ەلىمىزدە ونەركاسىپ سالاسىن تسيفرلاندىرۋ ارقىلى تابىستى ارتتىرىپ, شىعىندى ازايتۋعا مۇمكىندىك مول. بۇل تۋرالى كەشە ء«وندىرۋ, قايتا وڭدەۋ جانە ءوندىرىس يندۋسترياسىنا ارنالعان تسيفرلى شەشىمدەر» دەپ اتالاتىن كونفەرەنتسيادا ايتىلدى.
جيىندا ايماقتىق جانە قازاقستاندىق ينتەگراتورلار دەرەكتەردى اۆتوماتتى تۇردە وڭدەۋگە ارنالعان زاماناۋي تەحنولوگيالاردى جانە جاساندى ينتەللەكت مۇمكىندىكتەرىن قولداناتىن وزىق تسيفرلى يننوۆاتسيالىق شەشىمدەردى تانىستىردى. قازاقستاننىڭ ونەركاسىپ سالاسىنداعى كوشباسشىلارى سانالاتىن Arcelor Mittal, قازتسينك حولدينگ, Chemtech سىندى كومپانيالاردىڭ باسشىلارى ونەركاسىپتى تسيفرلاندىرۋعا باعىتتالعان الەمدىك ترەندتەردى ورتاعا سالىپ, وندىرىستىك ۇدەرىستەردى ۇيىمداستىرۋعا ارنالعان جاڭا تەحنولوگيالاردى ەنگىزۋ توڭىرەگىندە وي الماستى.
− سوڭعى جىلدارى تسيفرلى ترانسفورماتسيا ءداۋىرى قارقىندى دامىپ كەلەدى. كوپتەگەن ۇيىمدار بۇگىندە ءداستۇرلى بيزنەس ۇلگىلەرىنىڭ وزگەرۋىن باستان وتكەرىپ, تسيفرلى تەحنولوگيالار كومەگىمەن باسەكەگە قابىلەتتى بولۋعا تالپىنۋدا. قازاقستان 2050 جىلعا دەيىن ەڭ دامىعان 30 مەملەكەتتىڭ قاتارىنا قوسىلۋدى جوسپارلاپ, «تسيفرلى قازاقستان» ستراتەگياسىنا باسىمدىق بەرىپ وتىرعانىن ەسكەرەتىن بولساق, ەلدەگى ءوندىرىس سالاسىنىڭ ترانسفورماتسيادان ءوتىپ جاتقاندىعى ەرەكشە ماڭىزعا يە, – دەدى مايكروسوفتتىڭ قازاقستاننىڭ سەرىكتەستەر ارناسىن دامىتۋ جونىندەگى مەنەدجەرى ناتاليا ماتاسوۆا. ونىڭ ايتۋىنشا, ونەركاسىپتىك مەكەمەلەرگە IT ماماندار ۇسىناتىن باعدارلامالار مەن تسيفرلى نەگىزدەگى جوبالار باعاسى جاعىنان دا قولجەتىمدى.
«ارسەلورميتتال تەمىرتاۋ» اق قارجى ديرەكتورىنىڭ ورىنباسارى نەستور كوماريتسكيدىڭ ايتۋىنشا, بۇگىنگى جاڭا تەحنولوگيالار ءىرى ونەركاسىپ وشاقتارىنداعى قاۋىپسىزدىكتى قاداعالاپ وتىرۋعا مۇمكىندىك بەرەدى.
− ءبىزدىڭ مەكەمە قىزمەتكەرلەردىڭ قاۋىپسىزدىگىن ءبىرىنشى ورىنعا قويادى. بۇگىندە جاڭا تەحنولوگيالار ارقىلى ادامداردىڭ قاۋىپسىزدىگىن ساقتاۋعا ارنالعان ءتۇرلى قاناتقاقتى جوبالار بار. ءبىز دە بۇل ۇدەرىستەن قالىس قالمايمىز. ءبىر عانا مىسال, بەينەباقىلاۋدىڭ كومەگىمەن زاۋىتقا كىرگەن ءار ادامنىڭ قاۋىپسىزدىك ەرەجەلەرىن قانشالىقتى ساقتاعانىن انىقتاۋعا بولادى. بۇگىندە كومپانيادا 4 مىڭعا جۋىق ورىن اۆتوماتتاندىرىلعان. ال جالپى العاندا ءوندىرىس وشاعىنىڭ تولىقتاي, ياعني 100 پايىز تسيفرلانۋى ءۇشىن ءالى 20-25 جىل كەرەك. ەڭ باستىسى, تۇرمىسىمىزعا جاڭادان ەنگەن تەحنولوگيالىق توڭكەرىستىڭ كاسىپكەرلىك سالاعا بەرەر وڭ ىقپالى بارىن ۇعىنعان ابزال, – دەدى ول.
جيىندا قازاقستان ەكونوميكاسىنىڭ جەتەكشى يندۋستريالىق سەكتورىندا روبوت تەحنيكاسىن قولدانۋ مىسالىندا جاساندى ينتەللەكت مۇمكىندىكتەرى دە تانىستىرىلدى.
ەركەجان ايتقازى,
«Egemen Qazaqstan»