قاراعاندىداعى «دوستىق ۇيىندە» زەينەتكەرلەرگە ارنالعان «بەلسەندى ءومىر ورتالىعىنىڭ» اشىلعانىنا كوپ بولا قويعان جوق. سوعان قاراماستان, از عانا ۋاقىت ىشىندە اتالعان ورتالىق قۇرمەتتى ەڭبەك دەمالىسىندا جۇرگەن قاريالاردىڭ سۇيىكتى ورنىنا اينالىپ ۇلگەردى.
– ءوز ۋاقىتىن زامان تالابىنا ساي ءتيىمدى وتكىزۋ قاريالار ءۇشىن عانا ەمەس, ەڭ الدىمەن كەلەشەك ۇرپاق ءۇشىن ماڭىزدى. ۇلكەندەرىمىزدىڭ ۇلىق جاسىن قادىرلەۋ بارشامىزعا پارىز. ەلىمىزدىڭ دامۋىنا ۇلەس قوسقان ءار سالانىڭ ارداگەرلەرى نەمەسە زەينەتكە ەندى شىققان ارداگەرلەرىمىز ءۇشىن «دوستىق ۇيىندە» اشىلعان بۇل ورتالىققا كەلۋشىلەردىڭ سانى كوپ بولادى دەپ ويلايمىز. سوندىقتان دا, دۇنيە تانىمى تەرەڭ ارداقتى اعا-اپالارىمىز بەن جاس ۇرپاق اراسىندا بايلانىس ورناپ, قاريالارىمىزعا دەگەن قامقورلىعىمىزدى ارتتىرۋدى, ولاردىڭ ءومىر ساپاسىن جاقسارتا ءتۇسىرۋدى ماقسات ەتكەن «بەلسەندى ءومىر ورتالىعىنىڭ» اشىلۋى ىزگى باستاما دەپ بىلەمىن, – دەيدى ورتالىققا ۇنەمى تىلەكشى بولىپ جۇرەتىن ءماجىلىس دەپۋتاتى البەرت راۋ.
جاڭادان اشىلعان ورتالىقتا زەينەتكەرلەر كەز كەلگەن ۋاقىتتا باس قوسىپ, اڭگىمە-دۇكەن قۇرا الادى. مۇندا مادەني-رۋحاني كلۋبتار, مەملەكەتتىك, اعىلشىن ءتىلىن وقىتۋ ساباقتارى جانە كومپيۋتەرلىك سىنىپتار جۇمىس ىستەيدى. سونداي اق, كىتاپحانا, شاحمات ويىنى, دەمالىس, دەنساۋلىق زالدارى بار. قولونەرمەن شۇعىلدانام دەۋشىلەرگە شىعارماشىلىقتى دامىتۋ ورتالىعى اپتانىڭ كەز-كەلگەن كۇنىندە جۇمىس ىستەيدى.
– ورتالىقتىڭ اشىلۋى – وتە ماڭىزدى وقيعا. مۇندا ەگدە ادامدار سەرگەك ءجۇرىپ, ءوزىن-ءوزى دامىتىپ, قوعامدىق پايدالى ىستەرگە قاتىسادى. ءبىر ۋاقىت قوعامعا ءوزىنىڭ كەرەك ەكەنىن سەزىنىپ, جاڭاشىلدىققا ۇيرەنەدى. شىعارماشىلىعىن دامىتۋعا دا ۇلكەن مۇمكىندىكتەر جاسالعان. جالپى, «دوستىق ءۇيى» بارلىق ەتنوستاردىڭ جىلى ۇياسى اينالدى, – دەيدى قحا انالار كەڭەسىنىڭ مۇشەسى ءساليما نۇرماعامبەتوۆا.
«بەلسەندى ءومىر ورتالىعىن» قاراعاندى وبلىستىق قازاقستان حالقى اسسامبلەياسى مەن «نۇر وتان» پارتياسىنىڭ وبلىستىق فيليالى بىرىگىپ اشقان.
قايرات ءابىلدا,
«ەگەمەن قازاقستان»
قاراعاندى