سولتۇستىك قازاقستان تۇلەكتەرى رەكتور گرانتىنا يە بولدى

ەكىنشى جىل وتكىزىلگەن پەداگوگيكالىق وليمپياداعا ءوڭىر مەكتەپتەرىنىڭ 11 سىنىپ تۇلەكتەرى قاتىستى. ۇمىتكەرلەردىڭ ءبىرى–شال اقىن اۋدانىنان كەلگەن جىبەك ءامىرجانوۆا بولاشاق ءومىرىن مەديتسينامەن بايلانىستىرماق. بيولوگيا-حيميا ءپانى بويىنشا تەستتەن مۇدىرمەي ءوتىپتى. ونىڭ جازعان ەسسەسى جوعارى باعالانىپ, ناتيجەسىندە وسى كونكۋرسقا قاتىسۋعا جولداما الىپتى.

تالاپكەرلەر ءبىرىنشى كەزەڭدە «مەن نە ءۇشىن پەداگوگ ماماندىعىن تاڭدايمىن؟»دەگەن  تاقىرىپ بويىنشا ەسسە جازسا, ەكىنشى كەزەڭدە  نەگىزگى ماماندىقتار شەڭبەرىندە شىعارماشىلىق تاپسىرمالاردى ورىندادى.

«Foundation» فاكۋلتەتىنىڭ دەكانى جۇماعالي ءاشىموۆتىڭ ايتۋىنشا, 300-گە جۋىق ءوتىنىم كەلىپ تۇسكەن. ولاردىڭ اراسىنان 200 وقۋشىنىڭ جۇمىسى ىرىكتەلىپ الىنعان. وليمپيادا قازىرگى قوعامداعى پەداگوگ كاسىبىنىڭ بەدەلىن ارتتىرۋ, ستۋدەنتتەردىڭ ينتەللەكتۋالدىق قارىم-قابىلەتتەرىن اشۋ, سونداي-اق ورتا جانە جوعارى ءبىلىم بەرۋدىڭ ءوزارا ارەكەتتەسۋ جولدارىن كەڭەيتۋ ماقساتىن دىتتەگەن.

ءبىلىم سايىسىنىڭ قورىتىندىسى بويىنشا 10 وقۋشى م. قوزىباەۆ اتىنداعى سقمۋ رەكتورىنىڭ گرانتىنا, 10 وقۋشى 40 پروتسەنت, 10 وقۋشى 20 پروتسەنت جەڭىلدىكپەن ءبىلىم الۋ مۇمكىندىگىنە يە بولدى.

ءومىر ەسقالي,

«ەگەمەن قازاقستان»

سولتۇستىك قازاقستان وبلىسى