بۇگىن پارلامەنت ءماجىلىسىنىڭ جالپى وتىرىسىندا دەپۋتات, اگرارلىق ماسەلەلەر كوميتەتىنىڭ توراعاسى ساپارحان وماروۆتىڭ وكىلەتتىگى مەرزىمىنەن بۇرىن توقتاتىلدى. بۇل تۋرالى قازاقپارات حابارلادى.
«ساپارحان كەسىكباي ۇلى, پارلامەنتتە بىرلەسىپ اتقارعان جۇمىسىڭىز ءۇشىن بارلىق ارىپتەستەر اتىنان العىسىمىزدى بىلدىرەمىز. ءبىزدىڭ ماجىلىستە اگرارلىق ماسەلەلەر كوميتەتىن باسقارىپ, كوپتەگەن ماڭىزدى زاڭداردى قابىلداۋعا زور ۇلەس قوستىڭىز. ەندى اۋىل شارۋاشىلىعى ءمينيسترى لاۋازىمىنا تاعايىندالدىڭىز. وسى وتە جاۋاپتى جۇمىستا سىزگە زور تابىستار تىلەيمىز», - دەدى ءماجىلىس توراعاسى نۇرلان نىعماتۋلين.
جالپى وتىرىس بارىسىندا س. وماروۆقا پالاتا دەپۋتاتتارى اتىنان «العىس حات» تابىستالدى.
ءوز كەزەگىندە مينيستر قىزمەتىنە تاعايىندالعان ساپارحان كەسىكباي ۇلى ۇلكەن سەنىم ارتقان ەلباسىنا العىسىن ايتتى.
«سونىمەن قاتار, مەنىڭ كانديداتۋرامدى قولداعاندارىڭىز ءۇشىن العىس ايتامىن. وسى جەردە ءۇش جىلعا جۋىق بىرگە جۇمىس ىستەدىك. زاڭ شىعارۋ ىسىندە سىزدەردەن تاجىريبە الدىم. اۋىل شارۋاشىلىعىن دامىتۋ ىسىندە سىزدەرمەن بىرلەسە جۇمىس ىستەيمىز دەپ سەنەمىن», - دەدى س. وماروۆ دەپۋتتارعا قاراتا ايتقان سوزىندە.
بۇدان بۇرىن حابارلانعانداي, جاقىندا اۋىل شارۋاشىلىعى ءمينيسترى قىزمەتىنە ساپارحان وماروۆ تاعايىندالدى.
ال 26 اقپاندا وتكەن ۇكىمەت وتىرىسىندا جاڭا مينيسترلەر كابينەتىنىڭ قۇرامىندا س. كەسىكباي ۇلى انت بەردى.