بيىل قاڭتاردا ەلىمىزدە قوعامدىق كولىك پەن تاكسي قىزمەتىن پايدالانعاندار سانى 1,8 ميلليون ادامعا جەتكەن كورىنەدى. بۇل تۋرالى تاياۋدا ranking.kz پورتالى جازدى. بۇل وتكەن جىلعى وسى ۋاقىتپەن سالىستىرعاندا 1,2 پايىزعا كوپ. سونداي-اق جولاۋشىلاردىڭ 75,5 پايىزى اۆتوبۋسقا مىنگەندى ءجون كورگەن.
ەلىمىزدە, سونىڭ ىشىندە استانالىق اعايىن قوعامدىق كولىكتى ءجيى پايدالانادى. الايدا, كۇتكەن اۆتوبۋسىڭ كەيدە ۋاقىتىندا كەلمەي, ىزاڭدى كەلتىرەدى. ونى ايتاسىز, ەلوردادا ءبىر جەرگە جەتۋىڭنىڭ ءوزى كادىمگىدەي مۇڭ. جو-جوق, وبالى نە كەرەك, اۆتوبۋستار اعىلىپ ءجۇرىپ جاتىر. ءبىر قىزىعى, قوعامدىق كولىك كوپ بولعانىمەن, ءدال سەن باراتىن كوشەگە الگى اۆتوبۋستاردىڭ ءبىرى دە قاتىنامايدى. مىسال كەرەك پە؟
سول جاعالاۋعا جەتكەنشە...
ماسەلەن, ەلورداداعى اباي داڭعىلىمەن قيىلىساتىن جۇبانوۆ, برۋسيلوۆسكي, بەيسەكباەۆ, سەمبينوۆ كوشەلەرىنىڭ تۇسىنان, قۇددى كەلىسىپ العانداي-اق, سول جاعالاۋعا ەشقانداي اۆتوبۋس جۇرمەيدى. تەك كەنەسارى كوشەسىمەن سول جاعالاۋعا جالعىز №40 اۆتوبۋس قاتىنايدى. الايدا, قالانى تۇگەل ارالاپ, شامامەن 1 ساعاتتا ارەڭ جەتەسىڭ نەمەسە №70 اۆتوبۋسقا مىنەسىڭ. ول ءۇشىن ءۋاليحانوۆ كوشەسىنە جەتىپ الۋ كەرەك. قوس باعىتتاعى قوعامدىق كولىكتەردىڭ ەسكى ەكەنى, تۇرعىندارعا قولايسىز ەكەنى بولەك اڭگىمە.
ال №40 اۆتوبۋستىڭ «تاسباقا جۇرىسىنە» شىدامايتىن, №70 اۆتوبۋسقا جەتە المايتىن كەي تۇرعىن نە ىستەيدى؟ امالىنىڭ جوقتىعىنان №60 اۆتوبۋسقا جۇگىرەدى. ونىڭ وزىنە جوعارىدا اتالعان كوشەلەردەن «وتىرار كىتاپحاناسى» ورنالاسقان پۋشكين كوشەسىنە جاياۋلاپ بارۋ كەرەك. ايتپەسە «اكەلەرىنىڭ قۇنىن سۇراپ» جۇرەتىن تاكسيگە جۇگىنەسىڭ. ولار سول جاعالاۋعا 1000 تەڭگەدەن تومەن باعاعا اپارمايدى.
سونداي-اق «جاستار», «تسەليننىي» اۋداندارى مەن ءۋاليحانوۆ كوشەسىنەن اباي-برۋسيلوۆسكي, اباي-جۇبانوۆ كوشەلەرىنە ەشقانداي قوعامدىق كولىك جۇرمەيدى. بۇل ءۇشىن بىرنەشە اۆتوبۋسقا ءمىنىپ جەتۋ كەرەك.
جىلى ايالدامانى جىلداپ كۇتەسىڭ
اۆتوبۋستى اۋىزعا العان سوڭ, ايالداما تۋرالى ايتپاي كەتە المايسىڭ. بۇرسەڭ قاققان جولاۋشىلار ەلوردا اكىمدىگىنىڭ «جىلى ايالداما سالىپ بەرەمىز» دەگەن ۋادەسىن كۇتكەنىنە از بولعان جوق. ەندى, مىنە, كوكتەممەن كورىسىپ جاتىر. وبالى نە كەرەك, سول جاعالاۋ كوشەلەرىنە جىلى ايالدامالاردى جايناتىپ قويعان. ال وڭ جاعالاۋ تۇرعىندارى, ادەتتەگىدەي, بۇرسەڭ قاعىپ ءجۇر.
بىلتىر قازان ايىندا استانا اكىمدىگىنىڭ وكىلى رۋسلان ابدۋاليەۆ بىرنەشە ميلليون تەڭگە تۇراتىن جىلى ايالدامالاردىڭ قولدانىسقا قاشان بەرىلەتىنى تۋرالى ايتا كەلە: «قازىرگى تاڭدا قۇرىلىس-مونتاجداۋ جۇمىستارى جۇرگىزىلىپ جاتىر. ەلەكتر توعى ءالى تارتىلماعاندىقتان, ول ايالدامالاردا ازىرگە جىلۋ جوق. ءدال قازىر ونى ىسكە قوسۋ تۋراسىندا «ەنەرگوسبىت» جانە ارەك-پەن كەلىسىپ جاتىرمىز. قاجەتتى جۇمىستار جۇزەگە اسىرىلعاننان كەيىن پاۆيلوندار اشىلاتىن بولادى», - دەگەن-ءدى.
ۇزىن ءسوزدىڭ قىسقاسى, قالانىڭ جوعارىدا مىسالعا كەلتىرگەن كوشەلەرى ورنالاسقان بايقوڭىر اۋدانىنىڭ اۆتوبۋس باعىتتارىن قايتا قارايتىن كەز جەتكەن سەكىلدى. ايتپەسە الگى اۋداننان سول جاعالاۋعا باراتىن تۇرعىندارعا قولايسىز ەكەنى انىق.
عانيبەت عالىمبەك ۇلى,
«Egemen Qazaqstan»