ماڭعىستاۋ كاسىپكەرلەرى جەتپەستى جالعاپ جىبەرۋ, سۇرىنگەندى دەمەپ جىبەرۋ سىندى ىزگىلىكتى ىستەردىڭ قاسىنان تابىلادى. ىزگى نيەت, قايىرىمدى پەيىلدەرىنەن جاڭىلماعان ولار بيىل مەيىرىمگە تولى شارۋانى تاعى قولعا الدى. ەندى كاسىپكەر قۇرىلىسشىلار وڭىردەگى الەۋمەتتىك احۋالى ءماز ەمەس 300 وتباسىنى ءوز قامقورلىقتارىنا الىپ, ولارعا ءبىر جىل بويى تۇراقتى كومەك كورسەتۋگە بەل بۋدى. بۇل ءۇشىن ارنايى «جاقسىلىق جاسا, قايىرىمى قايتار اللادان» اتتى اكتسيانى قولعا الىپ, امال مەرەكەسى قارساڭىندا ءوز جۇمىستارىن جاڭاوزەن قالاسىنان باستادى.
وڭىردەگى الەۋمەتتىك جاعدايى تومەن وتباسىلارعا قامقورلىق تانىتۋ, قولىنان ءىس كەلەتىن, جەكە كاسىبىن اشۋعا نيەتتى, بىراق مۇمكىندىگى جوق جاندارعا قولداۋ كورسەتۋ ماقساتىنداعى اكتسيا اياسىندا ءار كاسىپكەر ءبىر جىل بويى 10 وتباسىنا شاما-شارقىنشا كومەك قولىن سوزباق. ءسويتىپ ءال-اۋقاتى تومەن وتباسىلارىنىڭ جاقسى ءومىر سۇرۋىنە تالپىنىسىن وياتىپ, اياققا تۇرىپ كەتكەنشە كومەكتەسەدى. تەك ءبىر جولعى قارجى بەرىپ نەمەسە ازىق-ت ۇلىك الىپ بەرۋ ەمەس, ولاردىڭ كۇنكورىسىن جاقسارتۋعا باعىتتالعان ناقتى شارالار ۇيىمداستىرۋ باعىتىنداعى كاسىپكەرلەردىڭ الەۋمەتتىك كومەك بەرۋى ءتۇرلى باعىتتا جۇزەگە اسادى.
– اكتسيانىڭ «جاقسىلىق جاسا, قايىرىمى قايتار اللادان» دەپ اتالۋىنىڭ وزىندە ۇلكەن ءمان جاتىر. قايىرىمدىلىق قانىمىزدا بار قاسيەت بولعاندىقتان, ءوڭىردىڭ كاسىپكەرلەرى بىرىگىپ, ىزگى شارانى قولعا الىپ وتىرمىز. ماقسات – وسى شارانى باسىنان اياعىنا دەيىن جەتكىزۋ. كاسىپكەر رەتىندە تالپىنعان, كاسىپپەن اينالىسامىن دەگەن وتباسىلارعا كومەكتەسكىمىز كەلەدى. باتىلدىعى, جىگەرى مول ادامدار كوپ, تەك ءىستىڭ باسىن قالاي باستارىن بىلمەي ءجۇر. «بۇلاق كورسەڭ – كوزىن اش» دەگەندەي, ولار العاشىندا ءسال دەمەپ جىبەرۋدى, باعىت كورسەتۋدى قاجەت ەتەدى, – دەيدى جوباعا اتسالىسۋشىلاردىڭ ءبىرى, كاسىپكەر يسا بيمىرزاەۆ.
شارا بارىسىندا اكتسياعا قاتىسۋ ءۇشىن مەشىتتەن, جۇمىسپەن قامتۋ ورتالىقتارىنان سۇراتۋ ارقىلى تۇرمىستىق جاعدايى, كۇنكورىس دەڭگەيى تومەن, ءتىپتى ەرتەڭگى اس-سۋىن قالاي تابارىن بىلمەي وتىرعان, كومەككە ءزارۋ 300 وتباسى ىرىكتەلىپ الىندى, ولاردىڭ 90-عا جۋىعى جاڭاوزەن قالاسىندا تۇرادى. بۇگىندە جاڭاوزەن قالاسىنداعى بىرنەشە وتباسىنا پاتەر سىيعا تارتىلىپ, بىرنەشە ۇيدە جوندەۋ جۇمىستارى باستالدى. جەكە بيزنەسىن اشقىسى كەلەتىن «راحات» اۋىلىنىڭ تۇرعىنى ناۋرىز الدابەرگەنوۆكە كاسىپكەر سامات مۇساباەۆ جىلىجاي سالۋعا كومەكتەسەتىن بولدى. سونداي-اق اكتسياعا بيۋدجەت قارجىسى جۇمسالمايدى, كاسىپكەرلەردىڭ جەكە قاراجاتىنان كومەك كورسەتىلەدى.
كاسىپ اشۋ ءۇشىن جوبا جاساعانىمەن, ونى جۇزەگە اسىرۋعا قارجىسى بولماعان وتباسىلاردىڭ باسىم بولىگى مال شارۋاشىلىعىمەن, قۇس وسىرۋمەن, تىگىنمەن اينالىسۋعا نيەت ءبىلدىردى. ال اكتسيانى قولعا العان كاسىپكەرلەر تۇرعىندارعا قاجەتتى قۇرالداردى, شارۋاشىلىق جۇرگىزۋ ءۇشىن مال, قۇس ساتىپ الىپ بەرەدى, قورا مەن جىلىجاي دا سالىپ بەرەدى. قايىرىمدىلىق جاساۋدا ءمۇجالسىز وتباسىلارعا ءبىر رەتتىك كومەك كورسەتۋمەن, ياعني ازىق-ت ۇلىك تاراتۋمەن شەكتەلەتىن ىزگىلىك ءىسىنىڭ اۋقىمىن ۇلعايتىپ, ناقتى ىسكە نەگىزدەلگەن اكتسيا «بالىقشىعا بالىق بەرمە, قارماق بەر» دەگەن ۇستانىمعا ارقا سۇيەيدى. اكتسيانى رەسپۋبليكا دەڭگەيىندە جۇزەگە اسىرۋدى كوزدەپ وتىرعان ۇيىمداستىرۋشىلار الدىمەن ماڭعىستاۋ وبلىسىنىڭ بارلىق اۋداندارىن, شالعاي اۋىلدارىن ارالاماق.
گۇلايىم شىنتەمىرقىزى,
«Egemen Qazaqstan»
ماڭعىستاۋ وبلىسى