسىنىڭ اكىمى ەرالى توعجانوۆ, اتىراۋ وبلىسىنىڭ اكىمى نۇرلان نوعاەۆ جانە سولتۇستىك-كاسپي كونسورتسيۋمىنىڭ وكىلدەرى - كونسورتسيۋم اكتسيونەرلەرى كەڭەسىنىڭ توراعاسى لۋكا ۆينەتي, NCOC كومپانياسىنىڭ باسقارۋشى ديرەكتورى ريچارد حوۋۆتىڭ قاتىسۋىمەن ءۇش جاقتى كەزدەسۋ ءوتتى.
جيىن بارىسىندا اتالمىش كومپانيا وكىلدەرى الەۋمەتتىك باعدارلامالاردىڭ اياسىندا ەكى وبلىستىڭ الەۋمەتتىك-ەكونوميكالىق دامۋىنا ينۆەستيتسيالاردى جالعاستىرۋعا شەشىم قابىلدادى.
- ماڭعىستاۋ جانە اتىراۋ وبلىسىترانىڭ الەۋمەتتىك-ەكونوميكالىق دامۋىن ينۆەستيتسيالاۋ تۋرالى قولدانىستاعى كەلىسىمنىڭ مەرزىمى وسى جىلى اياقتالادى. الايدا, 2020-2022 جىلدار ارالىعىندا سولتۇستىك كاسپي كونتسورتسيۋمى ءوزى قىزمەتىن جۇزەگە اسىراتىن ايماقتاردىڭ دامۋىنا جىل سايىن 50 ميلليون اقش دوللار كولەمىندە قاراجات بولەتىن بولادى, دەدى كونسورتسيۋم اكتسيونەرلەرى كوميتەتىنىڭ توراعاسى لۋكا ۆينياتي. بۇل ورايدا, اتىراۋ جانە ماڭعىستاۋ وبلىستارىنىڭ الەۋمەتتىك-ەكونوميكالىق دامۋىنا بولىنەتىن قاراجاتتىڭ جالپى سوماسى 150 ميلليون اقش دوللار. سونىمەن قاتار, ۆينياتي مىرزا كونسورتسيۋم اتالعان سومانىڭ قوماقتى بولىگى ءبىلىم بەرۋ سالاسىنداعى جوبالاردى دامىتۋعا جۇمسالاتىنىنا ۇمىتتەنەتىندىگىن جەتكىزدى. قازىرگى ۋاقىتتا كونسورتسيۋم اكتسيونەرلەرى وكىلەتتى ورگان – «PSA» جشس-سىمەن ءتيىستى كەلىسىمدەر بويىنشا بىرلەسىپ جۇمىس ىستەۋ تۋرالى شەشىم قابىلدادى.
- سولتۇستىك كاسپي جوباسى تىكەلەي شەتەلدىك ينۆەستيتسيالاردى تارتۋ تۇرعىسىندا قازاقستان رەسپۋبليكاسىنداعى ەڭ ءىرى جوبا بولىپ ەسەپتەلەدى. بۇل جوبا قازاقستان ازاماتتارىن جۇمىسپەن قامتىپ, جەرگىلىكتى كومپانيالاردى جۇمىسقا تارتۋ ارقىلى ەكونوميكاعا ايتارلىقتاي ۇلەس قوسۋدا. سوڭعى 20 جىل ىشىندە «نكوك» كومپانياسى اتىراۋ جانە ماڭعىستاۋ وبلىستارىندا 200-دەن استام الەۋمەتتىك جانە ينفراقۇرىلىمدىق جوبانى جۇزەگە اسىردى. وسى جوبالارعا جۇمسالعان قاراجاتتىڭ جالپى سوماسى 620 ميلليون اقش دوللارىنان استى. 2018 جىلى سولتۇستىك كاسپي جوباسى اياسىندا جەرگىلىكتى تاۋارلارعا, جۇمىستارعا جانە قىزمەتتەرگە 420 ميلليون اقش دوللارىنان استام قاراجات كولەمى جۇمسالدى, بۇل ءبىزدىڭ جالپى شىعىندارىمىزدىڭ 43%-تەن استامىن قۇرادى. «نكوك» كومپانياسى تاراپىنان 2004 جىلدان بەرى جەرگىلىكتى تاۋارلارعا, جۇمىستارعا جانە قىزمەتتەرگە جۇمسالعان قاراجاتتىڭ جالپى سوماسى 14 ميلليارد اقش دوللارىنان استى, دەپ اتاپ ءوتتى «نكوك ن.ۆ.» كومپانياسىنىڭ باسقارۋشى ديرەكتورى حوۋۆ مىرزا. سونداي-اق, ريچارد حوۋۆ قاشاعان كەن ورنىنىڭ قازاقستان ەكونوميكاسىنا قوساتىن ۇلەسى ونداعان جىلدارعا سوزىلاتىن يگەرۋ جوباسىنىڭ اياسىنداعى پايدالانۋ كەزەڭى بارىسىندا جۇزەگە اسىرىلاتىنىن اتاپ ايتتى.
- سوڭعى بىرنەشە جىل ىشىندە سولتۇستىك كاسپي كونسورتسيۋمى ماڭعىستاۋ وبلىسىنداعى ەڭ ءىرى نىسانداردىڭ قۇرىلىسىنا قاتىستى. ماسەلەن, اقتاۋدا «ماڭعىستاۋ ارەنا» سپورت كەشەنى, «دوستىق ءۇيى» سالىندى. قازىر نكوك-نىڭ تىكەلەي قاتىسۋىمەن بوكس ورتالىعى, ءابىش كەكىلباەۆ اتىنداعى مادەني ورتالىعى, ونكولوگيالىق ورتالىق جانە باسقا دا الەۋمەتتىك ماڭىزى بار نىسانداردىڭ قۇرىلىسى ءجۇرىپ جاتىر. ىنتىماقتاستىقتىڭ بارلىق كەزەڭىندە كومپانيا ايماقتاعى كوپتەگەن الەۋمەتتىك جانە ينفراقۇرىلىمدىق جوبالاردى ىسكە اسىردى, دەگەن ماڭعىستاۋ وبلىسىنىڭ اكىمى ە.توعجانوۆ كومپانيا وكىلدەرىنە ماڭعىستاۋ ءوڭىرىنىڭ الەۋمەتتىك-ەكونوميكالىق دامۋىنا قوسقان ۇلەسى ءۇشىن العىس ءبىلدىردى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى