دزيۋدودان قازاقستاننىڭ ايەلدەر قۇراماسى وزدەرىنىڭ كەزەكتى وقۋ-جاتتىعۋ جيىنىن الماتى وبلىسى اۋماعىندا ورنالاسقان وليمپيادالىق دايارلاۋ ورتالىعىندا وتكىزدى.
بيىلعى ماۋسىم ليتسەنزيالىق تۋرنيرلەرگە تولى. سول جارىستاردا ءساتتى ونەر كورسەتكەن سپورتشىلارعا عانا وليمپيا ويىندارىندا باق سىناۋ باقىتى بۇيىرادى. ودان بولەك, الەم جانە قۇرلىق چەمپيوناتى, باسقا دا كوپتەگەن بايراقتى باسەكەلەر بار. ايتۋلى دودالارعا تابىستى ونەر كورسەتۋ ءۇشىن جاتتىعۋ پروتسەسسىن دۇرىس وتكىزۋ قاجەت. سول سەبەپتى دە بۇل جولى ءبىز الماتى وبلىسى اۋماعىنداعى وليمپيادالىق دايارلاۋ ورتالىعىندا وقۋ-جاتتىعۋ جيىنىن وتكىزدىك, – دەيدى قازاقستاننىڭ ايەلدەر قۇراماسىنىڭ باس باپكەرى ەرلان الپىسباەۆ.
راسىندا دا ەلىمىزدە ايەلدەر دزيۋدوسى قازىر اقساپ تۇر. قازاقستاننىڭ تۋى استىندا ونەر كورسەتەتىن بالۋاندار اراسىنان تەك وتگونتسەتسەگ گالبادراحتىڭ عانا قارقىنى قۋانتارلىق. بۇگىنگى تاڭدا ول الەمدىك رەيتينگتە سەگىزىنشى ورىندا تۇر. وزگە ارۋلارىمىزدىڭ تەگەۋرىنى تىم باياۋ. تىپتەن, ولاردىڭ «توپ-30» دزيۋدوشىنىڭ قاتارىنا ەنۋدىڭ ءوزى مۇڭ بولىپ تۇر. سونى رەتكە كەلتىرۋ ءۇشىن وسىنداي ساپالى جيىندار قاجەت.
جەر جاناتى – جەتىسۋ وڭىردە وتكەن وقۋ-جاتتىعۋ جيىنىنا ەلىمىزدىڭ ەڭ ۇزدىك 16 سپورتشىسى قاتىستى. ولار ەندى 8-10 ناۋرىز ارالىعىندا ماروككودا وتەتىن گران-پري تۋرنيرىندە كۇش سىناسادى. ال قوسالقى قۇراما چەحياعا اتتانىپ, 2 ناۋرىزدا شىمىلدىعى تۇرىلەتىن ەۋروپا كۋبوگىندا ونەر كورسەتەدى.
عالىم سۇلەيمەن,
«Egemen Qazaqstan»